En los protokoles de noteres del Archivo Istoriko de Dubrovnik ay algunos testamentos de miembros de la komunidad sefaradi de Ragusa de los siglos 16-17. El chiko numero de tales testamentos en komparasion kon los testamentos de los kristianos en este mizmo archivo sorprende a los ke se okupan de este tema; ma djustamente a kavza de esto i de la importansia dada tradisionalmente a este tipo de dokumentos, me parese interesante tratar aki de estos testamentos, notados por notarios kristianos, i de los kualos podemos embezar muncho sovre importantees aspektos sosiales i espirituales de los djudios de Dubrovnik.
Naturalmente no podre aki estudiar en detalio a todos estos testamentos, sino ke me limitare a las konkluziones a las kualas yegi, examinando a sesh solo de entre eyos. Estos testamentos estan eskritos en latin i en italiano, lenguas ke komplikan la lektura de los tekstos a kavza de la konstruksion de las frazas, del leksiko, abreviaturas espesiales, grafia, moneda i formas de pagamiento i sovre todo los uzos i kustumbres lokales.
Sinko de los testamentos son de ombres ma el sejen, de una mujer, merese una atension espesiala siendo ke solo en raras okaziones la mujer djudia podia deshar un testamento. Eya podia prezentarse a un notario solo djuntos kon su marido, su ijo o su ermano, ma en este kavzo el testamento esta eskrito por una sierta Ester ke se identifika komo “mujer de Moises Maestro, de bindicha memoria” siendo ke al eskrivir su testamento eya ya era bivda.
En jeneral, los sesh testamentos examinados sigen las mizmas formalidades ke los kristianos de Ragusa, ma no ay por kualo estranyarse siendo ke los notarios uzavan las mizmas formulas para todos. Komo es lojiko en los testamentos djudios no era mensionado Jesus ni la Virgen, kon la sola eksepsion de uno de estos testamentos, de Moises Calderon, onde es dicho klaramente “.. en el nombre de Kristo, Amen!”
Djuntos kon esto se notan unas kuantas diferensias ke meresen ser mensionadas. Por exemplo, en el prefasio de los testamentos se inkluyen a vezes, por imitasion, aluziones a la brevedad de la vida i al fakto ke no se save kuando yegara la muerte; ma no se manifesta el espanto del “mas aya” ni el dezeo de lograr la Gloria, tan frekuente en semejantes dokumentos kristianos.
Kontrariamente al uzo de los kristianos ke davan gran importansia al lugar del enterramiento i a la kantidad de paras ke se deshava para esto, siendo ke munchos kerian ser enterrados alientro de una iglezia, o monasterio o un lugar semejante, en los testamentos examinados todos demandan ser enterrados en el bedahen djudio de Ragusa i solo en uno de eyos, en el de Ester Maestro se demanda kon muncha insistensia ke eya sea enterrada serka de su marido. Eya demando tambien ke echen kal biva sovre su kadavre para ke, kuando kitaran los guesos de su marido para yevarlos a la Tierra Santa. yeven los suyos tambien.
En algunos testamentos es tambien aklarado el dezeo de anular kualker otro testamento echo de antes; de otra parte, ay tambien testamentos en los kualos figura una formula ke se opoza a toda posibilidad de azer apelo o refuzar de kumplir lo ke esta eskrito ayi.
Podemos dizir en konkluzion ke estos testamentos revelan muncho sovre el mundo sosial i espiritual del ke desha ansi sus ultimas veluntades i tambien sovre su estatuto ekonomiko i sus prioridades espirituales. Un aspekto ke sovresale del examen de estos testamentos es por exemplo la volontad de mantener la union al seno de las famiyas i los atadijos espesiales kon la Tierra de Israel.
Primera parte del testamento de Ester, mujer Moises Maestro
Artículos Relacionados: