La kontinuasyon de
LA ASSIMILASYON
Enterramente de akordo kon ti Sharope….
A mas bushkar, a entender eskritos o palavras oskuras, los hahames se alesharon de la realitad asta dar vida a un fiktivo imaginativo. Dospues mos dizen “No, es alegoriko. Kere dizir otra koza.” Setenta posibilitad de entendimyentos.!!!
Me demando si la ley de Moshé puede tener mas entendimientos de lo ke dize klaramente: No matar es no matar, no rovar es no rovar, deskansar del lavoro es tomar kef i gozar de la vida, etc..
Bushkar otro es imajinativo, es bushkar misteryos sin fin. La Biblia fue eskrita en primero en Grego. Komo se puede entender, la Biblia, si no se avla Grego, o Arameo, no se puede entender a la signifikasyon autentika.Tyene parte de historia, de genealogiya, parte de leyes, parte de poeziyas i konsejos, parte de profesiyas i endevinasyones del futuro komo azyan lo magos ( Unos akavidados o imaginativos o burladores ).
Kualo se puede dizir si kon estos entendimyentos uno de grande fama no kere apretar boton; kere kedar sin luz komo en los tiempos pasados o tiempos de su padre, komo si el mantenimiento de lo viejo es sakrado es un ordino de Dio. Seras kulpable. Kulpables. Kastigarse por las kulpas… ma ke kulpas ? ken save ? Nunka Dio se kesho.
Otros diran: “Es esto muestra religion, kale mantenerla kon todas las fuersas.” i otros diran ” la elektrisidad es koza mueva, tiene manko de 200 anyos. Kualo se saviya de esta invensyon misteryoza ? Mijor no pizar boton. Ken save si no es avoda zara, si no se va pagar un presyo fuerte i ke el tavan mos va kayer ensima ?
La verdad es ke chikos somos blandos, i aedados tenemos sekiya de los tyempos de muestros primeros anyos, serka de muestros keridos disparesidos. Muestro torno se esta aserkando.
Bendicho seyga El i Su Nombre .
Renaud Souhami – Paris
——————————————————————————
Ayyyyyyyyyyyy Renaud ayyyyyyyyyy !
A ken importa si tenemos razon tu i yo ?
Mizmo los ke mos son los mas serkanos dizen ke mos estamos yerrando i ke el Judaizmo deve de ser entendido asigun las santas palavras de muestros rabinos ke estudyaron la Tora I siguen kreyendosen solo a lo ke les ambezaron. Egzaktamente komo mos ambezimos de muestros paryentes… muestra lingua I muestra manera de ver la vida.
Mozotros, komo lo mas de los judyos de Estambol no eramos komo los judyos de los payizes arabos o del Este de Europa. Kije dizir ke Sefaradim en Turkiya no eran komo los orthodokses ke siguen a la letra la Ley de los rabinos. Fiestas se fiestavan lo mijor del mundo por seguro. Di-o fue Santo siempre I arogavamos para ke mos bendizga a todos I a muestra kaza… Ke mos de buena parnasa, mos ayude kon todo lo komplikado, ke mos de pasensya I ke los hazinos se kuren, las kreaturas reushkan a la eskola I en sus echos, ke tengan una buena vida de familya ets.
Ni ke saviya otra forma de Judaizmo a parte ke no me interesava muncho ! Es vedra ke mamita me diziya “No se kuze los diyas de Shabat ! Desha esta alguja de la mano !” kuando tratava de kuzir un fostan a mi kukla Dilek ! Pensava ke las madres siempre tienen de defender kozas a sus kreaturas ma ke esto no era seryozo I ” les pasava ” !!! Maksimum, kon un beziko todo se arreglava !
Las eksplikasyones seryozas viniyan de mi papi ma los sintiya komo historyikas I me plaziyan muncho. Los akseptava komo kozas de la antikitad ke no son relevantes aktualmente. Mizmo la manera de eksplikar o los biervos ke se uzavan eran antiguas !Para mi era gozar de lo ke oyia i del tiempo ke pasava kon mi padre Z’l. Kuanto me eskarinyo de el I de mi mamita en Ganeden. Les embiyo abrasos I bezos del mundo de los ke egzisten dayinda. En serka a sus lados.. O si o no, komo todos ke ya se fueron Aya..
Te puede dizir ke lo ke vide I me ambzi en Israel, todo lo ke no saviya en Turkiya me shoko muncho I no kavyo a mi meoyo.. Agora me digo ke todos los ke no son Judyos deven tener el mizmo “shok” kuando ven, konosen I avlan kon los ortodokses…
Guay de mozotros… guay guay…. I ES vedra ke somos un puevlo adelantado, muy inteligente I spesyal…. Penso kon esto ke es pormodo de todas las sufriensyas, las injustisyas, el odyo a los judyos, para topar remedyo de sobrebivir ke yegimos a muestro estado….
Son tiempos muy difisil…. Vemos dezgrasyas de la parte de los ke mos keren assasinar…..
Ambezan a sus kreaturas en las familyas, en la maternitad i en las klasas el odyo i la muerte a los judyos…. Se azen terroristos kon la miente hazina, sanguinaryos, sin la fakultad de pensar por eyos mizmos… Tipos de robotes, zombis ke se kontrolan i matan sin el mas chiko remorso personas innosentes, mujeres, hazinos viejos i kreaturas de la mizma manera…. Una abominasyon. Solo en matandolos se puede liberar de sus manos de assasinos i el mundo entero mos echa la kulpa sin mizmo saver de kualo se avla en realitad ! La vedra es ke el Islam, esta relijyon de “paz” i de “limpyeza del korason”, de “mizerikordia” les ambeza el odyo a los Judyos i a los ke no son muzulmanos kon el Koran, i no keda muncho para ke salga de esto terroristos perfektos sin espanto de murrir porke tienen la “garantia” de la “rekompensa” i del Paradizo en la Vida Eterna. Los asperan diezenas de virgenes, las huris, (ke kedan virgenes…) chorros de vinos ke es defendido de tomar en el mundo ! Todo bueno dospues de la muerte kuando seran “shahid” ke es murrir por la fe i la religion… Es un largo kamino des de la chikes, kon ambezos, el espanto, el orgulyo nasyonal, las rekompensas a las famiyas munchas vezes en ekstrema provedad, la fama, la vayensya (!) – kapak kayido !- no tener otra alternativa para una buena vida ke gozan fina sus akto final i sin avlar de las drogas ke se les dan debaldes i kuanto nesesitan…. Una organizasyon muy muy poderoza i mantenida por los petro-Dolares, la diffuzion de las drogas peligrozas, las mujeres forsadas a la prostitusyon i la ganansya de la venditad de las armas a los payizes ke tienen en tino de attakar al lugar de kerer defendersen i por siguro por sus defensyas tambien…
ES I POR SIEMPRE SERA MUESTRA REPUESTA
Rogo por el bien de mi payis, la salvasyon de todos muestros mansevikos ke guerreyan debasho de la bandiera de Israel ! EL Di-o ke los guadre de ora mala I ke todos tornen sanos I rezyos a sus kazas… A los brasos de sus keridos…. Amen i amen….
Shabat Shalom
Sharope blanco
Artículos Relacionados: