Keridos amigos i amigas
En el Jewish News de esta semana”Yossi Aron”nos avla de la importansia de Hebron para los Judios.Kada anio kuando se melda la Perasha “HAYEY SARAH/La vida de Sarah”,desenas de miles de djente de Jerusalem se van a Hebron i a la Sivdad Nueva de Kiryat Arba ke no son tan leshos una de la otra.Se puede azer a pie.Esto es un kostumbre nuevo i se van ayi para reunirsen kon los patriarkos.No komo Jerusalem,Hebron es mensionado en el Humash. Mismo el Rey David reino ayi por 7 anios antes de reinar en Jerusalem ke iva ser la Sivdad del Rey David.
Saludes a todos.
HEBRON SIVDAD DE LOS PATRIARKOS
Yegando a los tiempos modernos existe un akuerdo en”Mearat Ha Mahpela”ke permete a los Musulmanes i los Judios de azer sus orasiones ayi unos al lado de los otros. En Jerusalem una interaksion similar no existe. Del otro lado en Hebron ay barrieras separando a los 2 pueblos. Ke es ke krea esta negatividad ke se manifesta mismo al nivel del Governo de Israel? Para poder entender la situasion tenemos ke ir atras en la istoria. Desir ke los Judios no tienen derechos a este lugar es una konklusion falsa.Hebron tuvo una poblasion Judia de manera kontinual por un millenium.Kommunidades Sefaraditas i Ashkenazes bivian ayi al lado de sus vesinos Musulmanes.Se puedia merkar tierras ayi i konstruir kazas legalmente. ay munchas propriedades ke son rejistradas sovre nombres Judios.Esto se izo por siglos basho el Imperio Ottomano. avian bienes ayi de Judios vbviendo en Ejipto i Siria. Se instalaron ayi munchos durante las oleadas de imigrantes assosiados kon habad.Despues de la Primera Gerra havia una Yeshiva en Hebron.
Desgrasiadamente las presensia Judia yego al fin de manera trajik en Augusto 1929,kuando 67 Judios fueron matados i avian munchos feridos entre eyos..No todos los ke bivian ayi eran Tsionistos.avian venido aki kon la Deklarasion De Balfour ke fasilito la imigrasion.Estos muertos i feridos avian bivido al lado de los Musulmanes i se entendian bueno. Subito sus vesinos se tornaron kontra los Judios.
Devo mensionar ke en el Artikulo 6 del” National Covenant”Palestiniano estava eskrito ke los Judios ke avian bivido en Palestina asta la Invasion sionista serian vistos komo Palestinianos. Despues del Pogrom ke tomo lugar los Judios biviendo ayi fueron evakuados.Unos se tornaron atras en 1931 i tenian ke ser evakuados de nuevo kuando los Arabos se alevantaron en 1936-1939.No kedavan ayi Judios asta la Gerra de 6 Dias.Unos Arabos tenian espanto de una retribusion por lo ke fue echo en 1929.Ma esto no se paso.Del otro lado el odio de los Judios se kedo ayi,negando los derechos ke tenian los Judios. El fakto ke los Judios no estavan ayi por 3 o 4 dekadas no metio en kestion las propriedades ke tenian antes i fueron reklamadas en 1968. Munchas de las kazas avian kaido en manos de los Musulmanes.
Ademas los Judios no puedian traversar la frontiera entre Israel i la Jordania para ir a Hebron entre 1948 i 1967. Komo resultado Hebron paresia a una sivdad Araba.Los Palestinianos tratavan a los Judios komo si no apartenian ayi. Este modo de ver las kozas entro en la Propaganda Araba i Israel la avia akseptado.
En 1994″Baruch Goldstein”kometio un krimen grave ke no se puede niegar. Ma lo mismo se azia del otro lado. El Rabbino Grande de Britannia”Jonathan Sacks”disho”Este akto es obseno i una travestia ke se va kontra las valores Judias.Sovre todo porke se izo en un lugar ande la djente azen sus orasiones en una ora santa.Esto es una blasfemia i una violensia.Tan malo ke sea komo akto,esto no mete fin a la presensia Judia de un millenium.” Munchos ven la presensia Judia komo una provokasion i komo una barriera a la paz.
KE EL DIO NOS DE PAZ A TODOS.
EN JERUSALEM I EN HEBRON I EN TODA LA TIERRA DE ISRAEL.
Tradusido por Shimon Geron, Sydney
Fuente: Ladinokomunita
Artículos Relacionados: