El Muhabbet De La Demanyana
Echar Lashon En El Kortijo,
Kon Una Grande Kupa De Kafe
I Un Boyiko De Kezo!
(Me meti mis pantuflas muevas de velours i mis
vistidikos ke merki en el shouk esta semana, el
Lunes, para ser elegante !)
Por mi ventanika veygo un ermozo diya klaro, el sielo sin nuvlas kon pasharikos kantando alegramente i saltando de arvole en arvole….Los ramos estan kuvyertos kon las chikichikitikas ojikas ke nasen para selebrar una vida mueva. Es triste de ver los arvoles dezmudandosen por el friyo del invyerno! Tengo ganas de vistirlos kon jaketas de mil brasos o kuvijarlos kon mantikas kayintes…. Tremblariyan i eyos de friyo?
El gato blondo i el preto i blanko se estan estirando gozando del sol ke trata kon diffikultad de tivyar un poko la tierra i las yervas…. Ya les echi koftikas para komer ! I para ser gato de las kayes kale tener mazal !
Oy es el 5 de Avril, Jueves, i estan las 8.oo de la manyana. Ke seya bendicho i mos trayga a todos buendades, paz i salud…. Ke todos los ke sufren topen pasensya i se les alivyene el mal. AMEN
Kero salir afuera un poko, kaminar en el park o por la elegante avenida ande todos se asentan en las patiseriyas o en los kafes modernos kon sus notebooks enfrente de eyos ensima de las mezikas kuvyertas de tasas de kafe, de agua, de cendriers (dayinda fuman komo chimeneyas !) platikos de gateau o friandizas savrozas, el telefon en la mano, travando la fustika minimini komo si no se saviyan kuando estavan salyendo de sus kazas ke estavan demazyado kurtas….. Me da inyervos este gesto tan stupido !… Si ya te vistites esto, a lo manko asentate segura de tu mizma i trata de yevar tu vistido komo se deve !
La segunda koza es kuando estas ijikas no eskapan de tokar sus kavayos para echarlos por arriva i kayen, sin duda, un segundo mas tadre ! Es una maniya kollektiva i muy feya por seguro ! Sin avlar de estas rizas muy fuertes kon una boz ke se oye del fundo de la sala, para attirar la attensyon, sin pensar mizmo ke esto es un dezgusto ! Rizas por un nada, por el fakto de riyir unikamente…. A vezes me inyervo a mi mizma por “VER” ansina de kozas…
No ay dinguna razon por kedar en kaza en este diya tan ermozo ! Seriya un preteksto tambien para ir a eskojer un livriko puedeser ke vo meldar antes de durmir ! Ya eskapi el ke estava meldando. Me plaze meldar biografias de las personas ke lograron kozas importantes o fueron ekstraordinaryos… Me gustan las novelas historikas tambien… Ademas, tanto i tanto tiempo paso des de la d’alkavo vez ke estuve mirando a las vitrinas de los magazenes shoronfonfon, kamini al bodre de mar, me asenti en las rokas para arrepozar mis ojikos en la ermozura del bleu i del horizonte en los muy leshos, ver los vapores blankos ke yevan la gente a las izlas de la Marmara….
Fuyir de kaza ke gole la dolor, la tristesa, la muerte dospues ke peryimos Mehmet, el padre de mi ijiko ke engrandesi komo si fuera mi ijo…. Grasyas al DI-o ke su espoza, la madre de mi ijiko estava kon mozotros fina la fin porke lo kudyimos en mi kaza. Arrekojer fuersas para enfrentar de muevo lo duro de la fin de la vida…. Rogar a mi Amigo en los Sielos para ke mos de pasensya i fuersa. De vedra ke odyo el kanser ke yevo a mi mamita i yevo, antes poko tiempo, a Mehmet, un angelo en este mundo al kual le mankavan las alas solo… Nunka se kesho. Fue reingrasyando Di-o porke estava arrodeyado de sus keridos i kudyado bien i kon amor. Penso ke es un grande privilegio de estar bien mirado, saver ke todo lo posivle se esta azyendo i tener a su lado personas keridas, ijos, espozo/espoza, inyetizikos kerensyozos. Ay tantos viejizikos sin dingunos, mansevos mizmo ke no tienen los medyos de pueder kurarsen o personas para okuparsen de eyos… Es la fe sola ke ayuda en estos kavzos…
Si….. Un banyo perfumado, kalsados komo guantes, vistidos sport, antojos de sol i afuera Sharopika. Ha hutsaaaaaa… Respirar i ver la vida….
Vos abrasooooooooooo…
Sharope blanco
PS :
Yahoo metyo un artikolo sovre kualas son las mijores sivdades en el mundo para bivir ….Ya lo meldatesh puedeser… Yo meldo el Yahoo de Inglaterra i Irlanda ke es la ventana de avyertura de mi Internet ! Esto auzada i lo tengo des de 2002 de kuando ke tengo el Internet en kaza. Ayyyyyy ! Komo el tiempo paso… Me akodro ke lo aviyamos merkado kon Nebil, mi ijo, para ke pueda embiyarme fotografiyas suyas muncho mas fasil ! …. El Skype no egzistiya dayinda i la koneksyon kayiya a kada punto !
Artículos Relacionados: