Buyukada (PRINKIPO kon su nombre grego), kon las otras islas mas chicas, kaye djusto enfrente de la kosta asiyatika de Istanbul i da una vista maraviyoza a los ke moran al bodre de la mar o a los ke s’asentan en los kafes las demanyanadas o en la tadrepara gozar d’un poko de freskura en los dias los mas kayintes de enverano.
ENVERANADA PARA LOS RIKOS
Para eskrivir este artikulo me fui a munchos anyos atras, a las enveranadas de los anyos 50, 60 i 70 ke fueron la epoka la mas brilyante de todas las islas pormodo de la kultura, de la rikeza i del buen gusto de la gente ke se ivan a morar en eyas por 3-4 mezes kuando las eskolas se serravan fina ke se avriyan de muevo.
LAS KUZENDERAS
Muestras vakansas empesavan en Avril !!! Komo ? Kon las kuzenderas… I lo ke s’aparejava para el enverano ke no era manko de los ashuares alavados de las famiyas judias de Istanbul ! Aviyan dos kategoriyas de kuzenderas. Las unas o los unos eran shastres de alta kustura para fostanes de bodas, kokteyles i envitasyones etc. Las otras veniyan a las kazas i lavoravan de la demanyana fina la tadre (en vezes fina la noche para eskapar akel fostan kon drapes i volanes i aldikeras apegadas en todos los lugares ! ! ) En vezes se kedavan unos kuantos dias o se ivan i tornavan las demanyanas.
Mozotros teniyamos Donna (judia Tekirdagliya) i Julyeta (grega muy sempatika) ke eran komo miembras de muestra famiya.
Estas kuzenderas ke ivan “a la jurne” teniyan un defteriko kalendaryo chikitiko en sus chantas (an agenda in the handbag). Las dammas ke lo mas eran paryentes, amigas i vizinas metiyan sus nombres a las datas ke kerian ke la kuzendera venga. Estas kuziyan fostanikos de plaj i de kada diya i la de las ijikas i de las madmuazelas. Las kuzenderas por la vistimienta ekskluziva de las kreaturas eran otras.
Yo siempre meti mi nombre a munchas ojas de los defterikos para ke vengen a azer fostanikos para mis kuklas ma no se deke nunka vinyeron ! No me kontavan por benadam kuando era chika parese ! Kada ves le diziya a Donna i a Julyeta ke Dilek, mi kukla no tiyene nada de vestir i ke las asperava absolutamente ! “Por seguro ke vo vinir i le vamos a kuzir munchos fostanes i tualetas “me respondiyan. Mintiras ! Mintirozas ! No vinyeron ! Fui ovligada de kuzir yo …..i no saviya azer nada ! No me va olvidar ke triste koza era de no tener fostanes para trokar mis kuklas…Ke saviya yo ke manera de mizerya estavan konosyendo las chikas de mi edad en la guerra i dospuez…. Las ke se salvaron de una manera o de otra de la muerte… de la ambre… de las dolores..
OY MI KORASON YORA KUANDO PENSO A ESTAS IJIKAS KE MURYERON….KE SUS ALMAS REPOZEN EN PAZ – AMEN
TRIKOTAR – BRODAR EN EL DEBARKADER DE BUYUKADA
El triko es el lavoro ke las mujeres azen kon dos shishes (algujas muy largas de maz o menos 30 sentimetros, a vezes delgadas a vezes godras (asigun el model del lavoro), por kitar en medyo una jaket, una bluza, kalsadikos para bebes, un shal o un kashkol o un ermozo sveter para el ijo o el marido ! Se uzan ilos de koton, de lana o sentetikos…
Yo me namoro de ver estos “chiles” de kolores bivas en las vitrinas de siertos magazenes. (Las “chiles” de lana se aziyan pelotas antes de empasar a trikotar). En Istanbul, lo mas se venden en los magazenes chikos entre las kalejas…No son modernos i grandes. Chikitikos i sempatikos.. Se puede ver polvo en los rafes porke el vendedor ya esta viejo i kansado…la vida….Un sefertasi (kaldera espesyal para yevar komida de kaza a la eskola o al lugar del lavoro) en un kanton. Komidika ke le aparejo su spoza viejizika kome el. Vende “tuhafiye” tambien, (Bonetterie en fransez) ke es kalsaz, botones, chamashires (vistimyenta debasho de los vestidos) alfinetes i kopchas (hooks en ingles) fermuar (zips en ingles). Nada moderno ! Magazen de “al tiempo”. Kedaron muy pokos porke kuaji dinguno kere mas “trikotar ” (azer triko en kaza) Oy en diya ay lo mijor, lo mas moderno i bastante barato en el merkado. Las mujeres merkan “pronto”. No kuzen o trikotan en kaza (ke pekado). Antes las mujeres adovavan afilu las kalsaz de las kreaturas o del marido en kaza… Aziyan remendos. Tomavan para esto un pedasiko de ropa i lo kuziyon ande la kalsa estava arazgada. Ke luzyo esto ! Envezes las kalsaz no estavan muy arazgadas alora no se aremendavan ma se aziya “repriz”… kijo dizir tratavan de kuzir el lugariko sin ke se veyga muncho, kon ilikos asemejantes i konmuncha atensyon. Ke mujeres 
“Trikotar” era bueno para los inyervos. Ansina diziyan ! Aziyan esto muy muy presto. Komo makinas i avlavan entre eyas mientre trikotavan. No miravan lo ke aziyan mizmo !
Aparejavan tambien el ashuar de las ijas en kaza. Kilometros de ilos kon una algujika chikitika para brodar savanas, manteles, tapones….. Echos de ermozura inkreyivle ! Tomava anyos i anyos…Kuando yo era chika, i en Buyukada en el debarkader, (ansina se diziya ande viniyan i se ivan los vapores) no aviya mujer o muchacha ke no lavorava. (brodava o trikotava) Estas ovras se mostravan a todos i se alavavan las mujeres ke aziyan kozas remarkavles. Mi madre i yo nada, nadika ! A mozotros mos plaziya gizar. Ke komidas… Lokura ! Mos plaziya meldar i muzika. Mi madre era profesora de piano (i yo ize este “echo” durante 6 anyos en mi manseves !) Las algujas mos viniyan mas difisil de lo ke aziyamos…
Kuando abashavamos al debarkader era seguro ke me iva enfasyar asentadika al lado de mi madre ke siempre avlava judeo espanyol kon sus amigas brodando o trikotando ! (No puediya saver ke me iva ambezar tanto de eyas .) Era el momento de demandarle moneda para entrar en el magazen de livros a la koshe (esquina) de la salida del vapor, a la siedra. El Mosyo Grego me konosiya muy bien i mismo ke se le riiya la kara kuando me viya. Era un hombre feyo, seryo i lo mas del tiempo no avlava kon dingunos a parte de sus amigos gregos komo el.
Konosiya kada livro i livro en su butika…. Puediya meldar 2 o 3 livros de kreatura al diya ! Meldava en Fransez i en Turko i lo ke teniya aya me abastava fina la fin del enverano. Si no, me iva bushkar animalitos para karesarlos i jugar kon eyos.. Me arreskunyavan, me moryian ma yo no me ezvachava ! Los ke eran hazinos los tomava para kurarlos en kaza sin ke mi padre los viya !
Fines de semana era FIESTA. Mis paryentas se ivan al piknik kon sus amigos. Yo me asuviya al azniko i mos ivamos a kaminar kon el hombre ke mis paryentes konosiyan de anyos … Jugava kon el azniko, le avlava, lo abrasava, le dava lechua ke aviya trayido de kaza, mas kaminavamos… Ni saviya kuanto kostava para ke kede horas enteras kon mi !
El hombre estava kontente… Mi padre tambien ! No les mauyava ke me esto enfasyando ! I era un plazer. Me akodro fina agora de este azniko, “Boncuk” lo yamava (abalorio/bead) pormodo de sus ojikos briyando i muy muy ermozos. Es kuryozo ! De akeyos diyas me abastava de mi para mi i saviya lo ke keriya ! Amigitos no eran lo mas importante… Kuando me engrandesi teniyan muncho mas lugar en mi vida !
Me akodro ke eskriviya muncho tambien ! Eskriviya letras a mi papi ke le dava las demanyanas para ke melde en el vapor kuando se iva al echo ! En vezes eran listas para ke me trayga lo ke teniya de menester ! Magazines de kreaturas, kalemes de kolor, munchas ojas blankas i limpyas para eskrivir, una bisikleta mueva (no me trayiya !) kuras para los animalitos i kukla (no me trayiya !) , una puset para meter mi kukla aryento i kaminarla, livros i bonbonikos i chewing gum, kolonya i algodon ! Kon esto alimpyava las firyidas de los gatos i de los perros para kemar el mikrob ! I lavava mi kukla ! Le diziya ke tengo menester para alimpyar las touches en marfil del piyano. Chikes…. sonyandome de akeyos dias….
EL BAZAAR AMERIKANO I EL BALO MASKADO DEL KLUB
Komo se puediya pensar de ir a Buyukada i pasar dias enteros al “Club” sin las tualetas, los fostanes de kokteyl, la vistimyenta elegante de las envitasyones “de punto” , los dopyeses de seda o de tual (keten) kon el kol brodado a la mano ? Kon los shales de mohair – livyanos i kayintikos para las tadres freskas -, los jupones de dantela de naylon kates kates, tules, blankos i de kolor, enkomendados de Europa o de Amerika o merkados en los “Amerikan Pazari” ke son butikas ande se topava la mijor ropa importada de todos los payizes…Lo mas de los Estados Unidos… Era el tiempo del Tuslog . [El grande magazen Amerikano en el basis (kisla-caserne) mizmo de los soldados amerikanos ke vendiya toda manera de produktos amerikanos sin ganansya a sus miembros i lavorantes] Todos keriyan merkar de ayi ma era defendido. Los soldados davan regalos o a vezes vendiyan estas kozas tan dezeyadas kontra produktos lokales. Hilda, Una vizinika ermeniya muestra teniya un amigo -dospues se kazo kon el- en la armada Amerikana ke le trayiya kozas ke mos rovava el meoyo !!!
El merkado de los “Amerikan Pazari” en Salipazar en Istanbul konosyo una epoka gloryoza i para mozotros era una “kaverna de Ali Baba”. Anyos dospues dezaparesyeron kon una ley kontra estas butikas.
El evenimiento tradisyonal el mas grande de Buyukada era el balo alkual todos se ivan maskados. Grupos grandes o chikos se aparejan para este balo de muncho antes, muy elegantes i en loskuales solo los miembros o amigos de miembros puediyan entrar. El primer premio era para el grupo ke se aparejo lo mijor i la persona la mas buena degizada. Aviyan tambien premios para los sigundos i los treseres. I yo avlo de premio komo se deve !!!!
EL MINI GOLF
Asperavamos el enverano del invierno i avlavamos kon los amigos ke ivamos azer este anyo i ke aviyamos echo el anyo pasado ! Era un sujeto ke nunka eskapava tan mos kaptivava i tan enteresante era para mozotros ! Agora lo topo esto tanto stupido Dio mio! Ma alora esto era de moda de avlar i si keriyas ser parte de un grupo d’amigos deviyas de azer komo los otros, avlar komo los otros, vistirte komo los otros i mizmo oyer la mizma muzika, ir a las mizmas eskolas etc… Kreyo ke oy en diya los mansevikos biven mas o menos de la mizma manera…..Solo ke para mi todo esto es tan leshos…tan insignifikante…..
Buyukada era nombrada por sus aktivitades de enverano….Los mansevos se ivan kada dia dospues de la sesh de la tadre fina las ocho a un lugar muy sempatiko : el mini golf. Djugavamos golf (miniaturo) abasho en la guerta aranjada para esto i dospues mos asentavamos en el kafe yenno de djente de muestra edad entre 15 i 20 anyos para oyir muzika, avlar i, deko no, flortar un poko. Yo era la mas chika del grupo. Teniya 14 anyos kuando me fui por la primera ves. Las ijikas teniyan 16 i mas i todas teniyan un amigito !
Muestras madres eran amigas i es ansina ke una amiga me yevo ayi.No me tomaron por benadam ! Unos me estavan mirando ma yo pishin trokava de siya i me estava muryendo deverguensa… Nunka lo vo olvidar… Dospues de 3 o 4 vezes ke me fui ayi, ya konosiya a todos i saviya ke dizir, kon ken avlar kon ken no avlar, kuando baylar i kuando no baylar…. I….. por segura ke era un lugar ande me tresaliya de ir….Fina ke un diya mi tiyo me travo del mini golf kon ravya, nunka lo entendi por kualo. Mi madre me deshava ir…No aviya nada de negro ayi i yo saviya perfektamente komo komportarme ! No se lo pardoni ! Dospues, no kije irme mas… Pensiya ke todos se ivan a burlar de mi pormodo ke mi tiyo me travo de ayi komo una kreaturika chika, me asuvyo a su bisikleta i me yevo a kaza…..Ke horor ! Mirava mis amigitas ke s’estavan indo todas vistidas kon los jupones i los fostanes stripless, los kaveyos largos alevantados en una “queue de cheval ” -coletta- fardadas muy poko i kalsados komo las de las balerinas. Yo me fuyiya aryento i yorava porke mi tiyo me aviya dicho ke si me viya otra ves ayi me iva chaketonar delantre de todos ! Ke aviya ayi de tan negro ? Nunka lo supe ma me akodro ke no keriya bien mas a mi tiyo ke amava tanto.. Al otro anyo ya estava todo olvidado…. Era mas grande me iva al golf i mi tiyo estava en Suadiye por la enveranada…. Buyukada estava enkantadora….
EL SINEMA AVYERTO I EL KAMINO DE LOS NAMORADOS
No ay safek ke el mini-golf era el mijor lugar para atarse amigos, konoser todos los mansevos i mansevikas i aranjar ande se teniya ke ir para baylar la noche de Shabat, ande ken aviya un “parti” ken iva vinir la noche al sinema etc…
Las noches mos ivamos a estos sinemas de guerta ke lo mas traiyan filmos turkos… Mos merkavamos pipitikas i a vezes mos yevavamos un kavesaliko para ke no mos tuyga las pachas ensima de la siyas de tavla de al tiempo.. ma lo mas para englenarmos en echando estos komo topes (balls) dospues del sinema en las kayes kuando no kedava mas dingunos…
Bovedad…lokura.!!!!!!!! Los ke moravan mas leshos veniyan kon bisikletas. En la ada (izla) era i es dayinda defendido de tener otomobiles o motosikletas. Ay arabas (koches) travadas kon dos kavayos o aznikos para ir de un lugar al otro i bisikletas por seguro.
Es dospues del sinema i de los djugos en la kaye, kuando tornavamos a kaze ke los ijikos avriyan sus korasones a las ijikas. El amor apanyava los mansevikos i se formavan munchas vezes los kuples ke se ivan a kazar dospues…. Kaliya asperar los estudyos….El askerlik (el servisyo militar) i ke el ijiko tenga una situasyon (un lavoro, revinido) ke lo mas se formava kon la dota ke arresiviya de los paryentes de la novya. Tuve munchos amigos ke se kazaron dospues de flortar munchos anyos. Lo mas, en estos tiempos, eran kazamientos duravles mizmo si ay unos ke se kitaron doespues de munchos anyos.
Salir kon grupos, mizmo si se flortava kon un ijiko o una ijika era de moda. Se aziyan piknikes en los lugares assolados i mos englenavamos komo lokitos en nadando i djugando. Un otro paseyo era de azer el tur de la ada en pasando por el “asiklar yolu ” – el kamino de los enamorados – ke era entre los chames (pinos). Aya tambien los mansevikos deklaravan el amor ke sintiyen por la ijika de sus penseryos…A vezes saliyan pletos en estos paseyos, viyamos ke aviya ijikas ke yoravan o mansevos ke supito empesavan a fumar de tristesa…. Agora todo esto me reviene komo una piesa de teatro !
YEKTA – LUNAPARK I LOS PIKNIKES
Los anyos 60 i 70 son markados por los bayles en los klubs. El rock’n roll i Elvis Presley, los Beatles, Pepino de Capri, Dominico Modugno, Charles Aznavour, Johnny Halliday i Sylvie Vartan, Enrico Macias, Adamo i muy munchos otros ke mos kitavan lokos kon sus muzika ke plaze oy mizmo. Mozotros eramos fanatikos de muzika i de bayles. Mos ivamos a los klubs el Shabat dospues de midi i los dias de Alhad, lo mizmo en inviyerno.
En enverano el lugar el mas populer de la ada era ” Yekta ” por seguro. Se baylava fina la demanyana i siendo un klub muy grande kon dos pistas puediyan entrar sienes de mansevos ayi. Dunke, no se puediya pensar no ir a “Yekta” el Shabat de noche. Me akodro, el anyo d’alkavo aver baylado sin kedar fina la demanyana kuando estava prinyada de 7 i 8 mezes porke lo tuve en mis brasos a mi ijiko el 22 de Septembre 1968. Adorava baylar i no puediya no baylar porke sino mi marido iva baylar kon otras…i yo me selava…. Eramos el uniko kupl ke era kazado en muestro grup alora….I no es solo baylar… Asuviya a los montes de rokas i abashava d’eyos fina la mar…Ke lokura…. Komo no me kayi i Hasveshalom no me rompi la kavesa o peryi a mi ijo….Parese ke en akeyos tiempos era mas loka de oy !Luna Park era un restorante/kafiko al empesijo del kamino de los namorados i es en medio del chiko tur de la ada. Mos agradava ir komer baylar i djugar ayi. Baylavamos tambien en los partis d’amigos ke se preparavan en pensando a todo. Muzika, komida, luzes, envitasyones…. Mas tadre, se avriyo el Degirmen (molino). No, el Degirmen era antes de Yekta porke mos ivamos aya antes de ser kazados…De diya era una plaj ande mos ivamos muy raramente porke lo mas saliamos kon muestro motor para ir detras de la izla ande aziyamos piknikes, kon los sandviches ke merkavamos en el debarkader, 4 deyos por benadam i una kasha de gazoz !
Pasavamos el dia entero a nadar, a meldar i espandirmos al sol. Teniyamos muestra plaj privada porke dingunos no viniyan ayi. Era un lugariko ke nunka me olvidi… Ni de las piedras blankas, ni del sielo blu, ni de los chames arriva del monte, ni de las rokas ke konosiya a ojos serrados ni del fok ke vi un diya en la mar ! Ke espanto ke tuve ! No saviya ! Me paresyo komo un monstre ! Ken puediya penser ke aviya fokes en la mar Marmara ! Me enkantava de ver los dolfinos djugando a tres i a vezes a sesh !… Ke ermozos dias… Grasyas al Di-o ke las bivi kon allegria i amor. Esto keda i nunka se puede efasar.
Kon esto aki se eskapan mis linyas sovre Buyukada, una de las mas bellas ke puede egzistir en el mundo…Oy… no kero saver de las izlas porke no puedo suportar la krualtad de los “arabadjis ” el ombre ke aharva los kavayos para ke kaminen kuando estan kansados muertos, sin agua i sin komida a vezes…. debasho del sol kemando i los piezes ensima del asfalt tostando… El dio ke los aga kavayos en Buyukada a la otra vinida !!!!
Artículos Relacionados: