Janusz Korczak
Un martirio de la lucha por el merito de la kreyatura
Nasido en Varsha en una famiya djudia asimilada, Korczak dediko su vida a kudyar a las kteyaturas, tanto djudios komo non-djudios. Kreia ke las kreyaturas siempre deven ser eskuchadas i respektadas. Esta perspektiva se refleta en sus varias ovras para i sovre las kreyaturas.
Kuando los djudyos de Varsha fueron transferados al geto, refuzo de konsedar a los ofres de de sus amigos polakos a eskonderlo en la sivdad. El 5 del agosto, 1942, durante una ola de deportasiones del geto, los nazistos detuvieron a Korczak i sus ayudantes, ansi ke a las 200 kreyaturas del orfelinato, basho su direksion.
Todos fueron deportados a Treblinka, ande fueron eksterminados.
Mediko, eskrivano i edukador, Janusz Korczak, era el pseudonimo de Henryk Goldszmit, Su padre fue un avokato logrado ke avia sufrido de una infirmidad mentala, kuando Korczak tenia onze anyos. Esto fue un golpe duro para su famiya i una trauma, ke iva refletar su sombro sovre Korczak a traverso su vida.
Ainda kuando estudiava la medisina en la Universidad de Varsha, Korczak fue atirado por los sirkolos de edukadores i eskrivanos liberales de Polonia. I kundo empeso a pratikar la medisina, se dediko a ayudar a los proves, todo en kontinuando a eskrivir. Sus primeros livros, Los Ninyos de las kayes (1901) i Un Ninyo de Salon susitaron un grande intereso. Lavoro en un ospital djudyo de kreyaturas i tomo grupos de ninyos a kampamientos de enverano. En 1904 fue rekrutado a la Armada Rusa komo mediko, i fue mandado a la Asia Orientala. En 1908, empeso a lavorar kon los guerfanos.
En 1912, fue nominado direktor de un muevo i grande orfelinato djudyo en la Kaye Krochmaina, en Varsha. A lo largo de su kariera, su partner en su lavoro era Stefania Wilczynska, una valoroza edukatora, ija de una famiya djudia rika. Stefania influenso a Korczak i su kariera, todo en dedikando su vida al kudyo de los guerfanos.
Durante su lavoro en el orfelinato, Korczak investigo los sekretos de la alma de la kreyatura, i fue ayi ke efektuo el uzo de sus ideas edukativas. Korczak defendio la komprehansion de la vida emosionala de las kreyaturas i sus respekto.
En 1914, Korczak fue de muevo yamado para servir en la Armada Rusa. Es en los ospitales militares i en las bazas ke redijo su importante ovre Komo Amar a las Kreyaturas. Despues de la gerra abolto a Polonia. Kontinuo a a lavorar en el Orfelinato Djudio, ansi ke se kargo de un orfelinato polako en aplikando sus metodos ke ya avia intruizado en el orfelinato djudyo.
El metodo pedagojiko de Korczak era bazado sovre el developamiento del sentimento de responsabilitad del ninyo, de akordarlo un estatuo egualitario komo un adulto, todo en respektando su dirito a la kompasion i a la independensia. No kale olvidar ke todos estos preseptos fueron lansados en el empesijo del siglo pasado, epoka ainda konservativa i septika, konsernando korientes renovadores o liberales i andemas, sovre la edukasion infantila.
En sus numerozos livros – komo, El Rey Matthew Primero (1922), Kuando Sera de Muevo Ninyo (1925), i en su ovra teoretika El Dirito del Ninyo al Respekto (1929) – Korczak destaka el konflikto sosial entre el ninyo i el adulto en una sutuasion kuando el poder i el kontrol se topan eb el adulto, de mizmo ke, kuando el adulto no entiende o refuza de entender el universo del ninyo, i lo depriva de su merito.
“Un ninyo no deve ser konsiderado komo una koza a ser formada i kapasidada para adoptarse a los adultos, sino mas ke komo una alma rika en persepsion i ideas, ke deven ser observadas i eskuchadas komo su proprio domeno otonoma. Kada ninyo deve ser tratado asigun sus inklinasiones i aspirasiones, ansi ke las kondisiones en laskualas esta kresiendo i ke nesesitan respekto i komprehansion.”
En el final de la dekada 1820, Korczak reusho a implementar su plano de muncho tiempo de fondar un semanal para kreyaturas en tanto ke suplemento del diario djudyo, Nasz Przeglad,ande las kreyaturas relataron sus eksperiansas i sus opiniones. Korczak fue famozo en Polonia i en el mundo por sus teorias pedagojikas progresistas.
En la meatad de los anyos 1930, la kariera de Korczak fue golpeado por un trokamiento. Despues de la muerte del diktator polako, Jozef Pilsudski, el poder polítiko en el payís fue akaparado por la ala de la derecha radikala, aviertamente antisemita. En konsekuensia, Korczak fue removado progresivamente de sus postos, lo ke provoko una grava desepsion. En segito, Korczak empeso a interesarse en la kavza del Sionismo i en el establisimiento de una komunidad djudia en Palestina.
En 1934 i en 1936 vijito Eretz Israel, kedandose por un kurto tiempo en el Kibutz Ein Harod, ande se renkontro kon algunos de sus eks-alumnos, konvertidos en halutzim – pionieros del nasiente Estado Djudio. Esta eksperiensa kedo markado en la alma del edukador veterano, ke estuvo en debatiendose entre permaneser en Israel, o aboltar a sus guerfanos. Ma, en refleksionando ke kedarse en el kibutz en abandonando sus guerfanos, estos ninyos de la kaye, iva ser una opsion egoista por el devuado mediko de Varsha, desidio de aboltar. Todo en saviendo ke seria devorado por el lovo. Agora, aun ke aedado i kansado, retorno para prezervar i protejar su orfelinato – la unika alternativa ke puederia akordarle la fuersa de sobrebivir.
Amigos polakos de Dr. Korczak ke fueron a verlo, le informaron ke puederian kitarlo del geto i le ofresieron azilo en la parte polaka de la sivdad. Ma, el no fue pronto a abandonar a los ninyos, i salvarse el solo.
El 6 de agosto, 1942, un diya de djuegeves, los alemanos deportaron a Korczak, sus ayudantes i los 200 ninyos del orfelinato de la Kaye Sienna en el geto, ande avian sido transferados de la Kaye Krochmalna. Un testigo de sus marcha al treno de de deportasion ke se topava a tres miles de distansi avia ansi deskrito esta sena:
“Esto era una protestasion sin palavras, organizada kontra el asasinato. Los ninyos kaminaron en filas de kuatro, kon Korczak yevandolos, mirando delantre i tomando de kada lado la mano de una kreyatura“.
Nunka no se supo nada de este ultimo viaje para Treblinka, ande todos fueron aniilados por los nazistos.
Artículos Relacionados: