Nikolas Stavroulakis ke esta mensionado en este artikolo ‘From Spain to Salonika, a disappearing Shavuot tradition revisited’, mos konta sovre un pan espesial ke se azia para la fiesta de Shavuot, entre los djudios de Salonik (o tambien de otras komunidades de sefaradim). Este pan “artistiko” se yamava “el pan de siete sielos”.
Mi famiya, orijinaria de Salonik, se instalo en Erets Yisrael en 1934, i por lo ke rekuerdo, nunka fue servido ande mozotros un tal “pan de siete sielos”. Ademas, me parese, ke este uzo fue totalmente deskonosido (o olvidado) entre los sefaradim ke alkansi enkontrar durante toda mi vida en mi paiz.
The bread of the seven heavens contains many ingredients forbidden to the Catholics during Lent, such as butter, milk, and eggs, making it especially rich and filling. (Ronit Treatman/Times of Israel)
Antes muchos anyos (no menos de 60 anyos!) avia meldado un artikolo (en ebreo) sovre varyas kostumbres djudias al enkontro de Shavuot. Entre eyas, i el uzo de ornar en kaza un pan “dekorado”, i yeno de simbolos.
Avlando kon mis djenitores sovre las varyas kostumbres, bien me akodro ke no resivi ningun komentario sovre este uzo del pan de 7 sielos, ni se mensiono su nombre interesante. Ma, yo de mi parte ekspresi, en akea konversasion, mi opinion ke esta kostumbre rara es, al pareser, una ifluensia kristiana (o imitasion) del
“Sacramento” (el pan sakro ke simbola el kuerpo de Jesus, segun avia dicho el mizmo en la ultima sena, sitado en el livro de Mateo 26,28): “tomad, komed, esto es mi kuerpo”).
Aki, mi madre salto i me “kastigo” al punto, diziendo: “Porke pensar negativamente? Akodrate ke en la Tora (Shemot 24,22) mos eskrive: “I la fiesta de las semanas te aras, de las primisias de la segada del trigo”. Dunke, akel pan folklorista simboliza la rekolta del trigo, i nada mas!”
…I nada mas se avlo en kaza de mis djenitores sovre el pan de Shavuot.
Sovre el termino “siete sielos”:
En el Talmud (Masehet Hagiga, oja 12) ay una diskusion entre muestros hahamim en el tema “kuantos sielos ay en el mundo”. Rabi Yehuda disho: “dos sielos!” Esto lo disho bazandose sovre un pasuk en Devarim 10,14: “De Adonay tu Dio son los sielos, i los sielos de los sielos, la tierra, i todo lo ke ay en eya”.
Rabi Resh Lakish disho ke ay siete sielos, bazandose sovre los 7 sinonimes ke aparesen en la Biblia por el biervo “sielo”.
Agora, malorozamente, no tengo kon mi a mis djenitores ke me “opozen”. Ma, en mi umilda opinion, todas akeas diskusiones en el Talmud sovre “kuantos sielos ay”, o “sovre kuantos pilares esta fraguado el mundo”, es por kavzo de una influensia de los eskritos de los filozofos gregos kon sus teorias “sientifikas” sovre el mundo. Entiendo bien a muestro hahamim kon sus buena intension a amostrar al puevlo ke todo por todo ya esta eskrito (o al menos indikado) en la Tora.
Oy ya savemos todos ke el mundo no esta fraguado sovre pilares, etc. Dunke, me agrada el pasuk en el livro de Iyov (26, 6): “(el Dio) estiende el norte sovre lo vaziyo; enkolga la tierra sovre nada”.
En jeneral, en la tradision popular se mensiona a los siete sielos komo una metafora al mundo espiritual, ke mozotros, seres, echos de “basar va-dam” (karne i sangre), o komo en espanyol: “karne i gueso”, no podemos alkansar al fondo el signifikado.
Porke, mahsus, SIETE sielos? El numero siete djuga un grande rolo en el judaismo, empesa kon los 7 dias de la Kreasion, 7 semanas desde Pesah asta Shavuot, 7 Mitsvot de “Ijos de Noah”, 7 vakas godras en el suenyo de Paro, i mas i mas.
Para deskrivir alguna persona ke esta muy orozo, i “bolado de la alegria”, dizen (en ebreo): “el esta en el septimo sielo!”
Yehuda Hatsvi
Erets Yisrael
Artículos Relacionados: