Inferno en Ukrania, la revolta de Bogdan Chmielnicki

Por:
- - Visto 662 veces

Verso los anyos 1600, los djudyos ya se avian adaptado a sus environamente en Polonia, Lituania i Ukrania. Durante un periodo de unos 250 anyos – si no la rikeza –avian alkansado a un estado de estabilidad ekonomika. Se topavan basho la proteksion de sus proprietarios: la noblesa non djudia. Estos los uzavan para arekojer los dasios de los kazalinos.

boda_djudia_ukrania

La maz grande parte de la tierra en Ukrania era kontrolada por los proprietarios polakos, ke bivian en Polonia. El sistemo feodal expluatava a los kazalinos, ke lavoravan la tierra i ke no puedian ganar bastante para pagar su alkilo. Ansi, kada anyo se topavan maz i maz en devdo. En konsekuensa, una grande parte del puevlo era oprimida i bivia en la mizeria.


En Ukrania bivian tambien un grande numero de kozakos. Estos eran un trivo de gerreadores feroses – posiblamente de orijinen asiatiko – i konosidos esansialmente por sus abilitatad komo kavalieros. Konsiderados siempre komo forasteros, i eyos eran diskriminados i ekspluatados.

En konsekuensia, los kozakos se revoltaron en 1637. Esta revolta reusho durante doz a tres anyos. Entre 1637 i 1640, los kozakos mataron a unos 2.000 djudyos. Estos fueron asasinados porke eran lo empiegados de los feodales polakos, uzados komo kolektores de dasyos.

Los Kozakes, no tenian el poder de kombatir kontra los proprietarios en Polonia, ma estavan kontentes de vengarsen de los ke los reprezentavan: los djudios. Todo kon esto, en 1640 los feodales polakos reusheron a reestablisir sus poder. Los lideres de la revolta fueron kapturados i egzekutidos, i la situasion se kalmo.

En 1648, kuando renkontraron un lider kapachi i se revoltaron, la situasion de los kozakes i kazalinos en Ukrania no era ainda diferente de 1640. Este lider fue Bogdan Chmielnicki. Era un grande gerreador en sus sinkuenta, ke avia luchado por los polakos i los kozakos kontra los turkos. Portanto, era demazia karismatiko por sus superiores, ke se avian abstenido de avansarlo. Fue un firme segidor de la ortodoksia rusa i aisava a los feodales polakos, no solo por sus kupididad, sino tambien por sus katolisismo romano.

Entrada triomfala de Chmielnicky a Kiev

Organizo bandas de bandidos, ke siempre egzistian en una grande armada. En april de 1648, traverso el rio Dinieper i se dirijo verse el oeste. Proklamo el Estado independente de Ukrania i prometio, asigun ke todos los revolusionarios lo azen, ke los rikos seran devastados i ke los proves se apatronaran de sus tierras.

Chmielnicki  reusho a kapturar una seria de grandes kastilios polakos. Kada viktoria engrandesio su reputasion. Kada vez, maz personas, kazalinos i kozakos se adjuntaron a el. Finalmente en otonio 1648, sinko mezes despues ke la revolusion avia empesado, paso a la Polonia mizma i kapturo la famoza sivdad de Lvov. Entonses, los polakos demandaron un armistisio.

Chmielnicki fue de akordo de aretar la gerra. Portanto, en retrospektiva devia de kontinuar a kombatir. El armistisio ofresio a los polakos el tiempo nesesario para organizarsen. Kuando fueron prontos, repusharon todas ofertas i konventos, en persegiendo a Chmielnicki asta la fin.

Kozakos eskriviendo una letra al Sultan otomano, Memet VI, ke les avia demandado de rendersen a su armada, i burlandosen del Sultan  ototomano

Kual kere ke sea, este periodo de sinko mezes del otonio 1648, avia liberado el jigante leyenderio del bokal. Miles i miles de kazalinos armados estavan kaminando en el  payis. No eran disiplinados i avian gostado sangre. Por lo tanto, al lugar de volvrer a sus kazas i lavorar la tierra, o al lugar de de establisir el estado kozako, se konvertirton en una masa de asasinos barbares.

Los masakros no se dirijaron solo kontra los djudyos. Klerikos katolikos romanos fueron dekapitados. Las monhas fueron violadas. Las iglesias fueron kemadas i sakeadas. Nobles fueron sekestrados i fueron detuvidos para resivir un enorme reskato. I kuando el reskato fue pagado, lo maz fueron mandados a sus kazas en pedasos. Fue un periodo de anarshia inimajinable.

Portanto, kon toda la malisia de la revolta, dinguno no sufrio en el nivel del destino de los djudyos. Se estima ke entre 1648 i 1653, unos 300,000 djudyos fueron matados. Ay de akodrar ke esto afito en un periodo onde el asasinato en masa no avia arivado al nivel industrial komo en muestros diyas. Todos devian ser asasinados kon las manos. No egzistian makinas, mitralyeuzes, kamaretas de gaz o otras pareyas armas de destruksion masiva.No importa el karar determinasion para matar, a la fin la mano se kansa despues de un tiempo. En konsekuensia, en terminos de persentaje de destruksion en el mundo djudio i en el grado de krueldad i barbarismo, estos maskaros eran similares a la matansina en la Segunda Gerra Mundial durante el Olokosto.

Kavalieros kozakos

En la primavera de 1649, Chmielnicki transgreso un armistisio i invaido la Lituania. Munchos djudyos de la Polonia se avian fuyido a Lituania, ke tenia una komunitad djudia bien establisida. Avian pensado ke avian topado refujio. Portanto, la poblasion nativa, ke eya mizma era persekutida por los kozakos, se volvio kontra eyos. Al lugar de kombatir kontra los kozakos, los djudyos fueron konsiderados komo el ‘enemigo komun’.

Ma, en la fin de 1649, el mazal de Chmielnicki  empeso a trokar. Sus aliados, lor tartaros, no eran leal. Fueron komprasdos por los polakos i trokaron de parte. Al lugar de apoyar a los kozakos,  se aunaron a los polakos kontra Chmielnicki.

Sintiendo la derrota, Chmielnicki firmo el Tratado de Zboriv. Las ostilidades se kedaron ofisialmente, las ganansia ke Chmielnicki  avia echo se enrezyeron, Chmielnicki  dyo otonomia al estado kozako i prometio ke la gerra ya se avia terminado. Ma, despues de kaji tres anyos de gerra ininteruptida, de sakeo, de rovo i de asasinato, los kozakos no fueron prontos para abolltar a sus kazas. El rezultado fue ke, Chmielnicki perdio el kontrol de su armada. En 1651, la armada polaka atako de muevo, ma esta vez los polakos triomfaron. La ironia es ke kuando los polakos ganaron i yegaron a la zona djudia, maskraron i eyos a los djudyos. Akuzaron a los djudyos de ser traidores en estando de la parte de Chmielnicki.

Djudios de Ukrania, en una demonstrasion, 1880

En 1652, los tartaros trokaron la idea de muevo. Despues de aver apoyado a los polakos,  se aunaron a Chmielnicki. Ansi, la revolusion se renovelo. En segito, el kaos se kompliko maz kuando el mizmo anyo, una epidemia enorma de kolera desbrocho en ekstendiendose a laPolonia i a la Rusia.

Esta epidemia ebranlo a todas las bolsilias djudias en Polonia, Rusia i Lituania, ande kualkere aparensia de estabilidad ainda egzistia. Agora, los djudyos empesaron a fuyirsen ande lo pudian. Munchos arivaron a Amsterdam, i otros al este de la Rusia. Por la primera ver kresieron asentamientos konsiderables en el interior de la Rusia.

En 1543, la rebelion yego a su fin. Los reyes polakos i los reyes rusos la atabafaron de una manera absoluta. Es estimado ke egzekutieron enre 10 a 12.000 kozakos publikamente.

* * *

Los kabalistos eran konvensidos ke en el anyo 1648, el Mashiah iva venir. En esta perspektiva, este anyo devia ser un anyo de orror , ma en mizmo tiempo un anyo de esperansa. Asigun la tradision djudia la era mesianika deve ser inisiado kon una seria de evenenentos katastrofikos. “Las  dolores de la venida del Mashiah” son asemejadas literalmente a las dolores de la paridura de una mujer. La nasensia de una kreyatura es akompanyada de un periodo de dolor i de sufriensa. Por esto, el Talmud eskrive ke los savios dizen, “ke la era del Mashiah venga, ma ke yo mizmo no sea testigo”.

Es sovre estos argumentos ke el mesianismo de Sabetay Sevi avia rekonosido una parte de la evidensia de su verasitad. La desepsion provokada por la konversion de Sevi al Islam, avia en segito amatado los vestijes de la ekspektasion sovre el arivo de la era mesianika, arebividos kon las persekusiones de Chmielnicki . En segito, un proseso de kreasion de muevos valores empeso entre la komuntad  djudia de la Evropa del este. Orientendola verso la kreasion de un sistemo muevo de valores i de identitad. Empesando kon el movimiento mistiko del Hasidismo, este proroseso enjendro despues el koriento de la Askala, markado por la emansipasion en la vida del payis, la edukasion sekulara i el rasionalismo.

bogdan_chmielnicki

Bogdan Chmielnicki
1595 –1657

Nasido en una familia djudia, Bogdan Chmielnicki  fue edukado en eskolas jesuitas. Kompketo sus estudios en 1617. Akiero un ancho konosimiento de la istoria i se ambezo el polako i el latin. Maz tadre se ambezo el turko, el tartaro i el fransez. A la diferensia de munchos otros estudiantes de las eskolas jesuitas, no abraso el katolisizmo romano, i kedo ortodokso.

A la edad de 22 anyos se auno a su padre i kombatio kontra los otomanos en la parte de los nobles de Moldavia. Su primer kombate fue una derota trajika. Durante la batalia de Cecora en 1620, su padre fue matado, i Chmielnicki  kon munchos otros, fue kapturado. Paso los proksimos doz anyos en kaptividad en Konstantinopla, komo prizoniera del Kapudan Pasaha, presumablamente Parlak Mustafa Pasha. Syertas fuentes afirman ke estuvo komo esklavo komo  ramero en galeras de nave. No ay evdensias sovre la manera de su regreso a Ukrania. La mayoria de los istorianos pensan ke se fuyo o ke su reskate fue pagado – posiblamente por el embasador, Krzysztof Zbaraski.

En el korso de sus kampanyas, los partizanes de Chmielnicki aktuaron kon krueldad i salvajeria sin interupsion kontra los djudyos. Chmielnicki kijo establisir en Ukrania un estado otonomo, sino basho la Polonia, basho el Imperio otomano, Moskova o, la Suedia. De mizmo, kijo eradikar los djudyos de Ukrania. De punto de vista demografika, aspiro a konvertir los lideres kozakos entanto ke la aristokrasia dominante, todo en deshanto los kazalinos en servitudo. Su kariera trusho la destruksion i la ruina, sin asigurar la independensia a Ukrania. Despues de su muerte, el este de la Ukrania fue aneksado a la Rusia en 1667. Portanto, los miembros del movimiento nasionalisto en Ukrania, en las ultimas jenerasiones empesaron a konsiderarlo komo el promotor del despertamiento del peuvlo de la Ukrania, mientro ke los nasionalistos rusos lo vieron komo un “grande patrioto” ke favorizo la unifikasion de Ukrania kon la Rusia.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: