Un mediko tenia una droga muy buena ke revivia la alma de la persona, i keria darsela a su ijo; pero disho en su konosimiento:
-Siendo tengo esklavos malos, si savran de este don tan luzio ke le do a mi ijo, les pezara muncho i aran ensenyos de matarlo para tomarsela.
¿Ke izo? Tomo un poko de tosigo, i puzo en la boka del kuti ke ayi estava la droga, i yamo a sus esklavos, diziendoles:
-Vos tengo amistad grande, i ansi, una droga tan buena ke ay tiempo ke la tengo gradrada, me plaze darvola si keresh vozotros resivirla.
Disheron eyos:
-Veremos ke modo de koza es.
Kuando kompesaron avrirla, ya se morian del golor del tosigo.
Disheron en su korason: ” -Si esta droga se la da a su ijo, se muere, i venimos mozotros i eredamos todo su reynado”. I ansi se izieron de los bovos, diziendole:
-Esta koza konviene ke le empezentes a tu ijo; i el salario muestro ke mos avias de dar en el tiempo ke te servimos, daselo a el por regalo djuntamente kon la droga.
—————————————–
Entre manaderos djenerales ya dichos, se nombra daynda el Zohar. El sukseso imajinario da ekzemplo de la shena del Sinai, kuando Israel aresivio la Ley (Ex 20), ke no kijeron otros puevlos, i los milagros ke pazaron. Ambeza ke al kodisiozo ay ke kastigarlo kon intelijensia. Se enkontra en el folio 187 b-c de muestro orijinal.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
Artículos Relacionados: