Vos diré unos kuantos byervos sovre la ley votada definitivamente por el Parlamento espanyol el 11 de junyo.

No kije dizir nada sovre esta ley antes de tenerla meldado sovre un sityo ofisyal, tal ke fue votada al kavo. Aki tenesh el teksto: http://esefarad.com/?p=64457

Kale akodrar ke la ekspulsyon de los djudyos de Espanya en 1492 fue un krimen kometido por el poder espanyol: echar a la mar miles de djente, kriaturas, vyejos, hazinos, mujeres prenyadas, despues de arrovarles todas sus paras es un krimen kontra la Umanidad (dunke impreskriptivle), i, tambyen, un krimen krapulozo, syendo ke las viktimas fueron arrovadas de sus monedas por el Estado.

Esto es la Istorya.

Oy el poder espanyol dize ke se arrepyente, komo disheron los Almanes. Salvo ke los Almanes meten kondisyones de rikeza para indemnizar. Una viktima djudiya ke tyene bastante moneda asigun los Almanes no va ser indemnizada afillu ke fue viktima. Es komo si uno ke firyo alguno kon su araba le va pagar solo si firyo un prove.

De la misma manera, el governo espanyol mete kondisyones para rekonoser la nasyonalidad espanyola a los erederos de las viktimas:

La primera kondisyon, i esto es una koza ke se puede entender, es ke el ke demanda de aprovechar de esta ley trayga la preva ke es sefardi, i komo tal desendyente de los ke fueron echados a la mar.

Malorozamente, a esta kondisyon normal la ley mete tres otras kondisyones, sino mas, ke me paresen kada una totalmente inakseptavles:

1°) primera kondisyon, demandar la nasyonalidad espanyola en los tres anyos.

I despues? Un sefaradi pyedre la nasyonalidad ke le a sido rovada? Por ke razon?

2°) Sigunda kondisyon: en mas de todo lo ke van a kostar las sumas de pagar para un notaryo, para viajar verso un Instituto Cervantes, ets, pagar un vergi de 100 euros.

Asigun mi, el Estado espanyol ya se pago de antes kon toda la para ke se arrovo de los djudyos aze 520 anyos, i los interes ke korryeron durante estos sinko siglos i mas.

3°) Tresera kondisyon: amostrar una “vinculacion” (atadijo) kon Espanya (sertifikados de estudyos de istorya i kultura espanyolas: konosimyento baziko de la lingua espanyola, nivel A 2 (?), konosimyento de la Konstitusyon espanyola i de la realidad sosyal i kultural espanyolas).

Esta tresera kondisyon se entendriya para uno ke demanda a entrar en el puevlo espanyol. Mozotros no demandamos nada. Es el governo espanyol ke dize kerer darmos djustisya.

Los ke votaron esta ley no kijeron entender ke si keriyan reparar el krimen kometido en 1492, kaliya empesar por baldar el Edikto kriminal de 1492 komo lo izo el governo franses por las leyes de Vichy. Edikto de dinguna valor. En este kavzo, los djudyos nunka pedriyeron sus nasyonalidad espanyola i la trasmetyeron a sus erederos. Tenemos derecho a esta nasyonalidad (si la keremos, lo ke no es mi kavzo). i no deve aver otra kondisyon ke prevar ke somos estos erederos. I el Estado espanyol, el mismo eredero de los kulpavles, no tyene de someter muestra nasyonalidad a kualkyer otra kondisyon.

No somos sedakeros ke demandan la nasyonalidad espanyola komo una limosna.

Tal ke fue votada, esta ley es INAKSEPTAVLE i deve ser REFUZADA por los sefaradim.

Kale ke se aunen para avlar de una sola boz. No va ser koza kolay. Ama es una kuestyon de dignidad.

Esto dicho, vos dezeo de pasar buenas vakansas de enverano. Me podresh eskuchar kada djueves en redifuzyones, i, si kyere el Dyo, mos toparemos de muevo en direkto el djueves 3 de septyembre.

Salud buena a todos!