Disde anyos ke tenia misma vezina,
Un dia subito se sintyo muy hazina,
Doktores viniyan,doktores se ivan
Esta mujer kualo tenia no savian.
Para topar remedios a su dezreposo,
yamaron otro doktor…era muy famoso,
Analizes,radiografias,konsultasiones,
Sin pueder alesharla de sus pasiones..
Akel doktor ke era de muy grande fama
Kon sus avlas la enterro mas en su kama,
Diziendole ke su estado era grave
Si seva pueder salvarse no se save.
Hue komo echarle tosigo a su vena,
Su kara palida era de lagrimas yena.
Amato las illusiones de su futuro
Empeso sintir sus dolores en mas duro.
Este doktor porke le dyo esta ansya
Diziendole ke no tiene mas esperansa.
Esto no es modernismo ni humanismo
Es arondjarla al bodre de un abismo.
Yo la via asentada serka su ventana
Kon unas miradas abatidas sin gana,
Bivyendo kon akel espanto de la muerte,
Pensava al endivino de su suerte.
Los dias i los mezes muy presto pasaron,
kaje todos sus dolores fuertes le kalmaron
Su kolor de kara komo una donzea
Deseava a ke el famoso la vea.
Ma el destino djuzgo antes de su torno
A ke el salga a un viaje sin retorno.
Artículos Relacionados: