Kuantas presonas avlan la lingua muestra? I ande? Porke las muevas jenerasyones ya no estan mas avlando el Djudezmo? La lingua se muere o puedemos revitalizarla? Kyen ainda avla esta dulse lingua i kuando i kon kyen? Kyen se enteresa a esta lingua i su kultura? Komo se puede transmeter esta erensia?

Nada se pyedre totalmente: En la primera universita sefaradi de enverano, organizada por Michael Halévy et Gaelle Collin i patrosinada kon la jenerosidad de la komunidad djudiya de Sofia, kaji vente estudyantes vinyendo de syete paizes (Bulgaria, Serbia, Turkiya, Espanya, Kolumbya, Austria i Alemanya) kedaron una semana a Sofia para ambezar el Djudezmo i konoser mijor la kultura djudia de los Balkanes.

El enkontro empeso kon la avla de byenvenida del Dr. M. Benvenisti, prezidente de Shalom, la komunidad djudia de Sofia. Dospues, Michael Halévy del Instituto de Investigasyon sovre los djudyos de Almanya inauguro la Primera Universita de Enverano, en Sofia.

En los dias sigientes, los estudyantes avlaron i diskutyeron kon la poeta Grasia Albuhayre (Sofia), kon la eskrivana Ivet Anavi (Plovdiv), kon la kantadera i filologa Drita Tutunovic (Belogrado) i kon Dr. Sophie Danon, la infatigavle anima del Klub Ladino de Sofia. Ambezaron el rashi i el solitreo i meldaron tekstos djudyos en letras sirilikas; eskucharon las memorias bivas de los Sofialis i Filibilis; asistyeron a las konferensyas de David Bunis (Yerushalayim) sovre la repartisyon del djudezmo en el mundo; de Elko Hazan (Sofia) sovre las sinagogas de Bulgaria; de Ivana Vucina Simovic (Belogrado) sovre los vestijos del Djudezmo en los Balkanes; de Jelena Filipovic (Belogrado) sovre las minorias etniko-relidjyozas de los Balkanes; de Gaelle Collin (Paris) sovre la prensa sefardi; de Ivan Kanchev (Sofia) sovre el hal (estado) aktual del Djudezmo; i de Michael Halévy (Hamburgo) sovre los Djudezmo-avlantes en Bulgaria. Josh Ahrens, muevo i dinamiko rabino de Sofia, mos avlo en su sinagoga de la situasyon aktuala de la komunidad djudia de la kapitala bulgara.

Los partisipantes de esta universita vijitaron kon el ayudo de Ivanka Gezenko i Rumiana Nedialkova el Fondo de Livros en Ladino ke se topa en los Arshivos Nasyonales de Sofia; se pasearon en el Muzeo djudio de Sofia kon la giya Alexandra Ivoilova (poeta i kantadera) ; se fueron kon el ayudo de Svetlana Avdala a la Kaza-Muzeo Pancho Vladigerov para asistir a un konsyerto de muzika relijyoza sefaradi majistralmente interpretado por el Dr. Shemy Behar de Plovdiv; kon el ayudo de Juliana Farhi i Sophie Danon, los estudyantes pasaron una tadrika i nochada muy alegre i rika en el Bet-Am ande “Las Manos Bendichas” prezentaron una pyesa teatral (en bulgaro i en djudezmo), la dinamika Lika Eshkenazi i su koro “Dulse Kanto” kantaron las ermozas i muy esmovyentes kantikas sefaradis, i por fin, las ‹muy djovenas› gizanderas aparejaron una komida muy savrozika i muy sefaradi. Para dokumentar esta presyoza erensya la doktoranta Ainhoa Montoya de Hamburgo filmo las entrevistas kon los djudezmo-avlantes, ansi ke la reprezentasyon teatrala de “Las Manos Bendichas” i los kantes de Lika Eshkenazi.

La Bulgaria, uniko paiz ke salvo sus Djidyos? Los estudyantes pudyeron ver tres filmos alderedor de este tema: uno sovre el Olokosto en Makedonya, prezentado por Sofiya Grandovska (Skopje), un otro yamado « The Optimists » sovre los hitleristos i los fashistos bulgaros (i siguro sovre los bulgaros ke ayudaron a los djidyos), i un ultimo « Las Estreyas », filmo klasiko del konosido eskrivano Angel Wagenstein sovre la deportasyon de los djudyos de Makedonya.

Los profesores tuvyeron el mazal i el plazer de enkontrar sus amigos Nisim Koen ke avlo de su chikez en la maale de Yuch Bunar, de azer una rapida vijita a la kaza de los Ansyanos (Bet Avot) i de ir ande sus amigos Venezia i Josef Kamhi ande pudieron i avlar kon la konosida kantadera de opera Ida Fintsi.

Estudyantes, profesores i myembros de la komunidad djudia Shalom de Sofia pasaron una semana muy interesante kon rizas i alegria, yena de emosyones en las salas del Beit Shalom ke mos fueron jenerozamente emprestadas por el Dr. Maxim Benveniste. Mos ayudaron para byen aparejar esta primera universita de enverano muestros amigos i amigas, Corinna Deppner, Dr. Eli Anavi, Anna Georgieva i Leon Benatov.

Asistimos a esta primera universita sefardi de enverano, estudyantes i profesores, amigas i amigos. Ke alegria fue para todos ke en la Bulgaria se avla ainda Djudezmo, i un buen djudezmo! Si, en la Bulgaria esta biva esta manyifika erensya. Una erensya de ayer, oy i para syempre. En la Bulgaria moz izimos munchos amigos i kolegas. Vamos ritornar, para la sigunda universita sefardita de enverano.