Cristobal Colon

Por:
- - Visto 1066 veces

El treser festival de las culturas djudiyas, ke va tenerse en la sigunda mitad del mes de djunyo proksimo, va ser dedikado a los djudyos de Evropa i a sus viyajadores, de Maimonides a Joseph Kessel.
Yo mismo, si kyere el Dyo, avlare en este festival,  el vyernes 29 de junyo, de Binyamin de Tudela, viajador djudyo del dodjen siglo, ke konto sus viyajes en Evropa i en el medyo-oryente en un livro en lashon ke mos kedo.

Ay un viajador muncho mas konosido ke Binyamin de Tudela, se yama Cristobal Colon en espanyol, Christoforo Colombo en italiano, Christophe Colomb en franses, Christopher Columbus en ingles. Si, ama me vaj a dizir: este no era djudyo, deke avlar sovre el? I es vedra ke ofisyalmente, no solo ke no era djudyo, ama ke era un katoliko muy sufu kon un nombre muy kristyano, syendo ke Christoforo kyere dizir el ke yeva el Kristo.

I por tanto, ay munchos istoryanos, i no todos djudyos, ke pensan ke puede ser Cristobal Colon era un djudyo eskondido o sino un katoliko de orijen djudiya.


Por esto yo pensi avlarvos de el, afillu si, no syendo istoryano, o en todo kavzo istoryano de esta kestyon, no tengo la ozadiya de pretender darvos aki las provas de ande nasyo Cristobal Colon, ni de ambezarvos ke era o ke no era djudyo.

Kale dizir ke mismo los ke ven en Colon un ombre de asendensya djudiya, no son de akodro entre eyos sovre sus orijenes.Los unos lo ven djudyo portuges, otros djudyo genevoze de orijen espanyola, otros djudyo haliz genoveze, ets

Antes de darvos los argumentos, kualo savemos sovre este navigador, ke yego a Amerika sin saverlo, siguro asta su muerte en 1506 ke aviya yegado en las Indyas?

Es el uzo de dizir ke Cristobal Colon es el ke deskuvriyo Amerika.  En vedra, los primeros ke deskuvriyeron Amerika fueron los ke yamamos los Indyos, venidos de Asia ay unos 12.000 anyos.

I mismo si avlamos de los Evropeos, el primer Evropeo a yegar en Amerika parese ser Leif Eriksson, marinero viking orijinaryo de Norvejya, ke partyo del Groenland en el anyo 990 i yego  en el Labrador i enTerre- Neuve, en un lugar yamado oy el Anse aux Meadows, ande los arkeologos toparon en 1961 ocho kazas vikings. Este lugar fue inskrito en 1978 por l’Unesco al Patrimonyo mundyal de la umanidad. Leif Eriksson se kedo aya un invyerno, i despues se abolto en el Groenland kon uva i lenya.

cristobal_colonKale dizir tambyen ke Colon deskuvriyo Amerika sin saverlo, porke el pensava aver yegado a las Indyas. Asta su muerte, nunka penso aver deskuvrido un muevo kontinento entre Espanya i las Indyas.

Esto dicho, kale render esta djustisya a Colon ke el fue el primero ke tuvo la ozadiya i el koraje de bushkar el kamino de las Indyas por el oeste, i ke el es ke, de esta manera, troko la istorya entera de muestro mundo.

La istorya ofisyala mos dize ke Cristobal Colon nasyo Christoforo Colombo en Genova en 1451, uno de las sej kriaturas  de un lanadero yamado Domenico Colombo.

Los istoryanos an topado munchos documentos mas o menos ofisyales yamando a un Cristoforo Colombo.

I  Colon el mismo, en un akto en favor de su ijo Diego el 22 de febrero 1498, dize ke vino de la sivdad de Genova i ke aya nasyo.

Ama los ke no son konvensidos por estos dokumentos dizen ke se puede ser ke este Cristoforo Colombo de Genova no fuera la misma persona ke el Cristobal Colon de Espanya,de un lado, i de otro lado ke el dokumento ande Colon dize venir de Genova puede ser sea mentirozo, sea falso. Si Colon era un djudyo eskondido, es natural ke diga mintiras i ke eskonda munchas kozas, i ke pareska katoliko sufu para enganyar a la Inkizisyon.

Esto es lo ke aze el yuch del kavzo Colon. Dokumentos ya tenemos, ama en tyempo de Inkizisyon ande kada uno se eskonde i dize mintiras, no se puede ser siguro de nada.

Kale dizir tambyen ke la istorya ofisyal de Colon es un haliz romanso de aventuras. Se dize ke a  la edad de 15 anyos se fue de su kaza i se izo marinero; ke en 1476, dunke kuando teniya 25 anyos, su nave fue atakada i batireada por los piratos i ke se salvyo en nadando sovre diez kilometros, kon el ayudo de un pedaso de madera, asta las oriyas del Portugal. Esto es la manera admitida por la istorya ofisyala en ke el genoveze Colombo entro al Portugal.

Ke aviya echo entre 15 i 25 anyos? Ande estava? No se save muy byen. Unos dizen ke se fue en Islanda i ke aya se ambezo la istorya de Leif Eriksson…Ama en vedra no se save, i el no konto muncho.

Se konta tambyen ke lucho kontra los Genovezes en una bataya maritima. Esto es un argumento de los ke dizen, kon otras razones tambyen, ke no era genoveze, sino no se uvyera batido kontra su patria.

Aya en el Portugal se fue ande su ermano chiko Bartolomé ke era kartografo en Lisboa. Se dize ke aviya munchos Genoveses en Lisboa en estos tyempos. Se dize tambyen ke munchos kartografos eran djudyos.

I aya en Lisboa, en 1479 se kazo kon Donya Felipa Perestrelo e Moniz, ija del konkistador de las Islas Madeiras, Bartolomé de Perestrelo.

Komo este ajeno, ijo de lanadero, pudo kazarse kon una mujer de alta noblesa, lo ke no era posivle en estos tyempos?  Esto es uno de los misteryos de su vida.

De esta mujer tuvo en 1480 un ijo yamado Diego, i sinko anyos  mas dospues, en 1485,  esta mujer se muryo.

Colon se consolo kon otra mujer, una Cordoveza yamada Beatriz Enriquez de Arana, ama nunka se kazo kon eya, ke por tanto  eya tambyen le dyo en 1488 un ijo, Fernando Colon, ke sera despues el biografo de su padre, viyajando kon su padre verso Amerika en su kuatren viyaje.

Vos diré tambyen ke Colon eempeso por demandar su ayudo al rey de Portugal kon su idea de ir a Indya por el kamino del oeste. Los ekspertos del rey le disheron ke esta idea no era realizavle. Admitiyan ke la tyerra era redonda, ama pensavan ke la distansya entre Asia i Espanya era larga demaziya i ke las naves no podriyan alkansar. De  syerta manera, son los ekspertos ke teniyan razon: no savyendo ke aviya un kontinento entre Espanya i las Indyas,  es vedra ke dinguna nave podiya irse sin eskala de Espanya asta las Indyas. Ama Colon se yerro sovre la distansya entre Espanya i Indyas. I se yerro muncho, pensando ke las Indyas eran serka. Es este yerro, finalmente fekundo, ke le dyo la ozadiya de partir, ama es tambyen por este yerro  ke nunka entendyo ke no eran las Indyas ke el aviya topado. Para el, de topar estas tyerras ande las topo era finalmente normal.

Vyendo ke no pudiya konvenser el rey de Portugal, Colon se fue a ver en 1486 a los reyes catolikos Fernando de Aragon i Isabel de Castiya. Ama es solo en 1492 ke los reyes, en lo ke se yamaron las kapitulasyones de Santa Fe, le dyeron su akodro para esta ekspedisyon.

Aki no es mi intensyon de kontarvos toda la vida de Colon, i de sus kuatro viajes, afillu si esta istorya es muy muy interesante, porke el sudjeto de la emisyon syendo solo de bushkar si se puede pensar ke Colon era djudyo o de orijen djudiya, vos tengo solo de avlar de su vida kuando  interesa muestra peshkuza.

Ay dos kozas ke mos enteresan de este punto de vista:

1°) Komo se yamava muestro amigo?

Si su nombre era Cristoforo i su alkunya Colombo, nasido en Genova, deke los Espanyoles syempre lo yamaron Cristobal Colon? I por otra vanda, si se izo konoser en Espanya komo Cristobal Colon, deke dos bulas papales de los 3 i 4 de mayo 1493, una vez ke Colon a aboltado de su primer viyaje, lo yaman Cristofom Colon?

Cristofom es un nombre ke no es ni espanyol komo Cristobal, ni genovese komo Cristoforo, ama portugues, kon una tilde portugeza sovre el sigundo o de Cristofom. I Colon no es la alkunya de muestro genoveze en Italya, pais ande eskrive el Papa.

Por siguro, va ser interesante de ver komo muestro navigador se yamava el mismo kuando sinyava sus eskritos.

Es pekado ke estamos a la radyo, porke no vos puedo amostrar su sinyatura, muy espesyala. En primero las letras misteryozas S, debasho SAS, kon puntos entre eyas, debasho XMY. I mas debasho Kristoferens, kristo syendo eskrito en abrevyado kon karakteres gregos, kijo dizir X majuskulo i despues r i o minusculos. El r grego minuskulo se eskrive p. I despues FERENS en majuskulas latinas.

Kale adjustar ke el nombre Kristoferens se topa entre dos karakteres yamados colon i semi colon, diriyamos en franses point et point-virgule, kon esta diferensya ke el colon se eskrive komo deux points en franses, i el semi colon komo point barre en franses.

Dunke el ke save meldar el grego i el latino melda Christoferens Colon.  De Colombo no ay seda.

Por esto es ke syertos istoryanos se demandan si este Colon era el genoveze ke diziya ser.

Tenemos la biblioteka de Colon kon sus livros anotados de la mano de Colon el mismo. Colon anotava en espanyol o en latino, nunka en italyano, ke por tanto, si uvyera nasido en Genova i bivido sus 15 primeros anyos aya,  deviya ser su lingua maternala.

Mismo kuando un italyano le eskriviya en italyano, Colon le respondiya en espanyol.

Otra koza: a kada vez ke Colon deskuvriyo una isla o una tyerra, les dyo un nombre espanyol o portugues; Nunka un nombre italyano.

Kuryozo genoveze ke no avlava genoveze, ke izo kombates kontra los genovezes, i ke nunka dyo nombres italyanos a sus deskuvyertas.

Syertos dizen ke Colon era un portugues. Otros ke era espanyol de Castiya, otros dizen de Catalunya.

Agora mos vamos a kedar kon esto. Mas despues aboltaremos a esta kuestyon kuando vamos a estudyar los argumentos de los ke pensan ke era djudyo.

2°) La segunda kuestyon interesante es: Ya savemos ke Colon bushkava el kamino verso Asia por el oeste. Ama kualo bushkava en indose en Asia? El oro? El poder? Kristyanizar a los Indyos? O otras kozas tambyen? i kualas kozas?

Me parese siguro ke Colon bushkava oro i poder, syendo ke konosemos las kondisyones de Colon por las “Kapitulasyones de Santa-Fe, firmadas el 17 de avril 1492: Colon kyere ser “Almirante de la mar Oceano”, virrey (vice-roi) i guvernador, i guadrar diez por syen de todas las rikezas ke topara.  Ama para konvenser a la reyna, Colon le amostro ke podriya kristyanizar a los Indyos.

Esto dicho, se save por la biblioteka de Colon i sus anotasyones ke meldava i estudyava muncho la Biblia, i lo mas los profetas.

Se save tambyen ke tomo kon el en su nave un djudyo para ser tardjuman del ebreo.

Esto i lo ke eskrivyo mos da a pensar ke bushkava puede ser tambyen dos kozas: el Gan Eden, i Yerushalaim.

I se save tambyen ke no son tanto los reyes katolikos ke ayudaron a Colon kon la para, ama djudyos konversos, el mas konosido syendo Luis de Santangel, al tal punto ke kuando Colon topo tyerra, es Santangel el primero a kyen lo izo saver, antes de los reyes mismo.

No kale olvidar, en esto todo, ke los reyes, por un edikto del 31 de marso 1492, aviyan ordenado la ekspulsyon de todos los djudyos de Espanya dentro de kuatro mezes, despues de kualo kada djudyo topado en Espanya seriya punido de muerte. El ultimo tyempo para fuir d’Espanya era dunke el 31 de julyo, ama se dize ke se pudiya dainda merkar dos diyas de mas, lo ke mos trae al 2 de agosto, ke kaiya en diya de tish’a be av.

Se save ke Colon incho a sus tres naves, la Ninya, la Pinta i la Santa Maria, el 2 de Agosto, ama aspero la noche antes de irse, i se fue el 3, antes la salida del sol.

Deke asperar la noche, kuando todo era pronto i las naves yenas? Ay syertos ke pensan ke aviyan munchos djudyos ke se fueron en estas naves, a parte del tradjuman, i ke Colon aspero ke se eskape Tish’a beav antes de empesar su viyaje.

A este punto de esta emisyon, es tyempo de ver lo ke tenemos para pensar ke puede ser Colon era djudyo o de orijen djudiya, afillu sus ayres muy katolikos.

Tenemos su livro de navigante (no el orijinal, ke se pedryo, ama una kopia) i vemos ke este grande katoliko no dize nada un diya komo el 25 de desyembre, ke es navidad. Kaji nunka avla de Jesus, ama solo de muestro senyor…

Si no avla de Jesus, a la rovez kuando konta los anyos, dize ke los konta “a la manera de los djudyos”.

Ay tambyen otra koza. En las letras ke Colon eskriviya a su ijo bohor, Diego, metiya arriva de la oja una koza ke malorozamente, a la radyo no vos puedo amostrar, ama ke se asemeja a lo ke eskriven los djudyos sufus al empesijo de kada oja ke eskriven. Asigun el ke topo esta partikularidad en 1930, podriyan ser las letras ebreas beth he, por baruh hashem, bendicho el Dyo. La vedra es, si miraj a esta koza, ke podriya ser lo ke kerej, ama es vedra ke, kon la Inkizisyon, no era posivle para Colon de eskrivir ostensivlemente en ebreo, mismo en unas letras a su ijo. Ama yene vyene kuryozo esta kozika en kada letra a su ijo i no en las otras.

Por estos todos detayes ke no son provas ama ke vyenen kuryozo, un Salvador de Madariaga eskrivyo un livro sigyendo la idea ke Colon nasyo en Genova, ama en una famiya djudiya espanyola ke se aviya fuyido de Espanya en el anyo 1391, anyo de terrivles matansinas de djudyos en Espanya. Por esto es ke Colon, por genoveze ke era, no avlava italyano ama espanyol.

Simon Wiesenthal no es konvensido porke se demanda, si su famiya se fuyo en 1391, deke Colon se abolto verso el peligro espanyol.

Bueno, me vo kedar aki porke ya vino el tyempo para mi de eskapar esta emisyon sovre este punto de interrogasyon.   Socrate diziya: “Todo lo ke se, es ke no se nada.” Kale tener la umeldad de dizir no se, kuando no se save. I kreo ke oy en diya, afillu si ay kozas kuryozas i argumentos para dizir ke Colon era djudyo o a lo manko teniya orijenes djudiyas, las provas no egzisten, i dainda no puedemos estar siguros de nada. Ama los istoryanos no eskaparon de bushkar.

I, al kavo de todo, tyenen un poko razon los ke dizen ke lo importante no es de saver si Colon era djudyo o no, genoveze o no, lo importante i lo siguro es ke deskuvryo a un muevo kontinento ke iva ser Amerika. Nada no es!

Agora mos keda solo de kantar muestra kantika kuando el rey Nimrod…

Esto dicho, vos digo al djueves ke vyene, si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: