De entre las sinagogas de la komunidad sefaradi de Yerushalayim merese una mension el chiko i ermozo kal “Olei Bursa”, yamado por todos “el kal de los bursalis” i ke se topa en la kaye ‘Haneviim en esta sivdad. El fue fondado, en 1933, por un grupo de orijinarios de la sivdad de Bursa en Turkia, algunos de entre los kualos ya bivian en Yerushalayim ainda kuando esta sivdad se topava basho el rejimen del Imperio Otomano, ansi ke por sefaradis ke avian echo sus aliya a la Tierra Santa poko antes de la fondasion del Estado de Israel.
Entre los fondadores de este kal puedemos mensionar a los Srs. Yaakov Benmeleh, Yitshak Benmeleh, Yaakov Saban, Moshe Tovi, Haim Navon i otros mas, todos “bursalis” o desendientes de famiyas orijinarias de Bursa. Uno de los butos de los fondadores era de dar un apoyo a los muevos emigrantes ke vinian de Turkia i se aresentavan en Yerushalayim
La Sra. Rahel Benin ke era la proprietaria del edifisio onde se topa el kal, aksepto la demanda de los gabaim de alkilarles el lugar para transformarlo en sinagoga, a kondision ke konmemorarian su memoria despues de su muerte – lo ke es echo asta oy dia. La Sra. Benin les alkilo el edifisio por la suma de una lira al anyo i les aregalo un almario ke tenia en su kaza i ke sirvio de Aron Akodesh.
En 1972, despues de la muerte de la Sra. Benin, su ijo, ke morava kon eya en la mizma kaza, se adreso al tribunal afin de anular la prometa de su madre a los gabaim, ke podrian kontinuar a uzar el edifisio komo kal. Es despues de largos i duros debates ke el Sr. Benin les dio la permision de kedar ayi por siempre.
El kal de “Olei Bursa” fue durante largos anyos un sentro muy aktivo ande tuvieron lugar fiestas i alegrias ansi ke enkontros familiales en los kualos se konosieron munchos djovenes i djovenas. De estos enkontros salieron, a vezes, espozorios i bodas.
En desparte de dar servisios relijiozos a los yehidim este kal fue tambien uno de los lugares sekretos onde se eskondian armas i otros medios de kombate del Irgun Tsvai Leumi (Etsel), una de las organizaziones klandestinas ke lucharon kontra el governo mandatario inglez, asta la kreasion del estado en 1948. Es en este periodo ke fue arestado por la polisia ingleza el ijo bohor del gabai Yaakov Saban, Refael, ke era uno de los komandantes del Etsel en Yerushalayim. Un otro ijo de este gabai, Yeoshua, fue matado en 1947, en Tel Aviv, en un atako kontra los inglezes.
Por la teva de este kal pasaron hazanim komo Moshe Vital, Yitshak Mizrahi, Yona Yinnon i otros mas ansi ke el kompozitor Mordehay Halfon. El eskritor de estas linyas kumplio la mision de hazan entre los anyos 1956-1966.
Las orasiones son echas al uzo de los sefaradis de Yerushalayim i de Turkia. En la biblioteka de la sinagoga ay sienes de livros ke fueron regalados por los yehidim i tambien unos kuantos Sifrei Tora, en memoria de los fondadores i de los soldados ke kayeron en las gerras de Israel. Las kashas de estos Sifre Tora fueron dekoradas por el artezano Avraam Saban, ijo del gabai Yaakov Saban. En desparte de esto ay tambien diezenas de tabelas de konmemorasion entre las kualas una al nombre de Gil, ijo de Mishael Ben Meleh i inyeto del gabai Yitshak Ben Meleh, ke kayo sinko anyos atras, en un kombate kon los palestinianos, en la rejion de Ramalla.
Sovre la inisiativa del Dr. Yitshak Kerem, dos enkontros ke trataron de la komunidad de los bursalis en Israel tuvieron lugar en el Sentro de Kultura Joe Nissim, en el kuartier djudio de la vieja sivdad de Yerushalayim. Al primer enkontro ke tuvo lugar al prinsipio del mez de Djunio, oganyo, partisiparon investigadores de Estados Unidos i de Fransia ke oyeron por la primera vez una konferensia sovre esta komunidad.
Al segundo enkontro ke tuvo lugar el 26 de Djulio, en la sinagoga “Olei Bursa” partisiparon profesores de eskolas djudias en Estados Unidos. Eyos fueron resividos kon grande onor por los ermanos Ben Meleh i les fue dada una ancha informasion sovre la istoria del kal por el Sr. Avraam Saban. Los uespedes se despartieron muy kontentes i bien impresionados.
El Kal Olei Bursa ke se topa en el sentro de la sivdad es aktivo asta oy dia, prinsipalmente en los dias de Shabat, de fiestas i alegrias. Ayi kontinuan a vinir, mizmo de kuartieres mas aleshados, los ijos, inyetos i bizinyetos de los fondadores.
En estos ultimos tiempos estan teniendo lugar en Yerushalayim siertos dezvelopamientos urbanos i es posible ke sea derrokado el lokal ande se topa la sinagoga i las kazas a su deredor. Esperemos ke kon el tiempo se puedra fraguar para los bursalis una mueva sinagoga mas moderna i mas aktiva.
Artículos Relacionados: