GRANDES PROJEKTOS DE ISRAEL

Por:
- - Visto 465 veces

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones son enrejistradas a mi nombre.

Despues de tres semanas sin avlarvos por modo de las fiestas de Sukot i Shemini Atseret ke kayeron un djueves, ya m’eskarinyi de vozotros, keridos oyentes!


Sigyendo una idea akompanyada de dokumentasyon embiyada por mi kerido amigo Jose Molho, ke rengrasyo de muevo, pensi de avlarvos oy de kuatro grandes projektos de Israel, el uno no de Israel solo, los tres otros si, kyero avlar del projekto de pipeline de la Mar Kolorada asta la Mar Muerta, del projekto de TGV de Tel-Aviv a Yerushalayim, del projekto de ayudar a los amerikanos para azer una kura kontra el terrivle virus Ebola, i del projekto de azer una kura kontra el kanser kon una substansya elaborada por un ratoniko.

I) Empesaremos por el projekto de TGV, porke es un projekto ke es syen por syen un projekto israelyano.
Asigun los haberes venidos de Israel, ya empesaron los lavores de fragua de un tunel para trenos indose de Yerushalayim a Tel Aviv.

Asigun la gazeta israelyana The Times of Israel, el 6 de este mes de oktovre, los sinyores Binyamin Netanyahu, Primo Ministro de Israel, i Israel Katz, ministro de los transportes, asistyeron a la inogurasyon de la fragua de un tunel para trenos, ke va azer parte de una red de trenos de alta rapidez, i ke va aunir Yerushalayim kon Tel Aviv.

Este tunel, ke en vedra va ser la ultima fragua del projekto, va empesar de Shaar Hagai; aki me syento ovligado de avrir una paranteza a propozito de Shaar Hagaï, porke esta sivdad tyene su fama de lo ke era la yave del kamino verso Yerushalayim enserrada i ke aya muryeron munchos djudyos en la gerra de independensya de Israel; en este tyempo se yamava Bab el Wad; puede ser, unos entre vozotros, keridos oyentes, se akodran de una muy ermoza kantika de Haïm Guri i Shemuel Farshko kantada por Shoshana Damari kon este titolo de Bab el Wad. Los ke kyeren oirla, sino por Shoshana Damari ke no topi, a lo manko por Yafa Yarkoni (nada no es!) se pueden ir a oirla sovre youtube https://www.youtube.com/watch?v=9p0xmWtP6Ig

Syerro esta paranteza ke, ya lo entenditesh, no vyene del Times of Israel. Era una paranteza miya…

I de Shaar Hagaï el tunel se va ir asta Mevaseret Tsion, lo ke aze entre 14 i 15 kilometros.

Netanyahu disho ke el projekto no es solo de ir de Yerushalayim a Tel Aviv, ama tambyen de atar todo el pais de Kiryat Shmone (kijo dizir del norte de Israel) asta Eilat, i puede ser tambyen un diya, ama esto es dainda solo un suenyo, atorgo Netanyahu, de Tel Aviv a la Jordaniya al este.

Por su parte, el ministro de los transportes adjunto ke el projekto, en su ultima realizasyon, es de ayegar por tuneles asta el Kotel mizmo (la Pared del Templo).

Por lo ke es de las paras, esta linea Yerushalayim – Tel Aviv va kostar 7 miliyardas de shekalim, lo ke mos aze serka de dos milyardas de dolares o de un milyarda i medyo de euros. Tomara 28 minutos, es dizir menos de medya ora, para ir de una sivdad a la otra. Se pensa ke los lavores se van a eskapar al kavo de 2017.

Ya se empeso la fragua de una estasyon 80 metros de basho de la tyerra a la entrada de Yerushalayim, ke podra, en kavzo de bomba atomika, servir de avrigo i arresivir unas 2.000 personas.

El treno pasara por Modiin, Latrun i el aeropuerto Ben Gurion en Lod. Va ser posivle de azer pasar 4 trenos por ora en los momentos de djentorya.

Estos trenos elektrikos korreran a 160 kilometros por ora. Asigun el Ministro de los Transportes, para este projekto, va ser menester para los 680 injenyeros de azer maraviyas arkitekturales. en mas del tunel, komo puentes los mas largos i altos de Israel.

Esto dicho, todos no son de akodro kon este projekto, sovre todo los Palestinyanos i tambyen israelyanos de la syedra, syendo ke la linea va kortar dos vezes la frontera vedre (entre Israel i los territoryos de Palestina), una vez serka de Latrun i una vez serka de Mesaveret Tsion.

Lo ke veo, yo ke moro en Paris, es ke tengo menester de medya ora para vinir kon metro de kaza asta aki en la radyo: es el tyempo ke sera bastante para ir de Tel Aviv asta Yerushalayim. Ya se ke el pais de Israel es chiko, ya se ke mozotros los fransezes tenemos un tunel ke pasa debasho de la mar entre Fransya i Ingletyerra, lo ke es otra mesele, ama yene me tresalgo de ver Israel ir adelantre solo unas kuantas semanas despues de tener sido bombardado por un enemigo sin piyadad. Ashkulsun Israel!

II) Desharemos agora los trenos, i avlaremos de un otro projekto, ke tambyen topi en el Times of Israel, el projekto de ayudar a los amerikanos para azer una kura kontra el virus Ebola.
Kale saver ke las firmas amerikanas Leaf Bio i Mapp Biopharmaceutical toparon en djunto una kura yamada Zmapp, travada de ojas de tutun (tobacco) en las kualas una tresera firma amerikana, Kentucky Bioprocessing, meskla virus Ebola i virus del tutun, i la oja de tutun fragua para protejarse un remedyo ke despues, si kyere el Dyo, puedra salvar los hazinos umanos del Ebola.

Estamos dainda al emppesijo del empesijo, i no se puede dainda estar siguro ke esto va ser efikache. Ama entremyentres otra koza no ay.

En kuanto a los Israelyanos, kijo dizir la firma yamada CollPlant, toparon, si entendi bueno, povereto de mi, el artikolo ke no era muy klaro, una manera de travar en grandes kantidades este remedyo de las ojas de tutun.

No me vo dainda apesgar sovre este projekto, porke kale asperar un poko para ver lo ke va salir de esto todo, ama yene keriya avlarvos de esto, porke estamos todos o aharvados o menasados por esta hazinura de Ebola, i bueno es de saver ke ay djente ke lavora para salvar a los hazinos.

III) De la misma manera, no me vo apesgar dainda sovre un lavoro del profesor israelyano Aaron Avivi, porke dainda no esta pronta una kura kontra el kanser.

Ama yene vos tengo de dizir ke, asigun lo ke meldi sovre el sityo Siliconwadi, este profesor de la Universidad de Haifa, despues de 16 anyos de bushkedad, a topado un kamino ke puede permeter de luchar i, deke no, ganar kontra el kanser.

Asigun lo ke puvliko en la gazeta BMC Biology, ay en Israel, bivyendo de basho de la tyerra, ratonikos syegos ke tyenen la partikularidad, no solo de rezistir a kanseres suyos, ama mismo a kanseres injektados. Este ratoniko es kapache de matar, de si para si, las selulas kanserozas.

Agora el lavoro va konsistir en travar la kura naturala ke fragua este animaliko para fabrikarla para los ombres. Kale asperar otros munchos anyos para esto, ama ay un kamino, i esto puede ser muy provechozo para la umanidad.

IV) I agora ayego al kuatren projekto, ke no es en vedra del solo Israel, i ke es azer vinir las aguas de la Mar Kolorada en las de la Mar Muerta.
Ya se save ke, si el Monte Everest en el Himalaya es el punto el mas alto en el mundo, a la rovez la Mar Muerta, ke se topa a 422 metros debasho del nivel de la mar, es el punto el mas basho en el mundo.

Lo ke kale saver tambyen es ke, si el rio Yarden se echa en esta mar, dingun rio sale de esta mar ke en vedra es un lago. Una vez yegadas en la mar Muerta, las aguas del Yarden se evaporan. I komo, de otra parte, todos los paizes vizinos del Yarden le toman la mas grande parte de sus aguas para los menesteres del arregamyento (irrigation en franses) lo ke ayega a la mar no son las aguas de un rio, ama solo las aguas de un arroyiko ke no son bastantes para kompensar la evaporasyon de la mar. La mar, ke resiviya un milyarda i trezyentos milyones de metros kubos de agua por anyo en los anyos sinkuenta, resive solo 200 milyones agora. El rezultado es kolay de endevinar: la Mar Muerta se esta asekando muy presto: ya pedryo 25 metros de nivel desde 100 anyos, i agora pyedre sus aguas muncho mas presto: kaji un metro de nivel kada anyo, i si se avla de su superfisia, pedriyo un tyerso en los ultimos sinkuenta anyos. Ya se korto en dos, i la parte sur kaji no egziste mas.

De otra parte, esta diferensya de nivel entre la Mar Muerta i las otras mares dyo ideas de muncho tyempo a djente ke pensaron de aprovechar esta diferensya. Meldi ke en 1902, Theodor Herzl el mismo ya tuvo esta idea. Ama el mas konosido de los partezanos de un tal projekto fue Walter Clay Lowdermilk (1888 – 1974), un amerikano kristyano amigo de los syonistos i de Israel, ke en 1944 izo konoser un plano (yamado el plano Lowdermilk) ke, entre otras ideas, konsistya en la fragua de un un kanal yevando desde Haifa las aguas de la Mar Mediterranea asta la Mar Muerta. Entre munchos provechos de este kanal, la diferensya de nivel puediya permeter la produksyon de elektrisita.

Ama por varyas razones teknikas i politikas, este plano nunka pudo ser realizado asta oy.

De la misma manera, en el empesijo de los anyos ochenta, Menahem Begin inoguro un kanal de debasho de tyerra, ama el projekto ke kostava de maziya fue abandonado en 1985.

No son los Israelyanos, ama los Jordanyanos, ke tuvyeron un muevo projekto en 2006, no mas desde la Mar Mediterranea, ke no kontrolan, ama desde la Mar Kolorada, en Akaba. El projekto konsistiya en pompar las aguas de la Mar Kolorada en Akaba asta las montanyas serkas, lo ke suveriya las aguas a 600 metros arriva del nivel de la Mar Muerta. De aya un kanal de 180 kilometros (kon 134 de basho de la tyerra) yevariya las aguas en territoryo jordanyano asta la Mar Muerta. Esto permeteriya de produzir 800 megawatts de elektrisita, ama tambyen 800 metros kubos de agua dulse por anyo kon una fabrika de desalinizasyon.

Estas aguas permeteriyan no solo de reinchir la Mar Muerta, ama tambyen de arregar tyerras del dezyerto. Lo todo kostariya 3 a 4 milyardas de dolares, i por empesar 1 milyarda para kavakar el kanal. La idea de los Jordanyanos era de aunir los Palestinyanos, ama tambyen los Israelyanos, para la realizasyon de este projekto. Por esto el kanal fue yamado el kanal de la paz.

Dos anyos mas despues, en 2008, el projekto kedava dainda un projekto, ama ke kaminava: la idea era de tomar 2 milyardas de metros kubos de agua de mar, de yevar la mitad para inchir la Mar Muerta, i de aprovechar la otra mitad en la desalinizando kon la enerjiya provenyendo de la diferensya de nivel: dos tyersos de la agua dulse para la Jordaniya, ama un tyerso para Israel i los Palestinyanos.

Otros anyos pasaron, i en avril 2013, la Banka Mundyala disho ke la koza se puediya azer. Ama munchas asosyasyones ekologikas se pronunsyaron kontra el projekto, dizyendo ke mijor seriya de deshar aguas al Yarden en vez de ir a bushkar las de la mar Kolorada, ke podriyan danyar, sino los pishkados de la Mar Muerta, ke no ay, por esto se yama la mar muerta, a lo manko la kompozisyon de su agua, kon el riziko de ver apareser algas koloradas, ets.

De otra parte, aviya el problema del kosto muy pezgado: 10 milyardas de dolares.

Por esto, el projekto dicho faraoniko de un kanal a finalmente sido abandonado por razones de paras: demaziya karo. Otra solusyon a sido achetada, por un akodro firmado en Amerika el 9 de desyembre 2013, dunke ay menos de un anyo, entre la Jordania, Israel i la Otoridad Palestinyana. Este akodro es muncho mas modesto: no se avla mas de pompar 2 milyardas de metros kubos de agua, ama solo 200 milyones, lo ke kyere dizir 10 vezes menos. Sovre estos 200 milyones de metros kubos, solo la mitad ira inchir la Mar Muerta, sea 100 milyones de metros kubos. 80 otros milyones van a ser desalinizados. Estas aguas no van a ser yevadas por un kanal, ama por un pipeline en primero, i tres otros mas despues. De toda mabnera, ya se save de agora ke esta agua no va ser bastante, syendo ke, si vos akodrash lo ke ya vos dishe al empesijo, la Mar Muerta resiviya un milyarda i trezyentos milyones de metros kubos en los anyos sinkuenta. Kon los solos 200 milyones ke resive agora del Yarden i los 100 milyones ke va resivir de la Mar Kolorada, va resivir en todo 300 milyones: yene va mankar un milyarda de metros kubos.

De otra parte, una grande parte de las aguas pompadas, kaji la mitad, dunke entre 80 i 100 milyones de metros kubos al anyo, va ser desalinizada, i esta agua dulse va ser espartida entre Jordaniya, Israel i Palestina, para servir sovre todo al arregamyento de las tyerras .

Por siguro, este projekto firmado va kostar muncho manko ke el del kanal de 2006. En vez de kostar 10 milyardas de dolares, el projekto ke a sido firmado va kostar entre 250 a 400 milyones de dolares.

Kale ver lo ke va salir de esto todo. Lo bueno, ama veremos si se va azer, es ke tres paizes van a azer en djuntos una ovra de paz: Israel, Jordaniya i Palestina ovrando en djuntos para salvar la Mar Muerta, komo diziya Herzl, si lo keresh no sera un suenyo. La kuestyon es: es ke se va azer despues de la gerra de Gaza i la entrada del Hamas en el governo palestinyano? Si se aze, de toda manera, ay el tyempo de los lavores i lo veremos solo al kavo de unos sinko anyos. Ke dizirvos? asperaremos…

Esto dicho, afillu las gerras, las menasas, los enemigos, estash vyendo ke Israel se va adelantre para el byen de todos, i esto es koza ke mos va al korason.

Al djueves ke vyene, si kyere el Dyo!

Paris – Fransya

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: