Fue la semana pasada….. Esto kale ke vos konte ! Ya vos aviya kontado akel diya de luvya en New York ! Ke desgrasya…Ama ya ezbafi kon vozotros i dospues me sinti muncho mas mijor 🙂 Spesyalmente dospues ke konti los filmos ke viyamos en Orly i ke kadar me plaziya Yehoram Gaon….Para los ke keren akodrarsen :

La Luzya De New York I De Lod

Vos aviya dicho ke un diya vo avlar del shouk de Lod. Si, i esto vos va kontar ma en primero lo ke afito el martes pasado antes de Roshashana….

Fiesta…….Kale fiestar…..I ke es fiestar ? Fostan muevo kon organza i fiyonk i kalsados de dantela sin burako en las vandas ademas si estas en New York kuando ay luvya porke sino te parese ke estas en Yafo i estas metyendo los piezikos kansados en el bodre de la mar en akeya kalor ke te desha sin soluk ! I para topar una gazoz kale ke kamines finaaaaaa aya, sino te arankan las parayikas en los kafes ande se van los musyus i las madamas kon las aldikeras yennas !

No es ke yo no tengo parayikas ma no se los va dar a estos sin verguensa ke keren para una gazoz presyo de un kilo de bananas ! Noooo ! No va ser yo ke les vo dar a ganar sin ke lo mereskan !

Ayyyyyyyy ke luzyor de fostan ! Estava kon Kaden kuando lo vi por la primera ves…. Kualo ke vos diga ! Me kayeron las bavas…. Estava ayi en la vitrina ensima de la dama de plastik ! Estas ke meten en las vitrinas para amostrar los vistidos ! Una lokura de fostan. Me namori del fiyonk entre las nuvlas de organza ensima de las mangas. Un fostan de fiesta ! I ke ermoza kolor ! No komo el zurzuvi ke se va vistir Kaden para ir ande su tio noche de mued….Por siguro ke no ! Un roz dulse komo las trandafilas de la guerta de Sultanika.

Ma, komo lo puedesh imajinarlo, estava kara a su onor ! Agora, meter este fostan kon kalsados pretos no va ! I yo me merko kalsados pretos siempre para ke vaygan kon todo ! Kale merkar una bolsita i kalsadikos para este fostaniko…. I akeyos los vide en el magazen de allado ! Ke ermozura !

Komo ke se lo diga a mi mama ke los kero tanto ? Yo se ke va vazyar la kumbarayika arriyento del bufe, en el sigundo raf a la derecha, para merkarmelos todos i esto no lo kijiera ! Kualo ke aga yo agora ?……

Pensi bueno i me desidi de avlar kon el musyu del magazen…. Le iva dizir ke ya esto pronta yo de lavorar un meziziko para akel fostan i si me da las parayikas tambien de los kalsados i de la bolsa del magazen de allado….Deke no ? Ya valen la pena ! Ansina pensi i ansina lo ize !

Me fui a la demanyana antes ke todos empesen a vinir. Afilu ke lo asperi en la puerta para ke avra el magazen ! Kuando vino le ize una soriza fina la otra vanda de mi karika i le dishe lo ke teniya en el korason. Savej ke me disho ? Ay mi madre bendicha ! Ya lo esto bolando parese ! Me disho ke yo so una ijika muy intelijente i muy buena i ke el me va regalar el fostaniko i los kalsados !

Komo puede ser ? Yo no lo aksepto ! I se lo dishe. Alora me disho ke el siempre regala ropas antes de las fiestas a la djente i este anyo es yo ke gani el regalo ! Lo ke me allegri…Lo ke me allegri ! Me echi en sus brasos i empesi a bezarlo en las karikas…Ke buena persona ! Ke mazal ke yo gani este anyo su regalo ! Komo loteria ! Si era otra ijika ke iva vinir a su magazen por el fostan iva ser eya ke iva ganar la loteria del magazen ! No saviya ke era tan mazaloza !

Me lo izo un paketo de fiesta el fostaniko i los kalsados kon la bolsika ke fue a merkar en el magazen de allado i me lo dyo en la mano ! Le dishe “mersi muy muncho” i sali de aya koryendo, komo una lokita, a mi kaza, para kontar lo ke me afito de bueno a mi madre…..Ke gani en la loteria del magazen !

Nunka me vo olvidar de este Roshashana i ke kadar de elegante yo estuve en la fiesta ! Ya so luzya i agora se ke so intelijente i buena i mazaloza tambien. Ya me lo disho el musyu kon el korasoniko de oro !

Sharope blanko

No hay comentarios

Leave a Reply

Artículo anterior90 años del Centro Israelita Filantrópico
Artículo siguienteTeatrikando: Falleció la gran Fela Fábregas
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.