Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
No pude azer emisyon la semana pasada tanto me popava ronko i abashamyentado. Oy me syento un poko mijor, i vo aprovar de avlarvos sin toser.
De kualo avlarvos?
Kuando vos ize, el 13 de fevrero del anyo pasado, una emisyon sovre djudyos ke trokaron el mundo, vos avli de Albert Einstein, i vos dishe unos kuantos byervos sovre el.
Agora me pensi ke merese mijor de unos kuantos byervos, i ke una emisyon entera seriya byen, afillu si, povereto de mi, no kale ke pensesh ke vos vo dar a entender sus lavoros. No kale demandarme kozas ke no son de mi kapachedad. Einstein era el primero a no pueder dar a entender sus lavoros a la djente non syentifika. Un gazetero le demando una vez a Einstein si puediya dar a entender lo ke era su teoriya de la relatividad, i Einstein le respondyo demandandole: “puedes dar a entender a la djente komo gizar un uevo a la sarten sin ke la djente sepa lo ke son un uevo, una sarten, una azete i un fuego?”
Ama yene, mismo si la mayoriya de la djente no entyende nada a sus lavoros, la vida de este ombre keda muy interesante de kontar.
Albert Einstein nase el 14 de marso 1879 en la sivdad de Ulm, sivdad de Almanya en el Wurtemberg famoza para los fransezes porke aya Napoleon obtuvo una grande viktorya kontra los Ostriakos en 1805. Su padre Herman es merkader y injenyero. Solo un anyo despues de su nasimyento, su famiya va instalarse en Munich ande su padre i su tiyo fundan una firma de “fabrika elektroteknika” ke no va reushir porke bazada sovre el koryente kontinuo, i es el alternativo ke va ganar kontra el.
El chiko Albert se keda tres anyos sin avlar, al punto ke sus paryentes se espantan, no sea ke es un poko atrazado…En vedra era puede ser un poko autisto. Meldi otra eksplikasyon: mirando su meoyo despues de su muerte, los savyos konstataron ke la parte del meoyo konsagrada al penseryo abstrakto era tan desvelopada ke no deshava lugar para la zona de la avla, ke se topa al lado! En otros byervos, seriya porke era de maziya intelijente ke no puediya avlar…
Lo ke es siguro, es ke al empesijo, dinguno de las eskolas ande se fue penso ke el chiko Einstein era intelijente. En primero es embiyado a los sinko anyos por sus paryentes a una eskola katolika ande se keda tres anyos, asta los ocho, edad ande se ve embiyado al Luitpold Gymnasium (diriyamos el liseo) ke oy se yama el Albert Einstein Gymnasium.
Aya no se amostra un elevo kumplido. Lo ke no le interesa, no lo ambeza. En 1894, kuando Einstein tyene kinze anyos, la famiya se va de Almanya para aprovar de topar mijor lavoro en Italia, i se va en Milano. Ama el povereto de Albert no tyene derecho de kitar la Almanya porke dainda no izo el askerlik. Ama tanto se enfasya soliko ke al kavo kaye hazino, i un doktor le da un papel ke le permite de irse de Almanya. Ama pyedre la nasyonalita almana i se topa apatrid.
Albert kere ambezarse la filozofiya, ama su padre no kyere, el kyere ke se ambeze para ser, komo el, injenyero en elektrisita. Albert eskapa por achetar, ama kon una kondisyon: irse a la Eskola politeknika de Zurich. Ama para esto, ay un konkorso para ser achetado, i Albert no lo reushe. Es bueno en matematikas i fizika, ama es flako en otras kozas, por egzemplo el franses o la kimika. El anyo despues, es admetido, i va pueder entrar en esta eskola, de la kuala va salir kuatren. En mizmo tyempo, se enamora de una eleva de su klasa, una serba yamada Mileva Maric. Ni los paryentes del uno, ni los de la otra kyeren esta unyon, ama Albert es budak i yene se va kazar kon eya.
En 1901 obtyene la nasyonalidad suisa. Bushka lavoro i es yuch porke tyene un karakter difisil i birroto. Entra en una eskola para ser profesor, ama el direktor no soporta su karakter i lo echa a la puerta.
Enfin, en 1902, es empyegado al Ofisyo de las patentas de Berna, lo ke le va traer una syeta trankilidad para pueder lavorar a sus bushkedades syentifikas.
I vyene el anyo 1905, yamado agora annus mirabilis (el anyo maraviyozo) ande Einstein va amostrar sus kapachedades: en este mizmo anyo 1905, Einstein va prezentar su teza de doktotato i va ser doktor en fizika, i va publikar kuatro artikolos en la revista Annalen der Physik, la mas vyeja, famoza i de alto nivel syentifiko, fundada en Almanya en 1790, i ke dainda egziste oy (salvo ke agora los artikolos son eskritos en ingles en vez de alman).
No vo malorazamente pueder dizirvos muncho sovre estos kuatro artikolos, afillu si trokaron el mundo, porke no es de mi kompetensya. Ama yene kale saver un poko de kualo se avla:
1°) primer artikolo, publikado en marso, intitolado (en alman) “Sovre un punto de vista euristiko sovre la produksyon i la transformasyon de la luz”. Euristiko kyere dizir ke aze topar pronto lo ke se bushka.
En este artikolo, Einstein emete la teoriya ke la luz es a la vez ondulatorya i korpuskularya. Antes aviyan los ke diziyan, komo Maxwell ke era una onda sin dinguna materya, i otros, entre los kuales Newton, ke la luz era kompozada de pedasikos de materya. Einstein dize ke los dos tynen razon, i ke esto permite de entender la teoriya de los quantas (ke seran yamados photons en 1920) emetida por Max Planck. Enfin…esto es lo ke kreo tener entendido!
2°) Sigundo artikolo, publikado en mais del mizmo anyo 1905, intitolado “Sovre el movimyento de pedasikos en sospensyon en un likido immovil, komo egzijido por la teoriya sinetika molekularya de la kalor”. Este movimyento, ke se puede ver al mikroskopo, se yama agora movimyento brownyano (del nombre de un botanisto yamado Robert Brown, ke lo deskuvriyo en 1827).
Einstein, no kale demandarme komo lo izo, amostra ke este movimyento obedese a ekuasyones matematikas i statistikas. I su artikolo trae una preva ke los atomos no son solo una teoriya syentifika, sino ke egzisten en realidad.
3°) Treser artikolo, publikado en junyo, intitolado “De la elektrodinamika de los kuerpos en movimyento”.
Detras de este modesto titolo, Einstein mos da a entender – por los ke son kapaches de entenderla – su teoriya de la relatividad dicha limitada.
Ya es bastante yuch de entender lo ke dize Einstein, mas yuch de darlo a entender a otros, i mas yuch de darlo a entender en djudeo-espanyol. Pekado ke Einstein no era de los muestros i no avlava muestra lingua. Esta emisyon uvyera sido mas kolay…
Vos diré solo ke asigun Einstein, el universo no obedese a una jeometriya euklidyana en tres dimensyones, ama en una jeometriya en kuatro dimensyones, la kuatrena syendo el tyempo. No ay el espasyo de un lado i el tyempo de otro lado, los dos van en djuntos i esto se yama el espasyo-tyempo.
Kuando yo era mansevo, aviya merkado i meldado un livriko eskrito por Einstein el mismo sovre la relatividad, i kuando lo meldi me paresyo ke lo entendiya… Agora kuando lo meldo de muevo, no entyendo mas nada, esto deve ser la vejes!
Ama de una koza a lo manko me akodro, es ke Einstein se referiya muncho a los lavoros de Hendrik Lorentz, un savyo holandes ke teniya lavorado sovre las diferensyas de tyempo i de espasyo asigun ande se topa el ke mira (un treno, por egzemplo). Ama Lorentz kreiya a la egzistensya de un ether materyalizando el espasyo, i Einstein fue syempre kontra esta idea.
Algunos (sovre todo fransezes) dizen ke Einstein vino despues de Henri Poincaré, i ke el haliz ke topo la relatividad no es Einstein, es Poincaré. Asigun lo ke yo pude meldar, es siguro ke esta teoriya era, vamos a dizir, “en el ayre del tyempo”, i ke es siguro ke Lorentz i Poincaré kontribuyeron al nasimyento de esta teoriya. Ama ni el uno ni el otro kontestaron la paternidad de la teoriya a Einstein, al kontraryo kedaron en buenas relasyones, eskrivyendosen kon amistad.
Vamos a dizir ke era mas ermozo para el mundo de ver la teoriya topada por un ombre solo de a penas 26 anyos, i la kara de Einstein eskondyo de manera indjusta, ama sin ke sea su kulpa, los lavoros de los otros. Komo lo dishe, Einstein era el primero para sitar los lavoros de Lorentz en su artikolo.
4°) Kuatren artikolo, publikado en novyembre, intitolado “Es ke la inersiya de un kuerpo depende de la enerjiya ke kontyene?”
Este artikolo es el de la ekuasyon la mas famoza de toda la fizika: E=mc2, asigun la kuakla la enerjiya de un kuerpo al repozo es iguala a su masa multiplikada por el kuadrado de la rapidez de la luz.
Savyendo la importansya de la rapidez de la luz, i esta multiplikada por eya mizma, esto mos da una idea de la enerjiya inkreivle eskondida en un kuerpo al repozo. I lo vemos en la enerjiya ke sale de una bomba nukleara.
El anyo 1905 fue maraviyozo en lo ke en la mizma anyada un ombre de 26 anyos salyo tantas deskuvyertas. Ama en esto todo, komo ya vos dishe, uvo tambyen la prezentasyon de la teza de fizika de Einstein, ke izo de el el 15 de janvier 1906, un doktor, lo ke dainda no era kuando publiko sus artikolos.
El titolo de la teza: “Una mueva determinasyon de las dimensyones de las molekulas”. Einstein amostra ke se puede mezurar la dimensyon de un atomo kon una ekuasyon.
Mas tadre, Jean Perrin se va servir de esta teza para demostrar la egzistensya de los atomos.
Despues de publikar estos artikolos, Einstein bushka las konsekuensas syentifikas de sus deskuvyertas, i en 1916, publika su teoriya de la relatividad dicha jenerala. Las vyejas leyes de gravitasyon topadas por Newton son trokadas en un universo a kuatro dimensyones, i Einstein estudya las muevas leyes de gravitasyon en este universo visto de otra manera.
En 1919, a la favor de una eklipsa del sol, el astronomo Eddington amostra ke la luz de las estreyas ke pasan serka del sol son travadas por el, i ke esto aze ke paresen toparse ande no estan kuando no ay el sol. Esto es una konfirmasyon por la eksperyensa de la vedra de la teoriya de Einstein.
I en 1921, resive el premyo Nobel, para dizir la vedra no por su teoriya de la relatividad, ama “por sus kontribusyones a la fizika teorika i mas partikolarmente a su deskuvyerta de la ley del efekto fotoelektriko”.
Mismo ya de antes, Einstein es rekonosido por todos los savyos, afillu los ke no son de akodro kon sus teoriyas.
Desde 1914, kedandose suiso i dunke neutro en la gerra, se va bivir de muevo en Almanya, ande lavora komo profesor. Se kita kon su mujer Mileva i se kaza kon una prima, Elsa.
A poko a poko, el syelo de Almanya se oskurese, i Einstein se ve atakado komo djudyo, asta ke Hitler venga al poder en 1933. Einstein esta en viyaje, i toma la desizyon de no aboltar en Almanya. Va kedarse poko tyempo en Beljika, i despues se va en Amerika, ande se ve dar un ofisyo de profesor en Princeton, ande se va kedar asta su muerte en 1955.
Al lado de sus estudyos syentifikos, es muy menester de avlarvos tambyen de las ideas politikas de Einstein.
Einstein era djudyo, i de esto nunka se eskondyo, afillu si no era muy relijyozo. Mas diremos ke era deisto. Ama lo ke es siguro, es ke era syonisto. Era amigo kon todos los lideres syonistos, i por empesar Chaim Weizman. Se fue en Palestina para la inogurasyon de la Universidad de Yerushalayim.
En 1952, Ben Gurion le ofrese de ser prezidente del muevo Estado, komo lo fue Chaim Weizman. Einstein le responde ke no puede achetar, dizyendole: ” Si konosko las leyes del universo, no konosko kaji nada de los seres umanos. Ademas, parese ke un prezidente de Israel deve en vezes firmar kozas ke dezaprova, i dinguno puede imajinar ke yo pueda azer esto”.
Kuando se muryo en avril 1955, estava aparejandose para un diskorso a la televizyon por la okazyon del seten aniversaryo del Estado de Israel.
A parte de su atadijo kon el syonismo i Israel, Einstein lucho para los djudyos en el mundo.
Por egzemplo, en 1933, Einstein embiya una letra a Ismet Inonü, primer ministro de Turkiya del tyempo de Kemal Ataturk, demandandole de akojer los profesores djudyos i sus famiyas fuyendo Almanya, i es vedra ke la Turkiya lo izo, esto ya lo aviya dicho yo el 10 de desyembre 2009 en mi emisyon sovre Turkiya i Djudyos (40-44).
Vos diziya :” Vos akodro ke Kemal Ataturk se muryo en novyembre 1938. De su tyempo, i a partir de 1933, la Turkiya resivyo kon sus famiyas munchos, ama no se kuantos, artistos i universitaryos djudyos almanes, i les topo lavoro.”
Esto es lo ke yo diziya en 2009, ama no saviya ke fue Einstein ke aviya eskrito para esto a Inonü. Meldi agora ke fueron unos 1.000 djudyos almanes, los ke pudyeron refujyarse ansina, ama no puedo asigurar la vedra del shifro.
Kale dizir ke Einstein no lucho solo en favor de los djudyos. Lucho tambyen en favor de los pretos de Amerika, i kontra la segregasyon, dizyendo ke no son los pretos ke son hazinos, son hazinos los blankos ke azen segregasyon.
Ya vino el tyempo de eskapar la emisyon, i no vos dishe ni un byervo del rolo de Einstein en 1939 para enkorajar las bushkedades para azer una bomba atomika, i su lucha despues kontra esta misma bomba, i de manera mas jenerala kontra la gerra i en favor de un governo mundyal.
No topi tampoko el tyempo de avlarvos de Einstein vyolonisto, ni de tantas otras kozas ke kaliya dizir sovre el, sus dichas i su umor.
Un otro diya, puede ser. Agora me keda de dizirvos: al djueves ke vyene, si kyere el Dyo!
Artículos Relacionados: