El 26 Marso de 2015 va tener lugar una grande seremonia en Edirne, Turkia, para la re-inogurasion de la grande sinagoga de la sivdad, restotada a su estado orijinal. Esta grande i ermoza sinagoga fraguada en 1906-7 avia kayido a un estado de ruina total despues ke fue abandonada en 1983 kuando mas ya no avia bastante djudios en la sivdad. Finalmente en 1995 paso en mano de la Direksion Jeneral de Fondasiones (en turko: Vakiflar Genel Müdürlügü) para propriedades relijiozas, la kuala gasto mas de dos milyones de dolares para la restorasion de este manyifiko edifisyo.
Personajes importantes de Turkia i de otros paises estaran prezentes en la seremonia del 26 Marso, i munchos de la komunidad djudia-turka van a viajar a Edirne (el viejo Adrianopla) para la emosyonante okazion de la segunda aviertura del Kahal Kadosh Agadol (Synagoga Grande) ke su istorya reprezenta muncha gloria I muncha trajedia de la istorya del puevlo djudio de la sivda i del pais.
Istorya de los djudios de Edirne, en muy kurto
Kuando el Sultan otomano Murad I konkisto Adrianopla en 1391, los djudios Romaniyotes ke estavan establesidos aki desdel tiempo del emperador romano Adriano (117-138) se sintieron liberados de la opresion bizantina. Los otomanos trusheron ayi munchos imigrantes de evropa, entre eyos djudyos ashkenazis. Uno de eyos fue el famozo rabino Isak Sarfati, el primer granrabino de Edirne, ke en 1454 (un anyo despues de la konkista de Constantinopla /Istanbul por Mehmet II ) el mando una letra en ebreo a sus korelijionaryos opresados en Evropa, a ke vengan a aresentarsen en la libertad del imperyo turko.[i]
Despues de 1492, Edirne fue una de las primeras sivdades ande los djudios egzilados de Espanya se aresentaron i organizaron sus komunidad, I mas despues yegaron djudios de Portugal de Italia. Aparte de los sefaradim, ashkenazim, i romanyotes, avia tambien una komunidad de Karaim en Edirne. En el siglo 16 Edirne ya era un importante sentro komersial, i tenia su propria Yeshiva. Los djudios se okupavan de komersio en tekstiles, kueros, i vino, I de la produksion de kezo. Los djudios de Edirne se izieron muy emportante en la ekonomia. Munchos eran komersiantes I negosiantes kon Evropa. Siendo ke Edirne tuvo munchos fuegos (insendios) avia tambien djudios pomperos.
En Edirne lavoraron i bivieron munchos grandes hahamim. Entre eyos kontamos el famozo Ribi Yosef Karo(autor del Shulhan Aruh) ke bivio en Edirne entre 1520 i 1522, ande eskrivyo la grande parte de su famozo komentaryo Bet Yosef antes de emigrar a Tsefat/Safed. Shlomo Alkabetz (autor del famozo poema Leha Dodi ke se kanta en todas las kehilot del mundo en noche de Shabat) eskrivyo munchos livros emportantes en Edirne antes de pasar a Sefat tambien. Despues ke murio el kavo haham de la famiya Sarfati (Avraham, m. 1722) miembros de dos famiyas, Eskenazi (180 anyos) i Gheron (170 anyos), fueron los granrabinos de Edirne.
En 1666 Sabetay Sevi, el falso mashiah, fue yamado a Edirne para konfrontarse kon el Sultan, i aki se konvertio al Islam. Algunos djudios de Edirne tambien se konvertieron, i la influensa de Sevi kontinuo munchos anyos mas.
En Edirne por sienes de anyos djudios bivieron djuntos kon muslumanos en amistad I trankilidad. Los muzikantes djudios estudiaron la muzika turka, I kon la influensa del mistisizmo Sufi kreyaron la tradision de los Maftirim, imnos (piyyutim) de alavasiones I rogativas al Dio, munchos kompozadas del rav kabalistoIsrael Nadjara, kantadas en makames de muzika turka. (Aki un egzemplo: https://www.youtube.com/watch?v=ieipaPpSebM . Podesh sintir munchos mas en Youtube.)
El siglo 20, el Fuego, i la Grande Sinagoga
El senso otomano de 1906–7 top en 23,839 djudios. Antes de la Primera Gerra Mundial avia en Edirne 28,000 djudios (serka 10 mil mas de toda la povlasion djudia en la Turkia entera oy.) Ma en 1921–22 avia kayido a 13,000 a kavza de las emigrasiones I muertes durante las gerras I revolusiones en los anyos presedentes.
La primera eskola de la Alliance Israélite Universelle se avrio en 1867 para ijikos I en 1870 para ijikas. El eskritor , poeta, istoriador I jurnalista Baruh Mitrani (1847–1919) fue maestro, I tambien avryo otra eskola moderna, Akedat Yitzḥak, publiko livros de ensenyansa en ebreo i de gramatika de Judeo-espanyol, edito los primeros jurnales de Edirne en ladino I ebreo. Abraham Danon (1857–1925), fue istoriador, I fondo un seminaryo rabiniko. El jurnal La Boz de la Verdad (1911–22) se publiko en ladino i L’Echo d’Adrianople(1921-22) en fransez.
En 1905 en Edirne salyo un grande fuego (insendio), ke kemo todas las 13 synagogas de la sivdad. Al lugar de remplasarlas, la komunidad desido de fraguar solo un edifisio grande I elegante ke mostrava su modernidad I rikeza. Kon un ferman delSultan Abdulhamid se konstruyo la mueva sinagoga al stilo de la Leopoldstadter Tempel de Viena, kon kapasidad de 1,200 personas: 900 ombres I 300 mujeres. Esta sinagoga fue, I es dainda, la mas grande de la Turkia entera.
Problemas i Trajedias
Problemas para los djudios de Edirne avian empesado en el siglo 19, sovre todo kon las “akuzasiones de sangre” de sus vizinos kristianos, ma malorozamente mas graves okurensias empesaron pokos anyos despues de la aviertura de la mueva sinagoga. En 1913, durante la Gerra Balkanika, la Bulgaria okupo la sivdad por un sierto tiempo, I munchos emigraron o se fueron a bivir a Estambol. Munchos ombres soldados murieron en la gerra, I despues mas otros se deperdieron en la Primera Gerra Mundial, I sienes de mujeres kedaron agunot. Entre todo esto la ekonomiya deskayo muncho.
El Imperio Otomano vido su fin poko despues de la Primera Gerra Mundial, i la Republika Turka se fondo en 1923. La mas grande trajedia para los djudios de Edirne (I de Tekirdag, Kirklareli, i Chanakkale) fue el pogrom de junio – julio de 1934. Influensados por el nazismo evropeo i el ultra-nasionalizmo de la mueva Republika, grupos turkos (muslumanos) atakaron a kazas, negosios, i personas djudias, destruyeron, rovaron, i violaron. (Esta desgrasia en ladino lo yamaron “la furtuna”, ke es la tempesta.) Entonses lo mas se fuyeron a Estambol, i nunka mas aboltaron.
Durante la Segunda Gerra Mundial uvo la taksa del Varlik (rikeza) impozada kon grande indjustisia kontra los non-muslumanos, l la konskripsion de las 20 klasas, ke tomo a ombres para bataliones de lavor duro. Tambien la kriza ekonomika despues de la gerra, kavzo la emigrasyon de munchos djudios Edirnelis a Israel o otros paises. En 1948 avia kedado 2,750 djudios en Edirne, ma dainda la komunidad era bien organizada, I las institusiones de bienfezensia fonksionaron kuaje asta 1969, kuando avian kedado solo unos sienes de djudios. El ultimo haham izo aliya a Israel en 1966. El governo turko konfisko el semeterio djudio en 1975. Los pokos djudios ke kedaron uzaron el chiko Bet Midrash detras de la sinagoga para orasiones asta 1983. Oy no ay djudios en Edirne.
Tres mezes atras, el governador de Edirne avia mostrado sus sentimientos antidjudios publikamente, kuando disho ke siendo ke los soldados Israelianos avian entrado a la meskita de Al Aksa, el no iva permeter ke la sinagoga se avra komo sinagoga, ke iva ser solo un muzeo. Ma despues demando ekskuzas del Granrabino.
Ma esta semana se va inogurar komo sinagoga. Edirne, sivdad sin djudios, tiene la sinagoga mas grande, I mas ermoza de Turkia.
Memoria Personal
La kava boda en la sinagoga de Edirne fue la de Sara I Rifat Mitrani, en 1980 si no me yerro. Kuando estuve en Edirne en Oktobre 1991, fue Sara Mitrani, ke dainda bivia ayi, ke me yevo a ver la sinagoga. De afuera se viya las ventanas rotas i los pasharos entrando I salyendo del tejado. Pasimos la guerta seka de la entrada i suvimos los ekalones a la puerta del sanktuaryo. No avia menester de yave para entrar. Sara no pudo dentener sus lagrimas de ver la shena ke enkontrimos. Todo estava en un estado de ruina. Avia solo unas kuantas siyas rotas, lo ke kedo de las 900 siyas lavradas de tavla kara. Me disho Me disho Sara ke la djente las toman para kemarlas por lenya. No avia nada de los manyifikos abajures ke antes briavan i alelumbravan. En el tavan aviya un burako grande de ande se via el sielo, I pasharos bolavan adientro I enbatakavan enbasho. En mirando al taban (suelo) suzyo, topi unas ojas arazgadas de livro de tefila, las ultimas ke kedaron de tantos livros ke se uzaron en este sanktuaryo. Las alevanti, las sakudi, i las guadri. Despues de unos anyos se las mandi de regalo a un konosido en Florida, de la famiya Geron de Edirne.
Meldi ke la sinagoga restorada se va uzar para orasiones I por muzeo. Ansina el mundo va saver de la istorya glorioza I triste de los djudios de Edirne/Adrianopla.
Artículos Relacionados: