El Treno de Hidjaz

La konstruksyon del kamino feroviero para Hidjaz fue la ovra del Sultan Abdulhamit II, ke aviya reynado de 1876 a 1909. Abdulhamit seando una persona muy relijyoza, kijo enkorajar la union entre los puevlos muslumanos i enrezyar la kreyensya en Islam i el uzo de sus preseptos.

El buto prinsipal del Treno de Hidjaz, fue de establisir la koneksion entre Estambol, la Kapitala, i Hidjaz, el sitio del Kalifato del Islam i de Meka ande se topa el Sanktuario del pelerinaje de los Muslumanos. Aparte de esto, este proyekto tuvo por buto de integrar las provinsias arabas al Imperio, en kontribuendo en mizmo tyempo a sus desvelopamiento ekonomiko.

Un otro buto de este proyekto fue de fasilitar el transporto de la Armada Otomana, en kavzo de nesesidad. De este punto de vista, elTreno de Hidjaz  tuvo en mizmo tiempo, una importansa stratejika konsiderable.

Estambol seando unisada a Damasko de antes, kalia konstruizir un kamino feroviaro ke unisara Damasko a Meka. En efekto, la primera parte de su itinerario se alargo de Damasko fina el Porto de Akaba en la Mar Kolorada. Ansi, puedia entornar el Kanal de Suez i transferar la armada a esta rejion basho el kontrol de la Ingleterria. La segunda parte de su kamino arivo fina Medina, i de ayi, devia de arivar a Meka, kon la konstruksion de una tresera seksyon.

De punto de vista topografiko, la Tierra de Israel era la rejion la maz apropriada para unisar Damasko al Sude i de ayi a Hidjaz.

La konstruksyon del kamino feroviero para Hidjaz empeso en 1900 i fue realizado prinsipalmente por los Otomanos, kon el suporto i konsejo de la Alamania. Auler Pasha, ke era en akel tiempo konsejero militario de laAlamania,avia estimado ke kon la realizasion del proyekto, el transporto de los soldados otomanos de Estambol a Meka sera akurtado a 120 oras.

Aparte del governo, tres fuentes prinsipales fueron nesesarias para la realizasion del proyekto: Otomanos ke fueron obligados a furnisir fondos, Otomanos ke volonteramente izieron donasiones, i Muslumanos ke bivian ahuera del Imperio. El apoyo ke arivo ahuera del Imperio, prinsipalmente de Ayifto, de Iran i de la India, fue muncho mas grande de la kontribusion otomana.

Aunke se avia opozado al Sionizmo, el Sultan Abdulhamit aviya ansi kontribuado al desvelopamiento de la Tierra de Israel. Ainda en el empesijo de su reyno, Abdulhamit inisyo reformas para enrezyar ekonomikamente el Norte de la Palestina. En este buto, yamo a los farmeros de la Valeya de Yizrael, ke avian deshado de lavorar la tierra achakes de las taksas pezgadas del governo, de aboltar a sus lavoro, en prometiendoles de ser egzemptos de todo modo de taksa por una larga perioda.

De mizmo, restoro la sivdad de Bet Shean i los kaminos i los pontes ke yevavan ayi. Fraguo su estasion de treno en el itinerario del muevo kaminoferoviero. De este modo, despues anios de izolasion i abandono, Bet Shean i su environmente empesaron a ser povlado i la vida ekonomika empeso a arebivirse.

Ainda, en 1893, tres mezes despues ke la linya de treno de Yafo a Yerushalayim avia empesado a fonksionar, empeso en el Norte de la Palestina, la konstruksion de la linya del Treno de la Valeya, ke se iva alargar mas despues de Afula a Djenin i de ayi a Nablus.

Aparte de Bet Shean, munchas otras estasiones de diferentes dimensionas fueron fraguadas en el itinerario de este rede de kamino feroviaro.

Una de las fonksyones de estas estasiones, era de inchir de agua los depos de las lokomotives. Por esto, se topava en las estasiones una torre de agua de ande se transferava la agua. Kalia de mizmo, abasteser el karvon de kok para kayntar el motor del lokomotivo. El karvon fue trayido de la Turkia. Ma, despues de la Primera Gerra, fue el lenyo ke se uzo en este buto.

En 1902, se avrio la djonksyon de Damasko a Dera en la frtontiera entre Suriya i Yarden. Dos anyos despues, se avrio en Enero 1904, la djonksyon de 95 kilometros entre Hayfa i Bet Shean. Esta djonksyon konosida en tanto ke “Rakevet haEmek” – sinyifiando en Ebreo, Treno de la Valeya, se referava a esta parte de este kamino feroviero entre Hayfa i el Norte de la Tierra de Israel, i se alargava fin’a el Rio Yarmuk.

En Oktobre 1905, esta djonksyon fue alargada fin’a Dera ke ya era de antes unisada a Damasko. Entre los anyos 1900 i 1908, el kamino feroviaro de Damasko a Medine fue konstruido. En 1908 la konstruksyon fue aretada achakes de la Revolusyon de los Turkos Jovenos, i nunka su konstruksyon fina Meka fue kompletada.

Verso la Primera Gerra Mundial, Hayfa fue unida a Beer Sheva, i de ayi al Negev fin’a el Dezierto de la Penisula de Sinay, en el Sude. El buto fue esta vez, de pueder transferar lo mas presto posivle la Armada, en kavzo de un kombate kon la Armada ingleza sovre el Kanal de Suez.

Antes dw la realizasion del proyekto, los pelegrinos musulmanos estuvieron  viajando de Damasko a Meka, en karavanos de Gameyos. I este viaje estava turando en jeneral dos mezes, i era yeno de difikultades i perikolos.

El kalandario muslumano seando un kalandario lunar, la fiesta de Kurban, ke es la perioda del anyo por el pelerinaje a Meka, kaye en diferentessezones del anyo. A las vezes, se deve de viajar en temperaturas de frio i luvias fuertes en invierno, o en las kaynturas de atabafar de los deziertos.

Sivdades i sentros de abitasion eran dispersados i aleshados uno del otro, en el itinerario del pelerinaje. La rejion era povlada de trivos migratorios ostilos, de vendedores ambulantes i de oportunistos ke molestavan a los pelegrinos. El viaje en el treno era mincho mas barato, fasil i presto.

Achakes del menaso ke implikava a sus mantenimiento, los proprietarios de los karavanes no fueron kontentes de este proyekto, i atakos perpetrados por estos proprietarios i trivos beduinos estuvieron periklitando el viaje.

En 1910, un rebelion avia esbrochado en la sivdad de Kerak, en Hidjaz. Los trivos de la rejion ke eran responsables de la proteksion del treno, no teniendo resivido sus pagas, derobaron un treno en matando a unos kuantos de sus empiegados i destruyeron la estasion en Katrana i una partida de su kamino. En segito, la Armada Otomana intervino i egzekutio a siertos de los kupables i devasto la sivdad.

Es reportado ke en 1909, serka de 20.000 pelegrinos avian uzado este kamino. Este numero atenyo a kuaji 31,500 en 1914, i el numero total de los pasajeros arivo a 300,000.

Portanto, en akeos tiempos, asigun una kreensia, el pelerinaje devia ser realizado por karavanes de gameos asigun kel el Profeto lo avia echo. Por esto, el kamino fue munchas vezes yamado “La Pelegrinasion de las Mujeres“, seando konsiderado ser adekuato para las mujeres, aedados i hazinos.

El fakto ke el Treno de Hidjaz fue uzado por el transporto de los soldados otomanos kon sus munisiones fue la razon de los danyos ke le fueron kazvados por las fuersas de gerilla arabas, basho el komandamiente de T. E. Lawrence – konosido entanto ke Lawrence de Arabia – durante la revolta araba en la Primera Gerra Mundial (1914-1918). De este modo, los trivos arabos de la rejion pudieron vengarsen del Treno i gozarsen de muevo del revenido de yevar a los pelegrinos.

Despues de la repartision del Imperio Otomano, el Treno nunka no  fonksyono del Sude de la frontiera entre Yarden i la Saudia. Portanto, kon la kolonizasion djudia de la Valeya Yizrael, el kamino feroviaro sirvio a transportar materyel de fragua, materyel para sekar los marekajos. El Treno de la Valeya kontinuo a fonksyonar reguliaramente despues ke los Inglezos konkestaron la Palestina. I kuando los militantes israelis  izieron saltar los pontes enriva del Rio Yarden en el anyo 1948, en sus kombate kontra la dominasion ingleza, el Treno de la Valeya kedo de fonksionar.

De muestros diyas, munchas partes del Treno de Hidaz egzisten, i siertas de estas fonksionan. Por egzemlo es posible de viajar de Damasko a Amman en Yarden en su kamino orijinal, i en una otra parte de su prolongasion en el Sude.

Portanto, la mayoritad de su kamino esta destruida. Sus estasiones, kon sus salas i sus torres de agua estan en ruinas.

En los ultimos anyos, se formo en Israel un konsilio en el buto de restorar sitios istorikos. Uno de los proyektos de de este konsilio es la restorasion del kamino feroviero de Israel kon todos sus batimientos. En este konteksto, aparte del kamino feroviero, munchas de sus estasiones, kon sus torres de agua, pontes i salas fueron restoradas.

Kon los esforsos echos para establisir la paz en el Mediano Oriente, mos demandamos si sera posible de arebivir i de uzar de muevo el Treno de Hidjaz, ke sera sin duvdo una prova konkreta de la aspirasion por la ko-egzistensia pasifika i armonioza entre los payizes involvados.

———————————————————————

Niso Palti Behar
Revizido i editado por Gad Nassi