DE LA TADRE A LA NOCHE
Miro al horizonte.. El disco colorado va desaparecer
en las aguas del calmo Marmara.
Se abraza el sielo, es la hora de las ventanas insendiadas
por las flamas de la tadre.
Es la hora del ritorno de los barcos aserkandosen sin bruido.
Los peshkadores entran al chico puerto.
Los veygo mover avagar, no se les ve la kara..
Empeso el reignado de la Solombra.
Es la hora del paseo de los namorados kansados del diya,
Los veygo caminando mano con mano..
A vezes se abrasan en un largo bezo enserrados en sus mundo Etranjeros a lo ke no son eyos…
Es la hora del reposo del parko.
El vedre no es mas la color insolente…
Los pasharos se kayan
Es un profundo silencio en el fresco,
las palomas aunflan sus plumas
Se aserkan en sus amistades escondidas
Es la hora que leshos del esuenyo me topo sola con mi misma
Amorosa appasyonadamente de mi pasado mismo si no estas.
Quien sos ? Que es tu nombre ? Sos tantos !
El pesgo de un recuerdo en mis ombros.
Sharope blanco
[email protected]
Artículos Relacionados: