A Tiempo……. Agora

Por:
- - Visto 237 veces

Keridos Amigos i mis amigitas,

En el enverano de 2013, muestra kerida Sarika de Haifa mos embiyo unas informasyonas muy pratikas ke todos nesesitamos en muestra vida
de kada diya. El message era en Turko i no lo kiti al foro porke el DI-o solo save kon kualo estava okupada en akel tiempo i no lo traduizi !
Puedeser ke estava tratando de entender komo una moshka pasava su vida o komo el ayre topava su kamino para entrar de mi ventana serrada.. O, komo yo reushiya a kemar una komida estando en lakozina! Kozas ke devemos meditar de vedra… No es en vano ke digo ke las 24 horas del diya no me abastan ! Esto muy okupada !

Veremos agora kualos son estos konsejos ke fasilitariyan tanto muestra vida…. Unos son de vedra interesantes i vale meterlas en pratika…..


– Si el vidriko de vuestros antojos esta flosho i sale de su lugar, kale pasar al burakito, la chika furcha (brosse – cepillo) de una laka de manikur sin kolor. Esto la va detener i no va “echarse en basho” otra vez..

– Si vuestros kalsados muevos vos apretan los pies, kale detenerlos durante unos kuantos minutos ensima de la vapor. Se ancheyaran.

– Kortar en munchos pedasos el papel de lija (zimpara kagidi – sandpaper- la papier abrasif) si keresh aguzar vuestras tijeras…
[yo uzo la lima de karton i reushko ma…. Dospues kale embiyar al sierkol la povre lima ke ermozeya las unyas !]

– No olvidar de serrar los fermuares de los vistidos antes de meterlos en la makina de lavar para ke estos no se deteryoren….

– Si las kupas se apegan entrando una aryento de la otra, kale inchir pedasos de buz (hielo-glace) en estos i meterlos dospues en un resipiante
ke vash a inchir avagar avagar kon agua tivya. Se van a espartir sin rompersen.

– Para kitar las etiketas de los objetos de vidro, de plastik o seramika, kale meter ensima margarina i frottar un poko. Asperar unos 15-20
minutos i lavarlos kon una fregadera. No kedara dinguna mancha o trasa.

– Si keresh obtener un mijor rezultado por la vistimienta ke dash uti (repasser-planchar), se konseja de meter un folio de aluminium de basho
de la tela de dar uti. Esto va reflektar la kayntor i ganarash tiempo.

– Meter pedasikos de limon, de naranja o de agranada en vazyando agua aryento de los moldes de hielo. Los buzes seran mas savrozos i mas
ermozos. (Una ideya fantastika !)

– Pies muy sensibles, ke se aunflan kuando esta kayinte i dan desrepozo, deven ser fregados durante unos kuantos minutos kon unas kuantas gotas de azeyte de oliva. Una otra terapiya es de masarlos un poko kon kolonya, i el tobillo (ayak bilegi – la cheville) tambien.

– Los vistidos de koton (algodon) deven de ser deshados en la agua yelada durante toda la noche por la primera vez ke se van a lavar – antes de lavarlos kon agua kayinte, para ke no se estrechen.

– Ya savesh ke el limon es ermozura para munchas kozas i la piel (el kuero) en partikular…. No ? Puedesh uzarlo para tener kovdos i karkanyales perfektos !

– Komo vash a entender ke la azeyte ke uzatesh para una friturya esta bien dayinda ? Muy fasil. Echar un revanada de pan aryento de esta azeyte buyendo i mirar si ay manchas pretas… Si ay kale echar la azeyte, si no es buena para una mueva friturya.

– Para mundar fasilmente las muezes es konsejido de desharlos de la noche kon agua salada. Ansina no se van a espedasar aryento, en rompiendo la kashkara.
Ay otros i otros ma ya abasta para oy !!!!

Karinyos i beziko para Sarika

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: