Djohá, provetiko i dezmazaladiko, visto ke no pudía mantenerse de las kantikas ke él mizmo eskrivía i kompozava, dava lesones de múzika a unos kuantos ijos de famiyas rikas.
Un día uno de sus elevos, antes de la lesón, le disho: “Maestro Djohá, ay unos kuantos días kada demanyana, antes del dezayuno, ampesí a bever un guevo krudo. Me disheron ke esto me ermozeará la boz.”
Djohá le respondió: “El guevo krudo no aze mal, bévelo.”
Pasa una semana, el elevo ke viene a topar a su maestro, le dize: “Maestro Djohá, mi mamá me disho ke mi boz se ermozeó muncho, dizde ke ampesí a bever kada demanyana un guevo krudo antes del dezayuno. Penso ke i tú estás del mizmo avizo.”
Djohá ke ke aga? El mantenimiento prima. Se estuvo kayado. Ma kuando el elevo ensistió para saver lo ke pensa de su boz, Djohá le respondio: “Muy bien, bévelo. No aze mal.”
Ansina un tiempo dospués, Djohá, enfasiado de oyir a su elevo bovo i de boz sin dingún shuni, preguntarle la mizma kestión, no puido mas, se inyervó i en gritando le disho: “Azno, ijo de un azno, si el guevo tenía esta fakultá mirakuloza, la gayina iva chuflar kada demanyana komo los bilbilikos, aziendo el guevo…”
Kontado por SELIM SALTI – 2013
Redaktado por Matilda Koén-Sarano
Artículos Relacionados: