La istoria de los djudios de Trikala en Gresia

Por:
- - Visto 1767 veces

La sivdad de Trikala, en Gresia, ke es menos konosida por su komunidad djudia, es una de las mas antiguas de este paiz. Segun istoriadores eya fue fondada en el 4en siglo antes de muestra Era i es akodrada en los livros de Homero kon el nombre de Trika. En Trikala pueden ser vistos asta oy dia restos arkeolojikos de las epokas elenistika i romana, entre eyos parteres de mozaika, banyos i stoae (largos koridores ke de una parte tienen paredes i de la otra kolonas. Estos koridores servian en el pasado a merkaderes ambulantes a vender sus merkansias).

Trikala es situada en la rejion de Tesalya, a unos 328 kms. al Norte-Este de Atena, a 145 kms. de Ioanina i a 244 kms. al Sud-Oeste de Salonik.

Los primeros djudios ke bivieron en Trikala fueron los romaniotes ke yegaron ayi durante el treser siglo, i un testimonio a esto son dokumentos ke datan de la epoka del Imperio Bizantino.


Los djudios ke bivieron largos anyos liberos i gozaron de un enfloresimiento ekonomiko. basho el II Imperio Bulgaro, se djuntaron a los bulgaros en sus gerra kontra el Imperio Otomano. Komo vengansa a este komporto de los djudios, el Sultan Beyazit I tomo kon si un grande grupo de eyos komo esklavos, ke lavoraron en lavoros forsados.

Yegando a Estambol, la kapitala del Imperio Otomano, estos djudios exilados, formaron ayi una chika komunidad ke a lo largo de los anyos se absorbo alientro la grande komunidad sefaradi, formada por los djudios ke avian sido ekspulsados de Espanya.

Entre los anyos 1520-1530 avia en Trikala 181 famiyas djudias i verso la metad del siglo 16 bivian ayi 1000 djudios, entre eyos djudios refujiados de Hongria.

Los djudios de Trikala se avian organizado en tres komunidades diversas, segun sus lugar de orijin: los romaniotes, los sefaradis, i los sisilianos i kada komunidad tenia su keila. La mas grande komunidad era la sefaradi ke avia atado buenas relasiones kon el rabino Yaakov Even Habib i tambien kon su ijo, el rabino Levi Even Habib, ke enkaveso una yeshiva en Saloniko i mas despues en Yerushalayim.

Estos djudios se mantuvieron prinsipalmente de la industria de lana i del komersio de kueros. Munchos de entre eyos tuvieron relasiones komersialas kon otras sivdades de Gresia, entre eyas, Larisa i Arta i tambien viajaron a sivdades komo Venezia i Ragusa.

En lo ke konsernava diversas kestiones juridikas, los rabinos de Trikala se akonsejavan kon los famozos rabinos de Saloniko, entre eyos, el rabino Avraam Amarilyo, autor del livro “Brit Avraam”.

De dokumentos de viajadores ke avian pasado por Trikala sovresale ke verso la fin del siglo 18 (1779) avia ayi un muy chika komunida djudia ke estava biviendo en la provedad; 1873 la situasion ya se avia amejorado i el numero de los djudios avia yegado a unas 700 almas.

Kon el eskayimiento del Imperio Otomano, ke rezulto en una dura kriza ekonomika i el despertamiento del nasionalizmo en Gresia, la chika komunidad djudia de Trikala sufrio de atakos, rovos i asaltos.
A los prinsipios del siglo el numero de los djudios en Trikala era de unas 800 almas, ke se mantenian prinsiplamente del komersio de ropas i de kambio de moneda. En la komunidad avia un koro de kreaturas, un Talmud Tora, 3 kales i un mikve (banyo ritual). Ma aun kon todo, sus vida en Trikala se avia trokado enormamente i los djudios empesaron a ser persigidos por los gregos ke los akuzaron de uzar la sangre de ninyos ke matavan, para las matsot ke azian en la fiesta de Pesah. Es djustamente en este epoka tambien, al prinsipio del siglo 20, ke se empeso a formar en esta sivdad una organizasion sionista i ke fue avierto en la sivdad el primer buro de la organizasion Hovevei Tsiyon.

Kon el desbrochamiento de la gerra entre Italia i Gresia, avia en la sivdad unos 500 djudios solamente. En Avril 1941 la Almanya nazista avia okupado Gresia ke fue despartida en tres rejiones: almana, bulgara i italiana. Trikala kedo en la rejion italiana, asta ke en 1943 la Italia fashista firmo su kapitulasion frente a las fuersas aliadas i los almanes okuparon esta rejion tambien. 450 de los djudios de Trikala reusheron a fuyirsen a kazales asolados en las montanyas, o se fuyeron a Turkia i de ayi vinieron a Erets Israel.

En el 25 de Marso 1944 los nazistas reusheron a aferrar a 50 djudios de Trikala ke fueron embiados al kampo de la muerte Auschwitz, de ande no tornaron.

En 1946 lo ke avia kedado en Trikala era 267 djudios, i en 1967 este numero menguo a 100 almas solamente. A los prinsipios del siglo 21 la muy chika komunidad djudia de Trikala ya no kontava mas de 50 almas. En la sivdad ay un kal i un simeterio djudio ke fue profanado por neo-nazistas gregos. El fue restorado por los miembros de la komunita.

Acerca de Central de Noticias Diario Judío

Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: