Ke grande plaser es de ver la dulse primavera,
Komo si fuera ke otra vida me espera,
Veyo de akel largo esfuenyo espertarse,
I kon akeas hermozas kolores alusarse.
Kamino entre los arvoles yenos de flores,
Respiro sus aromas en dando mis lores.
Debasho de un sielo klaro, yo kon alegria,
Pizo las yervas …, de leshos una melodia
Komo burlarse de las inyeves i los friyos,
Siento kantar los pasharos …. , ke plazeres miyos.
Las aguas de los rios korren kon alegrias,
No puedre olvidar el plaser de estos dias.
Penso komo si fuera un regalo de la natura
Salvandomos de los friyos i de la vida dura.
Las kriaturas kontentes, son yenas de gozo
Saltan, djugan debasho de este sol hermozo .
Estuve akodrandome mi juventud de antes,
Se rebivyeron mis vyejos amores i mis kantes.
Artículos Relacionados: