En la meza del pranso, dospues de komer el hoshaf/komposto de frutas, fui a la tiya Beki i me ekskuzi de la meza para ir i ver la guerta. Ya aviyamos eskapado de komer i me dyo la permisyon.
El kortijo de la kaza de mi tiya ke da paso a la guerta era una maraviya. Ande se pisa, estava echo kon pyedras de riyo de diferentes kolores.. El ke izo este echo deviya ser un grande artisano..
Del kurtijo entrando a la guerta aviyan rozas koloradas, amariyas i rozadas a las mil maraviyas. Allado de las rozas aviya una linya de otras flores de multiples kolores. Adelantre briyavan lo ke aviyan sembrado : Tomatas, pimyentones vedres, lechugas, berendjenas, bamyas i otras vedruras ke dayinda no aviyan dado florisitas. Todo esto estava bien kudyado, en su lugar i echo kon muncha savyedura.
Ah mi puevlo sefaradi…! Saven azer de todo i ke bien ke lo azen !…
Aviyan sinko arvoles : UNA DE IGOS, DOS DE BIMBRIYOS, UNA DE MUEZES ANDE LA FRUTA YA ESTAVA VEDRE I PRONTA PARA KOMER I UNO DE SHEFTALI (Peach).
En frente de la kazika ande moravan los ayudantes de mi tiya, en el patyo chikitiko, estavan asentadas sus dos ijikas. Pishin YAKO i yo korrimos a avlar kon eyas. La ijika grande ke paresiya de la mizma edad miya teniya unos ojos gris ke ya me estava enamorando de eyos. El fostan largo kon miles de kolores i kon embroderias de seda. Teniya una boz de BILBIL ke me estava emosyonando. Yako mi ermaniko estava avlando kon la ija chikita. Yo digo ke ya eramos amigos “avlando” kon esta ermozura kon ojos GRIZ VEDRIZIKOS. Eya me disho ke me iva amostrar un sekreto. Me tomo la mano i me yevo a la fin de la guerta ande ay una puerta kampesina i fuimos para avrirla i ver el
sekreto…
Artículos Relacionados: