Ken Disho Ke….. ?

Por:
- - Visto 289 veces

Kale saver retirarmos kuando viene el momento i saver ke es tiempo de GOZAR de la vida i render grasyas al Sielo por ayegar a estos diyas kon la kavesa, las pachas i los brasos sanos…  Mizmo si duelen …. No es koza poka !

El mundo de konsumo no tiyene kavo… Mismo los ke son muy muy rikos siempre vana topar ke no tienen bastante i el ojo en este mundo dizen ke se arta solo kon la tierra !  Es vedra  para todos ademas por los ke no tienen la filosofia de tomar las kozas a sus justas proporsyones.  El mundo ofre en si mizmo todos los plazeres ke el hombre nesesita.  Su ermozura es sin limitos.  La tierra mos arta de mijor manera  kon las savores i lo ke muestro puerpo nesesita.  Mismo si no tenemos jente a muestro entorno el Kadosh Baruh Hu mos dyo los animales ke son mijores mismo de los hombres en munchos kavzos, porke sin kerensya no se puede bivir ! Tenemos los 4 ermanos ke son : El Olvido,  la Esperansa, la Konfiensya i la Pasensya. Bivimos en un mundo ande tenemos innombravles livros en las bibliotekas munisipalas sin pagar para pasar el tiempo, kadenas de TV para todos, la komputadora ke traye el mundo a muestros piezes kon todo lo ke puedemos imajinar, sivdades yennas de kozas enteresantes para deskuvrir, avlar kon la djente…. Ken tiene de menester de azer kompras en estos magazenes luksuozos ke vizan solo las aldikeras i nunka lo ke se nesesita  ?


 

No de verdad ….La vida es tan ermoza en si para los ke saven travarla por los kaveyos i azerla esklava de si, sin  ser su esklavo !  Kale liberarse  de sus espantos i bivir  plenamente los diyas kon keyf !  Deshar los penseryos negativos i no es a mozotros  de pensar a los ke vana kedar sin lavoro pormodo de la krisis !  El mundo va evoluar komo esta programado o komo las kozas se dezvelopan kon el tiempo…No somos ni el Ministro de Finansas i ni el Ministro de Lavoro!  Muestros dertes son la salud i el bien estar…. El Di-o ke mos de vidas sanas i largas…

Soriye….Va al espejo i dizete ke no tienes de pensar a nada i ke El ke Prokura Todo te va dar asigun tu korason.. Esto es la Konfiensya! Dizete ke te amas i ke es esto lo ke konta en la vida ! Aregalate kon kozikas ke amas…. i inche tu korason kon el vedre i el bleu i las innombravles flores… Avlale a tu Amigo en los Sielos, avrele tu korason ! Es el mijor Psikiatro ke puedes topar….Tu Padre, El ke te ama i te va kudyar fina tus d’alkavos momentos. El Male Rahamim…. El Justo i el Todo Poderozo!

Oy es Jueves  el 24  De Mayo 2018 .  Espero ke pasatesh una buena nochada i durmitesh del esuenyo de los anjelitos.    Dizen ke un buen diya empesa dospues de un buen esuenyo. No se empesa al diya de negra humor i kansados…

Kon esto ay djente komo yo,   ke a vezes no durmo de noche fina la demanyana. Yo los yamo las sultanas modernas ! Durmen kuando tienen ganas ! No es importante si es 9 de la manyane a las 1 a midi o 6 de la tadre ! La mizma koza por komer… Komen kuando tienen ambre ! Azen lo ke keren, komo keren i kuando keren. Ay mas grande keyf de esto en la vida ? Por esto ringrasyo el Santo Bendicho ke me dyo el repozo de azer todo lo ke me da la gana sin estrechura, sin ovligasyon, sin normas i sin ser atada a dingunos o a kualker program. Penso a los povretikos en los “homes”, toda manera de beyt avot, ihtiyarlar yurdu ande ay reglas…. horas para komer, diyas de lavarse, tiempo para durmir ets…Ken save komo estaran sufriyendo de esto !

Oy mis orasyones se van a estos viejizikos para ke los miren bueno, no los agan yorar i darles oras de grande tristesa. Ya estan sin sus nidos, sin sus keridos i en manos ajenas… Ke los ke les ayudan entyendan sus korasonikos firyidos i siempre los traten kon abrasos i palavras dulses porke es ESTO ke les aze sintir mijor de las kuras ! Estos viejizikos ke yo kero tanto bien i ke me okupi tanto al tiempo….Rogo para ke no sufren, no keden suzyos i ke no los alimenten de fuersa por la nariz….. No ! No !

Ke el mazal vos soriye i ke tengash un diya maraviyozo !

Sharope Blanco
[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: