Babel, Mikhoels, i los tredje fuziyados

Por:
- - Visto 786 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

De kualo avlarvos oy? Despues de los migrantes, despues de los veluntaryos deportados, uvyera gustado de avlarvos un poko de kozas mas livyanas, ama mis amigos, i entre eyos, komo munchas vezes, Jose Molho, me propozaron de avlarvos de Isaac Babel, este eskrivano djudyo ruso fuziyado en 1940. I komo avlarvos de Babel sin avlarvos de Mikhoels, asasinado en 1948, o de Markisch i sus amigos fuziyados en 1952?


Lo ke fue la terror del tyempo de Staline, dainda oy no se puede imajinar. Indimas no se puediya imajinar en su tyempo afuera de la Rusiya, syendo ke era sekreta i ke los komunistos aziyan de Staline un Dyo vivante.

Los primeros rusos a ser komunistos fueron los djudyos, persegidos por el tsarismo i sonyando de una revolusyon ke deviya darles la libertad. Entre otros, Trotsky, Zinoviev, Kamenev eran djudyos. Lenin el mismo teniya un papu (el padre de su madre) nasido djudyo.

Las kozas no se pasaron ansina. Al empesijo, entre 1917 i 1923, del tyempo de Lenin, uvo una gerra sivil terrivle. Lenin se amostra un diktador sin piyadad kon la tcheka i los kampos de lavores forsados komo instrumentos de terror. Ama lo peor va vinir despues de su muerte, ke afita en janvier 1924. En sinko anyos, Stalin va reushir a arrondjar del poder todos los kapos komo Trotsky, Zinoviev, Kamenev, Boukharine. En 1929, vyene a ser solo al poder. I la istorya va amostrar ke komparado a Stalin, Lenin era un angel…

Ama no vine aki para kontarvos la istorya de la URSS basho Stalin, entre 1929 i 1953, anyo de su muerte. Solo vos kyero avlar de lo ke afito a unos eskrivanos o a un aktor djudyos entre 1940 i 1952.

isaac_babel

Empesaremos por el eskrivano Isaac Babel.

Nasido en 1894 en Odessa (sivdad de nasimyento de uno de mis papus, ama esto es otra istorya) el chiko Isaac Babel se va a la eskola ande lavora muy byen, i al lado se ambeza el violon, el Talmud, el yidisch i el franses.

Babel puede ver lo ke es un pogrom kon el de 1905, kon la estruisyon de su kaza i la muerte de su tiyo. Komo lo dishe mas arriva, si tantos djudyos se izyeron revolusyonaryos, es en primero por odyo del tsarismo ke permetiya los pogromes, kuando no los empesava el mismo.

Babel es remarkado por Gorki, ke lo enkoraje en su veluntad de eskrivir. Ama vyene la revolusyon, i Babel se da de toda su alma por el bolshevismo, i partisipa a la gerra sivil kon los bolshevikos.

Se mete a eskrivir kuando se eskapa la gerra sivil, al empesijo de 1924. Eskrive varyas istoryas en varyas revistas. En 1927, viyaja en Evropa, Berlin, Beljika, Fransya. En 1928, parese en Fransya i en franses un livro de sus istoryas, intitolado “Cavalerie rouge” (Kavaleriya kolorada). Publika tambyen otro livro intitolado “Kuentos de Odessa”.

Se ve ke Babel a la vez defende el bolshevismo por el kual kombate, i a la vez no kyere romper kon sus raises djudiyas. En 1926, lavora kon otros a trasladar del yidisch al ruso los eskritos de Sholem Aleykhem. En su istorya intitolada Gedali, este ombre del shtetel dize: “A la revolusyon vamos a dizir si, ama es ke kale ke digamos no al shabath?”

Para Babel, la sola repuesta al antisemitismo es la revolusyon. No kyere romper kon la Rusia. Kuando su madre, su ermana, su mujer se van a instalarse en Fransya ande va naser su ija Nathalie, el se keda en Rusiya i eskrive: “So un eskrivano russo. Si no biviya en el puevlo russo, me kedariya de ser un eskrivano, seriya komo un pishkado afuera de la agua”.

Entremyentres toma varyas amantes, una de eyas syendo Evgenya Feigenberg, ke va ser mas despues la mujer de Iejov, kapo de la NKVD. Al kavo Babel va divorsar i kazarse de muevo, esta vez kon Antonina Pirojkova, ke va darle otra ija, Lydia.

Vyendo las matansinas de Stalin, Babel empesa de entender la sekana ke vyene. Al primer kongreso de los eskrivanos sovyetikos, en Moskva en agosto 1934, en prezensya de munchos eskrivanos ajenos komo Malraux, Nizan, Aragon i tantos otros, Babel sale: “Agora me ize un maestro de un djiz muevo: el silensyo”. Avlar ansina, ya era en vedra salir del silensyo i ya era muy sekanozo, porke keriya dizir: Entyenda kyen kyere…

Iejov, kapo de la NKVD, aze matar o embiyar al Goulag, uno dertas de otro, a los amigos de Babel, ke keda syego, o kyere kedarlo, sovre lo ke le puede afitar a el tambyen. En 1935, se va en Paris al kongreso antifasisto de los eskrivanos, lo ke podriya salvarlo si se kedava en Paris, ama no: se abolta en Rusiya. En 1938, Evgenya, la mujer de Iejov se mata, i su marido, de kapo de la NKVD ke era, se topa aferrado en 1939. Ovligado de avlar, Iejov denunsya a Babel ke el mismo es aferrado el 15 de mais 1939. Babel, el tambyen ovligado de avlar, atorga todo lo de kualo es akuzado (trotskismo, espionaje en favor de la Fransya i la Austria, ets). Es ke Iejov o Babel fueron torturados? Los ke vyeron el filmo de Costa Gavras “El atorgamyento”, ande Arthur London konta komo fue ke atorgo todas las falsas akuzasyones kontra el, saven de ke manera los akuzados eran tratados para obtener los atorgamyentos.

Despues Babel fue djuzgado en sekreto en vente minutos i fuziyado el diya despues, 27 de janvier 1940. Ama esto kedo sekreto; a la famiya disheron ke se aviya muerto en prezo el 17 de marso 1941. Penso ke fue la mizma koza para el povereto de Raoul Wallenberg, sözde muerto del korason en prezo el 17 de djulyo 1947, afillu si dainda ne se save lo ke le afito en vedra.

Iejov, ke aviya denunsyado a Babel, fue el mismo fuziyado una semana despues. No kale tanto yorar sovre Iejov: el es ke organizo la terror yamada Iejovchina de su nombre, ande  mataron a kaji 750.000 ombres de un kurshum en la kavesa, en la mayoriya de los kavzos sin razon, djusto para tener los quotas.

Por lo ke es de Babel, no se save muy byen lo ke izo el mismo durante la gerra sivil a la kuala parytisipo de manera aktiva.  Lo ke parese, es ke fue a la vez, en todo kavzo al empesijo, un revolusyonaryo konvensido, i un djudyo de korason afillu si no era relijyozo.

Aki desharemos el povereto de Babel, dizyendovos ke para avlarvos de el lavori de una parte sovre Wikipedia, i de otra parte sovre un artikolo de Ada Shlaen en el sityo h@keshet.

solomon_mikhoelsI agora vino el tyempo de  avlarvos de uno de los mas grandes aktores del teatro yidisch, Solomon Mikhoels.

Kuando nase en la sivdadika de Dvinsk (oy Daugavpils) en Lettonia, en 1890, se yama dainda Shloyme Vovsi. Empesa estudyos de derecho en San Petersbourg, ama despues de la revolusyon de 1917 desha sus estudyos para entrar en 1918, a la edad de 28 anyos, en el teatro yidisch de Alexander Granovsky, teatro ke en 1920 se aze en Moskva “Teatro djudyo de Estado”. Komo tyene un grande talento, vyene a ser el aktor prinsipal i en en 1928, a la edad de 38, el direktor.

Djuga Tevye el suchi, Bar Kohba, i munchas traduksyones, komo por egzemplo El Rey Lear, de Shakespeare, ke djuga en una traduksyon en yidisch.

Ofisyalmente, por siguro, es en favor del rejimen sovyetiko, ama el regimen sovyetiko, es Stalin, i kon el dinguno puede ser siguro de no ser aharvado. Esto dicho, Michoels sostyene Stalin durante la gerra kontra los Almanes i es elijido en 1942 prezidente del Komité antifasisto djudyo. Komo tal, viyaja en el mundo entero para azer rekonoser la barbariya nazi i ayudar i sostener a la URSS. En Amerika, enkontra (entre otros) a Einstein.

Despues de la gerra, obtyene en 1946 el premyo Stalin por su rolo en una piesa, Freylechs (alegriya).

Ama la vedra es ke Stalin no kyere mas deshar ke Michoels viyaje; serra el teatro djudyo i todos los myembros (salvo dos) del Komité antifasisto djudyo van a ser aferrados i seran matados.

Por lo ke es de Mikhoels, ofisyalmente se muere en un aksidente de araba en janvier 1948. En vedra savemos oy ke a sido asasinado por orden direkto de Stalin.

Esto dicho, syendo su glorya, va tener enterramyento ofisyal de estado…

I despues de Michoels, me keda de kontarvos lo ke se yamo la noche de los poetas asasinados. En la noche del 12 de agosto 1952, 13 eskrivanos djudyos, la flor de la poeziya yidisch, van a ser fuziyados en djuntos.

Es muy yuch de aprovar de dar una eksplikasyon sovre la manera en ke Stalin dechido de atakarse a los djudyos, porke Stalin se atako a miles de djente sin ke nunka se sepa deke. Dainda oy no se save deke Wallenberg fue afferrado.

Una sola koza es sigura: Stalin era antisemit. Soporto los djudyos tanto ke lo ayudavan, vyendo en el el kapo de la gerra kontra los Almanes, ama del diya ke penso no tener mas menester de eyos, ya bolaron.

Las kozas no se izyeron de un diya al otro. Ama ya vitesh ke Mikhoels, ke se iva en el mundo entero del tyempo de la gerra, no fue mas otorizado a salir de Rusiya despues de 1945.

Esto dicho, es vedra ke en primer, Stalin sostuvo el estado de Israel, en 1947 en votando para su kreasyon, en mais 1948 en syendo el primer estado a rekonoser Israel de jure (los Amerikanos aviyan rekonosido Israel tres diyas antes, ama solo de facto). I despues sostuvo la armada de Israel en permetyendo a la Tchekoslovakiya de vender armas a Israel, lo ke lo salvo frente a syete armadas arabas venidas para destruirlo.

Stalin pensava ke Israel se iva azer una demokrasiya popular i seriya un primer punto komunisto en el Medyo oryente. I yo me akodro ke dainda en 1955 en el kibuts ande me topava para lavorar en las vakansas, los haverim del kibuts, de vanda hashomer atsair (partido mapam, oy diriyamos meretz) se keshavan ke el governo mapaï de Ben Gurion no aviya echo de Israel una demokrasiya popular komo la Bulgariya o la Polonya.

I es vedra ke el estado de Israel, malgrado el ayudo de la Rusiya, se aserko muncho mas de los Estados Unidos, lo ke arravyo a Stalin. Esto es vedra, ama vos akodro ke Israel fue rekonosido por Stalin en mais 1948, kuando un Babel ya aviya sido fuziyado de 1940 o un Mikhoels asasinado de janvier 1948. Lo ke kyere dizir ke Stalin ya aviya empesado una politika antisemit mismo antes de sostener a Israel.

Komo lo dishe, las kozas de izyeron a poko a poko.

Despues de la muerte de Mikhoels, el Komité antifasisto djudyo empesa de ser atakado. Le es demandado de sostener la ida de los djudyos verso el Birobidjan. Peretz Markish, ke despues de la muerte de Mikhoels es el kapo del komité, refuza ke su puevlo, despues de tantas sufriyensas durante la gerra, sea agora arrankado de sus raises.

El 21 de novyembre 1948, el komité es serrado. Todas las gazetas yisisch son proibidas, el editor yidisch Der emes (la vedra) es serrado. Los intektuales djudyos ya entyenden ke son bolados i van a ser aferrados. I de fakto lo van a ser unas kuantas semanas despues.

Entre desyembre 1948 i janvier 1949, los myembros del komité antifasisto son aferrados, inkluendo Lina Stern, una mujer de alto nivel syentifiko, myembro de la Akademya de siensyas de la URSS.

peretz_markishEntre los aferrados, el mas famozo es el poeta Peretz Markish. En la Rusiya de este tyempo, es un grande nombre, afillu si eskrive lo mas en yidisch. Es kuvyerto de onores, ama esto no lo va salvar. Aferrado en janvier 1949, matado en agosto 1952 en el famozo prezo de la Lubianka, va tener de soportar tres anyos i medyo de torturas i de prezo, sin nunka desharse abatir.A su proseso, refuza de atorgar kuakyer krimen, a la kontra el es ke akuza a sus djuzgos, ke lo kondanan a 25 anyos de prezo. Ama Stalin troka la kondanasyon en kondanasyon a muerte.

Va ser matado de un kurshum en la kavesa, i kon el dodje otros. Eran 15 aferrados. Uno se muryo en prezo antes de ser djuzgado i kondenado. I por lo ke es de Lina Stern, premyo Stalin, es la sola a no ser kondenada a muerte. Es kondenada a 5 anyos de prezo, ke no va azer en entero porke va ser salvada por la muerte de Stalin en 1953 i liberada. Eya va bivir asta los 90, en 1968.

Kale dizir ke esta mujer, nasida en Rusia, vino chika en Suisa ande se izo profesor de biokimiya en Genève. En 1925, dechida de ir en Rusia para partisipar a la revolusyon bolshevika, i esto malgrado sus amigos dizyendole ke iva ser deportada en Siberia. Esto para amostrarvos kuanto estos kondenados de 1948 eran puros idealistos i, por siguro, no meresiyan la suerte trajika ke tuvyeron.

No vos puedo avlar de kada uno de los tredje dezmazalados. Vos dishe dos byervos de Peretz Markish. Un otro era el eskrivano yidisch David Bergelson, nasido en 1884. El tambyen no biviya mas en Rusiya, ama en Berlin, asta la venida de Hitler al poder. El tambyen se abolto en Rusiya, aya milito komo komunisto, i aya muryo kon los otros.

Lo mismo va ser de David Hofstein, nasido en Ukranya en 1889. El ke eskriviya al empesijo en yidisch, ama tambyen en ebreo, ruso i ukranyano, despues de la revolusyon de 1917 va eskrivir solo en yidisch. Va morar en Palestina en 1923, ande eskrive de muevo tan en yidisch komo en ebreo.

Abolta en Kiev en 1926 por amor del komunismo. Komo los otros, es aferrado i matado.

I los otros? Teniyan nombre Leib Kvitko, Itzik Fefer, Benjamin Zuskin, Solomon Lozovsky, Boris Shimeliovich. Fueron mal rengrasyados por Stalin de tener kerido ser komunistos.

Al djueves ke vyene, si kyere el Dyo!

Edmond Cohen
Paris – Fransya

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: