Gastonimia Sefaradi: Komida de lentejas, kuartos de berendjena, frojalda y kazandibi de mallebi

por Zelda Ovadia -
Comentarios | Comentar Visto Veces



Zelda Ovadia / Diario Judío MéxicoKOMIDA DE LENTEJAS

Materiales:

  • 2 vazos de lentejas
  • 1 sevoya grande pikada
  • 100 grs. de salsa de tomat
  • ¼ vazo de azeyte
  • 1 kucharika de sal
  • ½ kucharika de pimienta

Preparasion:

Alimpiar bien i lavar las lentejas. Meterlas en un resipiente, taparlas kon agua kaente i buyirlas unos 10 minutos. Deshar eskurrir las lentejas en un tripito.

Vaziar la azeyte en una kaldera, adjustar la sevoya pikada i friyrila asta ke toma una kolor ruvya. Adjustar las lentejas, la tomatada dezecha en un poko de agua, i la pimienta. Tapar las lentejas kon agua kaente i kozer a fuego mediano unos 45 minutos. Mesklar de vez en kuando i adjsutar mas agua segun el menester. La sal se adjusta kuando las lentejas estan blandas i bien kochas. Komer kaente. El ken dezea puede servir las lentejas kon arroz blanko.

***

KUARTOS DE BERENDJENA

Materiales:

  • 2 berendjenas grandes
  • 4-5 tomates grandes
  • 3 sevoyas
  • 2 dientes de ajo
  • 4 kucharas de azeyte
  • 3 kucharas de salsa de tomat
  • ¼ vazo de arroz
  • ¼ vazo de prishil pikado
  • sal i pimienta

Preparasion:

Mundar las berendjenas i kortarlas en kubos. Meter la azeyte en una kaldera, adjustar los kuartos de berendjena i las sevoyas mundadas i kortadas en pedasos grandes i sofriyir unos kuantos minutos.

Adjustar a las berendjenas los tomates ke fueron lavados i kortados, kada uno en kuatro, la salsa de tomat, los dientes de ajo machakados, la sal i pimienta. Kuvrir kon agua i kozer a fuego mediano unos 10 minutos. Lavar el arroz i adjustarlo a las vedruras. Kon una kuchara de tavla mesklar el kontendio de la kaldera. Adjustar mas agua segun el menester. Kozer otros 10 minutos. Esta komida se puede komer kaente o yelada, a gusto. Antes de servir echar por enriva el prishil pikado.

***

FROJALDA

Materiales:

  • 50 grs. de levadura (en kubos)
  • ½ kuchara de sal
  • ½ kuchara de asukar
  • 2-3 vazos de agua tivia
  • ½ kilo de arina (komo 2 vazos i medio)
  • 300 grs. de kezo blanko (bulgarit)
  • 150 grs. de kashkaval rayido
  • ½ vazo de azeyte

Preparasion:

Alientro de un resipiente dezazer la levadura kon un vazo agua tivia, adjustar la sal i la asukar. A esta meskla adjustar la arina i vaziar el resto de la agua tivia, poko a poko, i empesar a finyir asta ke se obtiene una masa omojena i blanda. Adjustar el kezo blanko, dezazido en pedasikos muy chikos i el kashkaval rayido. Mesklar bien.

Untar la azeyte en un pyrex, meter la masa i estirarla afin ke tape toda la superfisia. Kuvrir el pyrex kon un panyo limpio i deshar levdar la masa una ora.

Antes de ornar, rayer sovre la frojalda un poko de kashkaval i kozer media ora en orno ke ya fue kaentado de antes a 180-200 grados.

***

KAZANDIBI* de MALLEBI

Materiales:

  • 1 litro de leche
  • ¾ de vazo de arina (o ½ vazo de arina i ¼ de arina de mais)
  • 2 yemas de guevo
  • 1 vazo de polvo de asukar
  • 1 kuchara de manteka
  • 1 kucharika de almastiga machakada, a gusto

Preparasion:

Meter en una kacharola la leche, la arina, las yemas i la manteka i mesklar todo, por dos-tres minutos, kon un mikser a mano. Esta operasion tiene por buto de evitar la formasion de bultikos en el mallebi.

Meter la kacharola sovre la lumbre i kozer el mallebi mesklandolo todo el tiempo kon una kuchara de tavla. Kuando se empesa a espesear echar alientro la asukar, mesklar 1-2 minutos mas i abashar de la lumbre.

Vaziar el mallebi a un pyrex ke fue untado kon un poko de manteka o margarina. Deshar yelar unos minutos i entremientres kaentar el gril del orno a 180 grados. Meter el pyrex debasho el gril i asperar asta ke el mallebi toma una kolor bien eskura por enriva, todo en aziendo atension a no kemarlo.

Kitar del orno, deshar yelar i meter al frijider por una o dos oras. Servir kon polvo de asukar i agua rozada para el ken le gusta.

 

* Es verdad ke el kazandibi, segun lo sinyifikan las palavras turkas kazan dibi (el fondo del ustensil, onde se apega munchas vezes la komida i se kema, kuando esta demazia sovre la lumbre), deve ser kemado por debasho, i es kuando se sirve ke se abolta sovre el plato, de manera ke la parte kemada este por ariva, ma la version ke tenesh aki es mas fasil i tiene la mizma savor ke el kazandibi orijinal.

Fuente: Aki Yerushalayim #79

La Dirección y Consejo Editorial de "Diario Judío México", no se hacen responsables de los contenidos de artículos firmados por autores, periodistas o sus seudónimos, a la vez que el autor de este artículo no se responsabiliza de los contenidos de las diferentes secciones de este sitio, ni de los criterios establecidos por su Dirección o Consejo Editorial.



También podría interesarte

por Luis Madrigal Tascón -

por Michael Krutikov -