UNA TRAJEDIYA KE DERROKO 2 FAMIYAS JUDIYAS !
SE PUEDYERON REKONOSER LAS 11 MUJERES KE SE MURYERON EN EL AKSIDENTE DEL JET PRIVADO KE KAYO I SE KEMO EN LAS MONTANYAS DE IRAN A UNOS 370 KILOMETROS AL SUR DE TEHERAN.
AYER LA KOMUNITAD JUDIYA DE TURKIYA ESTAVA EN DOLYO KON LOS FUNERALES DE LAS DOS IJIKAS, MANSEVAS JUDIAS DUENYAS DE SUS ECHO… SON :
JASMIN BARUH SILONI Z’l
LIANA HANANEL KALMA Z’l ,
La levaya de Liana – 28 anyos – Designer de vistimienta i kon un bebe de 8 mezes…
Jasmin Baruh Siloni Z’l designer de joyas – estava prinyada-
REKONOSIDAS MUAVAMENTE DE NASYONALITAD ESPANYOLA, ASIGUN LA LEY DEL RETORNO A SEFARAD DE LOS DESENDIYENTES DE LOS JUDYOS EKSPULSADOS EN LA INKIZISYON.
No estan mas……..
Amigas de Mina Basaran, viajaron kon eya i otras 5 amigitas, a los Emiratos Arabos Unidos para fiestar su noche de soltera en el konserto de la selebra kantante i artista Ingleza Rita Oro en una diskoteka de Dubai.
Rita Oro
Es en tornando a sus kazas ke el horrible aksidente okuryo. Dinguna de las 11 mujeres puedyeron salvarsen… Las pilotas i la hostesa eran tambien mansevas de la kompanyiya de aviasyon del padre de Mina Basaran, uno de los mas rikos hombres de negosyos de Turkiya, el duenyo de Basaran Holding. Su d’alkavo projekto, ke se yama Mina Towers, es un komplekso de 1500 moradas -ultra lux- en Istanbul, la fragua de laskualas ya esta por terminar. Es su ija, Mina, ke administrava todos sus echos en sus kompanyiyas dospues de arresivir su diplom de la mas prestijyoza universitad de Turkiya. La boda de Mina i de su novyo Murat Gezer iva tener lugar el 14 de Avril, en unos diyas. Se iva selebrar en el famozo Palasyo Ciragan de los Sultanes Otomanos. Nada…. Dingunos puediyan saver lo ke les rezervava sus destino, i es por esto ke siempre devemos dizir “si kere el DI-o” antes de azer planos mizmo por un diya despues…
Mina i su novyo Murat El Palasyo Ciragan Kempinski
Las tres otras amigitas Turkas, espozadas, se ivan a kazar este enverano kon un mez de intervalo kada una i se aprometyeron ke ivan a fiestar sus noche de soltera todas enjuntas otra vez, komo lo izyeron por Mina…. No ayegaron….
De la levaya de Mina Basaran…
Oy todos avlan de la dezgrasya ke afito… El tiempo va kurar mizmo los mas afektados… No lo van a olvidar ma no les va dueler mas. Es ansina ke Di-o mos kriyo porke ansina lo kijo..
Rogo por las almas de estos anjelitos ke bolaran tan presto al Ganeden porke los Seres Selestos kijyeron puedeser adornar la Eternitad kon sus manseves, sus ermozura, sus intellijensya, sus Buendad i sus modestiya….
Sefaradimuestro
Artículos Relacionados: