Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 6 de junyo, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.
http://www.radioj.fr
Antes de empesar mi emisyon de oy, un haber: En el muevo governo de Fransya, ke empeso de lavorar el djueves pasado 18 de mayis, la mueva ministra de la salud es una djudiya ke se yama Agnès Buzyn. Nasida en 1963, tyene 54 anyos, i si fue tomada komo ministra de la salud, es porke esta profesora de ematolojiya ya era la prezidente de la Alta Otoridad de la Salud, despues de tener sido prezidente del Institudo Nasyonal del Kanser. Es kazada kon un mediko espesyalisto del sida, Yves Lévy, prezidente del famozo Inserm (Institudo Nasyonal de la Salud i de la Bushkedad Medikala). Kale dizir ke Yves Levy no es su primer marido, el kual era el avokato Pierre-François Veil, uno de los tres ijos de Simone Veil, ke, eya tambyen, fue ministra de la Salud aze unos kuarenta anyos. Es Agnès ke desho en 1985, kuando teniya solo 22 anyos, a Pierre-François Veil por amor para Yves Lévy. Tyene tres ijos.
La madre de Agnès Buzyn, Etty Buzyn nasida Wrobel, es una djudiya de orijen polaka, afillu si nasyo en Paris en 1935. Komo kaji todas las kriaturas djudiyas de esta edad, tuvo de eskonderse a syete anyos kon su ermaniko de tres, en la sivdadika de Miribel (departamento del Ain) ande una bivda kristyana, Mme Marie Lacroix, ke fue rekonosida Djusta en 1998, despues de su muerte ke afito en 1963.
Agora Etty Buzyn es psikologa, espesyalista de las chikas kriaturas, de la vanda de Françoise Dolto.
El padre de Agnès Buzyn, Elie Buzyn, nasido en Lodz (Polonya) en 1929, empeso en 1940 por ser enserrado en el ghetto de Lodz, i ayega a sovrebivir aya asta agosto 1944, lavorando komo ovrero. En agosto 1944, a la edad de 15 anyos, es yevado kon su famiya en Auschwitz, i aya se muere toda su famiya. El sovrebive asta la marcha de la muerte en janvier 1945, i ayega ansina en Buchenwald. Sus pyes son yelados, i en la enfermeriya le dizen ke van a kortarlos para ke no empese la gangrena. El se fuye de la enfermeriya, i un prezonero ruso le dize: “kale ke untes tus pyes en agua kalyente i despues en agua yelada, i esto munchas vezes”. Los otros deportados le topan agua, kayente i yelada, i ansina se kura solo, i a poko a poko, se salva sus pyes…
Despues de su liberasyon, se va en Palestina, ke va ser estado de Israel, i se keda aya syete anyos, ama se kyere azer mediko i kirurgo, espesyalisto en ortopediya, i despues de dos anyos en Aljeriya vyene en Fransya i empesa en 1956, a la edad de 27 anyos, estudyos de medikeriya. I, komo lo keriya, fue kirurgo en ortopediya.
Durante sinkuenta anyos, va aprovar, sino de olvidar, a lo manko de kayar lo ke bivyo, i esto por dos razones: en primero para el, porke si se aboltava verso su pasado, aviya el riziko ke se mate para aunirse kon los suyos, sigundo para sus kriaturas, para no darles el pesgo de esta sufriensa suya. Es kuando tuvo inyetos i ke estos inyetos ayegaron a los kinze anyos, ke penso ke era tyempo de avlar.
http://www.huffingtonpost.fr/sophie-nahum/ma-rencontre-avec-elie-buzyn-rescape-dauschwitz-et-pere-dagne_a_22095927/
Ansina me vo kedar sovre esta ministra i el pasado de sus padre i madre, para ayegar a mi emisyon de oy, ke va ser la kontinuasyon de la ke empesi la semana pasada sovre la Etika djudiya, asigun un artikolo del haham liberal ingles John D. Rayner, trasladado i adaptado al franses por el haham, liberal el tambyen, François Garaï.
Me kedi la semana pasada, kuando vos estava avlando de la mitsvot sovre las relasyones entre personas, i por siguro amar al otro i amar al ajeno.
Amar el ajeno
Es una mitsva de amar al ajeno, komo esta eskrito: ” Amaras a el (el peregrino pregrinan con vos) komo a ti” (Vayikra XIX, 34)
Respektar la dignidad del otro
De todas estas mitsvot sale la de respektar la dignidad del otro. Rabi Eliezer diziya: “Ke sea el onor de tu proksimo presyozo komo el tuyo” (Avot II, 10)
Respektar la propriedad del otro
La mitsva de amar al serkano mos ovliga a tener kudyado de lo ke le pertenese. Rabi Yossi diziya: “Te sea el byen de tu proksimo tan presyozo komo el tuyo” (Avot II, 12)
Dizir la vedra
“Fablad verdad varon a su compañero” (Zeharya, VIII, 16) i esto kale azerlo ke sea en privado komo en puvliko.
Akojer el otro i alegrarse kon el.
Shammay diziya: “Resive a la djente kon kara de sonriza”(Avot I, 15)
Azer paz
Asigun Hillel, “Bushka a ser komo un elevo de Aaron, ke amava la paz i la bushkava (Avot I, 12) (komo lo demanda el psalmista: ” Teilim XXXIV, 15: “Busca paz y siguela”).
Amostrarse jenerozo
“Sovre tres fundamyentos el mundo esta fraguado ke son: la Tora, el kulto i la byenvolensya, diziya Shimon el djusto” (Avot I, 2). Los aktos de jenerozidad van sovre todo para los proves, ama deve ser para todos. I la jenerozidad no se amostra solo kon dar paras. Puede ser dar su tyempo i su lavoro.
Asta agora, estavamos avlando entre las personas en jeneral. Ay una etika ke vale entre adversaryos.
No vengarse
Es una mitsva de no vengarse, asigun esta eskrito: “No te vengues” (Vayikra XIX, 18)
No tener ensunya (rancune)
Es una mitsva de no tener ensunya kontra su proksimo, asigun esta eskrito:”lo titor et bene ameha”, lo ke la Biblia de Ferrara traslada “no guardes (malquerencia) a hijos de tu pueblo”, i la Biblia del Rabinato “no guadres ensunya”, sin meter parantezas, afillu si lo titor, palavra por palavra, kyere solo dizir no guadres, ama, es vedra, kon el sentido de guadrar ensunya.
No alegrarse de la kaida de su enemigo
No solo no kale vengarse ni tener ensunya, ama la etika va mas leshos i mos ordena de no alegrarse de la kaida de su enemigo, asigun esta eskrito: “En caer tu enemigo, no te alegres” (Mishle XXIV, 16)
Dar su pedron
“Si el ofensor vyene para reparar la kulpa i demandar el pedron, deve ser pedronado de todo korason” (Rambam, Mishne Tora, Ilhot teshuva II, 10).
Ay en esto tres kondisyones:
– solo el ofensado puede pedronar en bivo, dinguno puede meterse en su lugar.
– la demanda de pedron deve ser sinsera, i el danyo deve tener sido reparado de antes. Es lo ke mos dize la Mishna (Yoma VIII, 9) : “Para las kulpas entre personas, el diya de Kipur no trae el pedron antes ke el danyo e sido reparado i ke el ofensor e obtenido el pedron del ofensado”.
– ama si aparese ke la ofensa no era la konsekuensa de una veluntad klara i negra, kale pedronar mismo antes de la demanda de pedron.
Amostrarse djusto kon el enemigo
Es una mitsva de traer a su enemigo una koza o un animal ke a pedrido, asigun esta eskrito: “Quando enkontrares buey de tu enemigo, o su asno traserran (errante), tornar lo tornaras a el” (Shemot, XXIII, 4). El enemigo, afillu si es enemigo, yene tyene derechos, i muestros deveres verso el no trokan.
Despues de la etika de la persona, vyene la etika sosyala
El semejante i el diferente
Asigun la Mishna, “al empesijo el Dyo krio un solo ser umano para ke dinguno diga al otro: mi avuelo es superyor al tuyo”. Dize tambyen la Mishna: “la diferensya entre el Dyo i un rey de karne i sangre, es ke el ultimo solo puede meter su kara sovre monedas i biyetes, kuando el Dyo metyo su semejansa en Adam sin ke dinguno de sus desendyentes sea semejante a otro” (Sanhedrin IV, 5).
El Midrash adjunta ke “de la misma manera ke las karas son diferentes, los espiritus son diferentes”. Por esto kale respektar a kada uno.
Ombres i mujeres
Es una mitsva de konsiderar el ombre i la mujer komo iguales, asigun esta eskrito: ” I crio el Dio al hombre en su figura (…), macho y hembra crio a ellos” (Bereshit, I, 27). La igualidad entre ombre i mujer sale de este teksto, porke ombre i mujer yevan los dos la figura divina ke el Dyo les dyo de la misma manera. Nada justifika dunke una kualkyer diskriminasyon entre ombre i mujer, ke sea en el dominyo relijyozo, sosyal o sivil.
(Aki avro una paranteza para akodrarvos ke vos esto meldando un artikolo eskrito por hahamim liberales. Asta agora, penso ke mas o menos todo lo ke vos meldi konveniya tambyen a los hahamim ortodoksos. Ama aki, sovre la igualidad entre ombre i mujer, sovre todo en el dominyo relijyozo, esto mas shupeli. No solo no ay mujeres hahamot ande los ortodoksos, ama mismo meldar la tora en la teva no pueden, i en una seuda deven de tenerse detras de los ombres. Me akodro tambyen ke el haham bashi de Paris, David Messas, aviya kerido impedir a la kantadera Talila de kantar delantre ombres, lo ke asigun la alaha es komo si se amostrava desnuda.
Lo digo dunke una vez por todas, el artikolo ke vos meldo es un artikolo liberal. Sovre syertos puntos, un artikolo ortodokso uvyera sido diferente, ama no es de mi kompetensya de bushkar a kada vez si ay diferensiya, i kuala es).
Eteroseksuales i omoseksuales
Los seres umanos son todos diferentes, komo dicho mas antes, i la Mishna mos kombida a dizir: “el mundo fue kriado a mi entisyon” (Sanhedrin IV, 5). La oryentasyon seksuala aze parte de las diferensyas ke egzisten en la sosyedad umana. Por esto no kale azer diskriminasyon kontra los omoseksuales, afillu si Vayikra XVIII, 22 dize ke la omoseksualidad maskulina es una abominasyon. Ni tampoko los omoseksuales pueden dar sus eskojimyento de vida en model para los eteroseksuales. Kale toleransya i respekto de las dos vandas.
Rasas
El profeta a dicho ke el Dyo komparava el puevlo de Israel a los Etyopyanos, asigun esta eskrito: “De cierto, como hijos de Ethiopios vos a mi, hijos de Ysrael, dicho de Adonay?” (Amos, IX, 7) Los hahamim dizen ke el Dyo, en kriando Adam, tomo tyerra de los kuatro rinkones del mundo (Targum Yonathan sovre Bereshit II, 7) komo para dizir ke, ande ke vaya, el ombre esta en kaza, i ke la kolor de su pyel, vinyendo de la tyerra tomada aki i aya, no da diferensya en la kualidad umana. I esto afillu si syertos pesukim dizen mal sovre antiguos puevlos komo los Moabites o los Ammonites.
Sivdadanos i ajenos
Es una mitsva de konsiderar el ajeno de la misma manera ke el sivdadano, asigun esta eskrito: “Como arreygado (sivdadano) de vos el peregrino el peregrinan con vos, i amaras a el komo a ti, que peregrinos fuestes en tyerra de Egypto, yo Adonay vuestro Dio” (Vayikra XIX, 34).
Djudyos i non djudyos
Muestra relasyon kon los non djudyos vyene de este mismo prinsipyo. “Rabi Yohanan se alevantava por respekto por las personas aedadas non djudiyas ” (Kidushin 33a) El djudyo ke ve a un savyo non djudyo dize una beraha: “Bendicho seas, Senyor muestro Dyo Rey del mundo, ke dates una parte de tu savidurya a los seres umanos”. Asigun un haham, Abbaye, “un djudyo deve bushkar de bivir en la mijor armoniya posivle kon sus serkanos, kon todo ser umano komo kon el non djudyo ke enkontra en la kaye” (Berahot 17a).
Djudyo por nasimyento i djudyo por eskojimyento
“Un non djudyo ke obedese a la Thora vale mas ke el Cohen Gadol el mismo” (Sifra sovre Vayikra XVIII, 5). Akodrar la orijen non djudiya de un proselito es konsiderado komo una ofensa grave (Baba Metsia, IV, 10) Toda persona konvertida al djudezmo deve ser syempre konsiderada komo djudiya, i toda diskriminasyon verso eya es kontrarya a muestra tradisyon.
Kapachedades i inkapachedades
Es una mitsva de no kastigar a los padres por las kulpas de sus ijos i a los ijos por las kulpas de sus padres, asigun esta eskrito: “no sean matados padres por hijos, y hijos no sean matados por padres, cada uno por su peccado seran matados”. (Devarim XXIV, 16) Por esto kale baldar la ley sovre el mamzer (bastardo venido de adultero) (Vayikra XXIII, 3) porke si kulpa ay, es la de su padre o madre, no la suya.
Aki yo, Edmond Cohen, kyero avrir dos parantezas:
– primera paranteza: so de akodro, por siguro, kon el pasuk de Devarim porke avla de kastigo penal; mi repuesta no seriya la misma si se avlava de reparasyon sivil. Syerto el ijo no es responsavle por su padre, ama el padre puede ser responsavle por su ijo ke kometyo una kulpa. Tyene un dever de guardya, i deve tener tino ke su ijo no aga danyo a los otros. Mas chiko es el ijo, mas grande es la responsabilidad del padre.
– sigunda paranteza: oy, el derecho franses da al bastardo los mismos derechos ke tyenen los otros ijos. Ama kuando yo empesi mis estudyos de derecho en 1953, no era ansina; el ijo nasido de djente non kazada resiviya solo la mitad de lo ke resiviyan los nasidos despues de kazamyento. Ama esto era bavajada al lado de la situasyon del mamzer (nasido de un adultero). Este no teniya dingun derecho, ni mismo el de resivir alimentos. Me akodro ke mi profesor de derecho rekonosiya ke el povereto de mamzer no meresiya de ser kastigado por la kulpa de su padre o de su madre, ama ansina era la ley. I muestro profesor mos sitava el titolo de un roman de Paul Bourget “Nos actes nous suivent” (muestras aksyones mos sigen), sözde ke los padres komen uvas vedres i las kriaturas tyenen dolor de dyente… lo ke nunka fue djusto! (Yirmiyau XXXI, 29; Yehezkel XVIII, 2)
Es solo en 1955 ke el mamzer nasido de un adultero tuvo el derecho de demandar alimentos, ama kon la kondisyon ke esto no valga rekonosensya de su filyasyon. Tuvo de asperar otros munchos anyos, asta 2001, para obtener a poko a poko su situasyon de oy.
Sovre estas dos parantezas tengo de eskapar esta emisyon. El kusur para el djueves ke vyene, si kyere el Dyo!
Artículos Relacionados: