Keridos amigos i amigas
En el Jewish News meldi un artikulo presentado por “Zelda Cowthorne” tratando de “David Krakauer” ke djuga una meskla de Jazz i Klezmer. Esta banda se prepara a venir a Sydney i Melbourne
Saludes a todos
——————————————————————————-
LA MESKLA DE JAZZ I KLEZMER
Por 30 anios “David Krakauer” djugo a traves el mundo el Jazz kon el Klezmer mesklado. Un tiempo tenia la esperanza de djugar el violin kuando tenia 10 anios. Su madre lo deskorajo en siendo eya una violinista buena. Le disho ke era demasiado aedado.Puedeser ke keria ke David tenga una chikes normala, sin pressiones. Le sujero ke se interese mas a los instrumentos de viento. La madre no puedia imajinarse ke David dentro un anio seria passionado por la klarinet. Ke seria mismo konosido en el mundo. Topo su lugar en la virtuosidad de los Judios del Este de Europa, ke era el Klezmer.
David esta aziendo un tur del mundo ke dura 2 mezes. En primero se va a Fransia, despues ensenya en Siena/Italia, despues se va a Krakow en Polonia aziendo un lavoro nuevo kon “Kathleen Tage”, viene a la Australia i termina en Prague. Kathlene Tage es una pianista nasida en Sud Afrika i la pareja de su vida. David tuvo un otro amor kuando tenia 11 anyos. “Sidney Becket” le avia dado un album del Jazz de New Orleans. Se aserkava de su Bar Mitsva i se sentio komo un adulto al oír a Sidney Becket. En los anios 60 sus amigos eran interesados en el Rock i el azia improviziones de Jazz.
En sus 20, David tuvo una kriza de konfienza i no pudo topar su boz. En la próxima dekada se devuo a la músika klásika ke era la musika de sus ansestros, siendo un nieto de Judios Polakos i Rusos, topando un santuario en Amerika, en 1989 se dio al Klezmer I en 1996 formo la Banda “Klezmer Madness”. Se torno a una sensasión internasional, performando en “Carnegie Hall”, en el Teatre des Champs Elysees, en BBC Prom I en el Biennale di Venezia. Klezmer kon Jazz se ivan bueno. Despues se ajunto al grupo el “Rapper Canadiano Judio” Josh Dolgin” kreando una musika ke plazia a los mansevos. Formaron una Banda nueva “Abraham Inc.”
David performo tambien en orkestras Europeas i Amerikanas. Djugo la musika Judia en Argentina I fue nominado por Grammy Awards en 2015. 11 anios antes un ekipo de kamera kapturo a David kon trompetas, trombones i shofar djuganda en una shara en Polonia. Era ‘Tekyah’, kommissionado por BBC para kommemorar los 50 anios de la Liberasion de Auschwitz. Fue algo inolvidable kon unos musisianos ke eran Judios. Despues se fue a “Juillard’ i eskrivio el konserto performado en Detroit Symphony. Gano 50.000 Dolares en el “Premio’Azrieli’ de la músika Judia.”
Su ija Alicia se esta aziendo kantante amator i su padre William esta en retreta i antes era psikiatro i kantante deshando su marka en el kabaret. Tiene 91 anyos i es aktivo dainda.
Trezladado por Simon Geron
Sydney
Artículos Relacionados: