El vapor ke mos esta yevando a mi nonno, mi ermaniko i yo ato sus kuedras al porto de Galipoli i estava asegurado. El kapitan del barko dyo el orden ke se puediya empezar a enkargar i a deskargar las kargas… Se puediya entrar i salir del vapor.
Papu Yako estava desesperado para yir a la kiyla de Galipoli i resar por la noche de oy. Dize ke va estar muy kontento de resar entre los ermanos sefaradim ke el konose de su chikez.
Esto observando ke la sivda de Galipoli es mas ermoza de Chanakkale.. Yokushes (asuvidas) por todas las kayes i avenidas . Se viya muncha limpyeza en todas las kayes.Mientras papu echava un paso, Yako i yo estamos echando 4 pasos i koryendo. Siiiiiiii porke muestro papu tyene 6 piyezes / 2 pulgadas de alto.
Yene otra vez, komo en Chanakkale, del puerto asta la kiyla, todos los sefaradis ke viyan al papu gritavan YAKOOO…YAKOOO, i mi papu enkantado de la vida suvyendo el braso i meneyandolo en el siyelo.
A la entrada de la puerta de la keila, papu mos alevanto ariva para pueder bezar la MEZUZA, Yako i yo somos muy chikos para yegar i meter
la mano ensima.
A la entrada era kostumbre de kitar los kalsados i desharlos en el pasiyo para no trayer dingun suzyo serka de la TORA.
Adentro la keila todos ke viyeron a YAKO LEVI pishin le disheron BEHAVOD a papu YAKO para ke meldara el servisyo de la noche, el mos yamo a la teva para ke estemos parados allado de el i SAVOREYAR EL ORGUYA DE SER DEDEEEE YAKOV.
Esto mirando al jigantesko shandeliyer ke esta enkolgado en medyo de la kiyla kon lagrimas de diyamantes enkolgados a su rededor. KE ERMOZURA… KE MARAVIYA… Primera vez ke teniya visto a mi papu meldando tan presto. Kuando vino de dizir la Shema me supliko ke la meldara yo… La Shema ya la saviya yo de kavesa kon mi bozizika ke me saliya dulse komo un sharope blanko de mi boka, la kanti istilo Chanakkaleli yavash yavash, despasiko despasiko…
Artículos Relacionados: