En esta sivda ke esto agora transijente/pasajero por una noche: GALIPOLI/GELIBOLU
Papu YAKO… mi ermaniko YAKO i yo kon 2 minyanes terminamos de meldar las orasyones de la noche i se oye las palavras HAZAK BARUH dirijidos a mi papu i a mi ke mildimos el servisyo entero (yo ke meldi solo la SHEMA).
Todos los kongregantes se reunyeron para echar lashon i oyir de uno al otro de los keridos ke se mudaron a ESTANBOL..
galipoliMi nona ANULA HALIYO i LEVI tyene aki en GALIPOLI toda su famiya, la ermana grande BEKI HALIYO GORMEZANO una tiya de 87 anyos de edad, primos, primas una MISHPAHA grande. El marido de BEKI, HAYIM GORMEZANO ke estuvo rezando kon mozotros mos abraso a YAKO I A MI kon una ternura ke nunka senti en mi chika vida. Mos disho el tiyo Hayim ke el teniya munchas ganas de konosermos i ke dava lores a Ashem de pueder abrasarmos…
En rumbo a la kaza del onkli HAYIM esto vyendo ke todas las kazas en esta sivda ya tyenen elektrisidad i las kayes estan buen allumbradas… esta muy ermozo, me esta agradando muncho la klares de los kaminos.
La kaza de la tiya BEKI se ve ke es una kaza de rikos. La kaza esta rodeada kon paredes de chimento, la puerta de la entrada al patyo i la guerta tyene komo 8 piyeses de altura echa de madera chinar/platano kon 3 dedos de mi mano de anchura.
Pishin ke entrimos a la guerta estamos viyendo a la tiya BEKI koryendo sovre mozotros i gritando “MI SALAMONIKO, MI YAKOVIKO”. En frente de mozotros se metyo los dizes/knees/genoux en basho, ensima del kaminiko del pasiyo yorando kon lagrimas de kontentes, alargo sus brasos, tomo la kavesa de mi ermano kon grande dulzura de madre i la metyo ensima de su pecho dizyendo : “ah mi ermana ANULA ke ermozuras de kriyaturas kriyates kon el poder del D..o.”
Dospues izo kon mi kaveza lo mizmo en su pecho, sinti el ardor de la mujer SEFARADIYA ke se komporta kon esta ternura MARAVIYOZA.
Artículos Relacionados: