Evidensia sirkunstansial

Por:
- - Visto 373 veces

Antes muchos anyos (no vos se dizir kuantos) uzava a divertirme en meldando livros de varios djeneros literarios, inkluye istorias de krimen i detektivos, empesando kon “Krimen i Kastigo” por F. Dostoievsky (aun ke era de djenero mas psikolojiko ke detektivo), i los livros de Edgar allan Poe, Arthur Conan Doyle i de Agatha Christie.

Pekado komo tan presto pasaron los anyos, i oy ya no tengo el tiempo, (o mijor dizir, el animo i la gana) a meldar istorias i novelas. I na ke en un jurnal del dia de viernes pasado meldi sovre el avokato americano Scott Turow, ke es tambien un autor famozo de livros de detektivos i de djuzgos interesantes, i ke esta en estos dias en viaje en Israel.

Sinko de sus livros ya fueron traduizidos al ebreo, ma yo no me merki ni uno de eyos. Komo uzava a dizir mi nona: “Agora tengo otros gatos de eskalder!” (apropo, ke ekspresion kruela!).


Ma, todo este prefasio largo ke vos di endagora fue al pareser un preteksto (achake) para kontarvos una anekdota ke la avia sintido de boka del djuez Zeev Zeltner (1901-1977) ke fue uno de mis maestros en la universidad de Tel Aviv en los anyos ‘50.

Evidensia sirkunstansial

En una lokalidad de djente de buena pozision en uno de los paizes de Evropa, okurio un dia un akontesimiento trajiko. Uno de los abitantes, se prezento en la polisia, i les avizo ke su mujer avia dicho ke va ir a vijitar a su madre, ke bivia en otra sivdad, ma no yego a la kaza de su madre, i tambien no torno en kaza.

Ya pasaron dos semanas, un mez, i la mujer no se topa!

Muy natural, ke el marido pushava a la polisia para ke se esforsen a bushkar a su mujer.

En mientres, la polisia empeso a sospechar ke la povereta fue asasinada, malgrado ke nunka se topo su kadavre. De las interrogasiones entre los vizinos, avian testimonios ke entre marido i mujer pasavan muchos pleytos. Indemas, la investigasion de la polisia topo ke la mujer teniya una polisa de aseguransa de vida en favor de su marido, i la suma de la polisa era bien konsideravle.

Dunke, la polisia estava bien segura ke el marido fue el ke mato a su mujer para aprovecharse de la polisa “godrika”. Naturalmente, arrestaron al marido, ma el tornava i deziya ke el era totalmente inosente, i no save ande se desparesyo su mujer.

Kuando yevaron a el marido al djuzgo, delantre de djuez, el prokurador empeso a kontar todas las evidensias kontra el marido akuzado:

* una, ke en la noche la kual se desparesyo la mujer, el vizindado avian oyido gritos de pleto entre marido i mujer.

* La polisa de la mujer en favor del akuzado, dyo un pezo mas al sospecho, * i tambien el alibi del marido era muy flosho. El avia dicho, en interrogandolo, ke en akea noche, el avia estado en un bar (ma no pudo traer shates ke lo vieron aya).

De la otra parte, avia un fato en favor del akuzado, siendo ke el kadavre de la mujer no se topava en ningun lugar…

De toda manera, el prokurador rezumio i disho, ke el akuzado es kulpavle i ay de kondenarlo a la muerte.

Es verdad ke todas las evidensias eran evidensias sirkunstansialas, ma a vezes, kuando se akumulan talas evedensias, el djuez puede yegar a la konkluzion ke el akuzado es kulpavle.

El avokato del marido akuzado no topo mucho ke dezir kontra las palavras del prokurador, ma izo un paso de “tafaruk” para kitar a su kliente “Inosente por kavzo de duda”.

– “Mirando aki”, disho el avokato, “El kadavre de la mujer no se topo. Es verdad. La razon es muy simple: En estos minutos mizmo, la vash a ver a la mujer, biva i sana, entrando aki, a la sala de la Korte!!”

Todos los prezentes en la sala miraron kon mucha kuryozidad a la direksion de las puertas, ma ninguna mujer no avia entrado.

Despues de unos kuantos minutos de silensio, el djuez dyo su veredikto: “El akuzado es kulpavle!!”

– “Ma, komo!! No es posivle!!” grito el avokato kon grande emosion “Ay de kitarlo al akuzado inosente!! Al menos, “inosente por kavzo de duda”.

Toda la audensia en la sala, i afilu tu, onoravle sinyor djuez, miratesh a las puertas kon la esperansa de ver a la mujer entrar a la sala de la Korte”.

– “Es verdad!” respondio el djuez . “Es verdad ke todos, i yo tambien, esperimos por un momento ver a la mujer entrando a la sala.

Ma…, el uniko ke no abolto la kara a ver este marafet, fue el akuzado mizmo!”

Yehuda Hatsvi
Erets Yisrael

 

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: