LA ESPARTIDA ES GRIZA KUANDO EL YORO ES LUVYA…
i… LA NOCHE ABASHA
Un largo vuolo de Londres a kaza
Me veygo eskrivyendo fina la yegada
Penso a komo paso este diya
De una aleskura demanyanada
Mojando mis ojos fina agora…
Luvya… Siempre esta luvya sarpikando
Las nuvlas baylan kon el ayre friyo
Observo el boske sin kolor, grizo…
Es un triste i ekstranyo sentimiento !
Ande se fue a eskonder el vedre briyozo ?
Estava sola, asentada al bodre de la kama
Kama ajena ke no es mas miya !
Kedi mirando a la luksuoza kamareta
A kada kanton de esta kaza Ingleza
Ande me siento ajena i nada me asemeja
Los anyos pasaron, la persona troka
No se a ken o a kualo echar la kulpa !
El friyo del payis enteza los korasones
El grizo del sielo kuvija las emosyones
Las manos no karesan, kedan leshos a vezes…
Amo la soledad i el inkonyito del aeropuerto
Me alegra dospues de tanto silensyo !
Su boz amada me bushka, es su kudyado,
No puediya akompanyarme… Mi angelito !
Somos mas serka de leshos, kuryozo….
Riyo entre mi a mis impulsos femininos
A kerer tokar a las kozas ke azen briyar los ojos
Las kolores, los perfumes me travan a eyos
A ken venden las djoyas kon oro i brilyantes ?
Estas ropas kon presyos egzorbitantes ?
Los d’alkavos pasos, el va i ven,
Unos salen, otros entran, no se ken…
Tengo tiempo i agora no pasan los minutos
Penso a mis amigos, los dulses animalitos
A ken di mis avyanas, muezes i igos sekos.
Mi lugar esta allado de la ventana.
El grizo del tiempo asemeja a la espartida.
Me inyervo pormodo de este lugar tan estrecho,
Kero mover i tomar un profundo respiro…
Una viene i me demanda deke no me ato !
Hora de partir enfin ! Helisas boltan…
Kero yegar a mis kantones ke me enkantan,
Tornar a la kostumbre de diyas ke bolan,
Abrigarme kon brasos ke me abrasan
Ver mis keridos, riyir kon los ke me arregalan…
Ke ermozo es bolar ensima de las nuvlas !
Veygo masas de algodon blandas i blankas
No ay nada ke manche el azuro immenso
No bolan ni moshkas ni pasharos tan alto !
Es un mundo de luz kalmo i maraviyozo !
Abasha la noche avagar, imperseptivlamente
El klaro del sielo esta mas riko, mas evidente
Persivo la Estreya Polar komo un diamante
Portanto, dayinda se banyan de luz los sielos
Malgrado la kolor morada ke pinta los leshos
Miles de violetas a los bodres de mi ventana
Al horizonte una riga kolor de narandja
Ke kontrasto violente kon la kolor berendjena
Flamas koloradas abrazan los tenebros de sus fuegos
Antes ke una godra manta kuvije el firmamento…
La noche yego… Miles de luzes aklaran la sivdad
No egziste en Istanbul ni enfasyo ni soledad
Los pontes del Bosforo son guirlandas luminozas
La plata de la luna nada en las ondas de sus aguas
Mis oyidos me pezan… agora stoparon las ruedas !
Sharope Blanco
[email protected]
Artículos Relacionados: