Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 7 de djunyo, de las dos a las kuatro i medya, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
La semana pasada, de muevo tuve de empesar mi emisyon sovre Yitzhak Shamir kon dos minutos de retadro, i malgrado mis esfuersos, no alkansi astal kavo. Vos estava meldando unos pedasos de los dos diskorsos de Shamir a la konferensya internasyonala ke se tuvo en Madrid en 1991.
Despues de esta konferensya, Shamir se va kedar primo ministro asta el 13 de djulyo 1992, ama pyedre las eleksyones. En 1993, desha la direksyon del Likud, i va ser un syerto Binyamin Netanyahu ke va venir detras de el a la kavesa del Likud. Shamir lo topa demaziya flako frente a los arabos i dechida de salir del Likud en 1998, i entra en el partido Herut de Benny Begin (el ijo de Menahem). Despues ke Netanyahu pyedre las eleksyones, Shamir entra de muevo en el Likud para sostener Ariel Sharon.
Ama a poko a poko Shamir pyedre su salud, i es esta desgrasya de hazinura de Alzheimer ke lo aharva. Shamir va bivir asta el 30 de djunyo 2012. Va tener funerales nasyonales, i ser enterrado en el Monte Herzl.
Kada uno puede pensar lo ke kyere de este ombre, a la vez matador i primo ministro. Ama una koza es sigura: su eskopo no era de enrikeserse o de kedar al poder para el poder. Su eskopo era su idea del syonismo, para el byen de su tyerra i de su puevlo.
Ansina se eskapa mi emisyon de la semana pasada.
Para oy, pensi de kedarme sovre Israel, a propozito de la rezolusyon de la Unesco del 16 de avril pasado, kondenando Israel, esto no es muevo, ama lo ke arravyo a los djudyos fransezes es ke fue votada por la Fransya myentres ke otros paizes, no solo los Estados Unidos ama tambyen de Evropa komo Almanya, Ingletyerra o Holanda votaron kontra, o, komo Italya o Gresya, se abstuvyeron.
Ya me konosesh: me plaze syempre empesar por el empesijo, i el empesijo no es la Unesco, es su madre la ONU, i mismo, antes de eya, la SDN.
Deke empeso por la SDN? Porke no me parese sin provecho de akodrar ke es la SDN ke, el 24 de djulyo 1922, dyo mandato a Ingletyerra de (artikolo 2) “meter el Pais (Palestina) en kondisyones politikas, administrativas i ekonomikas ke permiteran el establesimyento de un ogar nasyonal djudyo i el desvelopamyento de institusyones de governo independente (self governing) i tambyen de sovreguadrar los derechos siviles i relijyozos de los moradores siviles de Palestina, sin konsiderasyon de rasa o de relijyon”.
Asigun el artikolo 6, “la Administrasyon de la Palestina (…) fasilitara la immigrasyon djudiya (…) i enkorajara (…) establesimyento kompakto (close settlement) de djudyos en el pais.”
Komo todos lo savesh, los Inglezes, ke por tanto, desde 1917, kon la Deklarasyon Balfour, aviyan aprometido “el establesimyento en Palestina de un ogar nasyonal para el puevlo djudyo”, no fasilitaron la imigrasyon djudiya i el establesimyento kompakto de djudyos en el pais. A la kontra, a la ora ande los Almanes matavan los djudyos por miliyones, serraron kaji enteramente la entrada de los djudyos en lo ke deviya ser un ogar nasyonal.
Savesh tambyen el fyasko ke fue la SDN, ke no pudo azer nada para impedir la sigunda gerra mundyala, ni tampoko las agresyones de antes, komo la invazyon de la Mandchuriya por los japonezes en 1931 o de la Etyopiya por los Italyanos en 1936 o de la Kina por los japonezes en 1937.
Por esto es ke, pishin despues de la sigunda gerra mundyala, en oktovre 1945, se avriyo la Organizasyon de las Nasyones Unidas., i un mes despues en novyembre la UNESCO (Organizasyon de las Nasyones Unidas para la Edukasyon, la Syensya i la Kultura).
Es la Organizasyon de las Nasyones Unidas ke, el 29 de novyembre 1947, voto, a la mayoriya nesesarya de los dos tyersos, una rezolusyon istorika, achetando el Plano de una Komisyon de la ONU propozando un plano de espartimyento de la Palestina entre un estado djudyo i un estado arabo. Los djudyos achetaron este plano i fundaron sus estado kuando se eskapo el Mandato ingles, los arabos no lo achetaron, aprovaron de echar los Djudyos a la mar, i no solo no reusheron, ama pedryeron por la gerra una parte de los territoryos ke les dava la ONU.
Las kozas kedaron ansina de 1949 asta 1967. Durante estos todos anyos, los Transjordanyanos okuparon la parte este de la Palestina inkluyendo la parte este de Yerushalayim, i por esto trokaron el nombre de la Transjordaniya para yamarla Jordaniya. Dingun djudyo pudo entrar en Jordaniya, i dunke no era kuestyon para un djudyo de pueder ir a orar ni delantre el Kotel (la Pared) ni en dingun lugar santo de los Djudyos komo Hevron o Bethlehem.
Durante este tyempo, los Jordanyanos destruyeron las tombas djudiyas i utilizaron las lajas de las tombas para fraguar privadas, sin ke ayga dinguna protestasyon de la Unesco, syendo ke no se puediya saver si no aviya dingun djudyo para verlo i kesharse.
Es solo despues de la gerra de los sesh diyas ke los Israelyanos alkansaron a los monumentos djudyos de Yerushalayim i de los territoryos pedridos por los Jordanyanos. Agora los djudyos puediyan kesharse, ama de una parte lo ke aviya sido echo era pasado, i de otra parte la Unesco, komo la ONU en jeneral, era basho la dominasyon de los arabos aliyados kon los paizes komunistos, i en primero la URSS.
Vyendo esto, el prezidente fransez De Gaulle, en 1960, yamo a la ONU “le machin”. Komo trasladar le machin en muestra lingua? No es koza kolay. Diré la koza, el marafet… Albert Cohen, ama esta vez avlando de la SDN, la yamava “une ruche bourdonnante et sans miel” (un bizbar sonando i sin myel) Penso ke de Gaulle keriya dizir la misma koza…
El 13 de novyembre de 1974, Yasser Arafat, el revolver a la vita, fue resivido i ovasyonado a la Asamblea jenerala de la ONU.
El 10 de novyembre 1975, la .Asamblea Jenerala de la ONU voto una rezolusyon 3379 konsiderando ke “el syonismo es una forma de rasismo i de diskriminasyon rasyala”. En favor de la rezolusyon, ke fue adoptada, votaron 72 nasyones (todos los paizes arabos i muzulmanes, todos los paizes komunistos, ama tambyen paizes komo Mexico o Brazil, la Indya, el Iran del Shah i la mas grande parte de Africa ); 35 nasyones votaron kontra (Israel, Estados Unidos, Canada, Uruguay, i la mas grande parte de Evropa del oeste, inkuyendo la Fransya) i 32 se abstuvyeron.
Israel tuvo de asperar asta el 16 de desyembre 1991, kijo dizir la kaida de los komunistos, para ke sea votada por la ONU una rezolusyon baldando la rezolusyon de 1975. Esta vez la rezolusyon de baldamyento fue votada por 111 nasyones, inkluyendo munchas de las ke aviyan votado la de 1975, komo Mexico, Brazil o la Indya. Los paizes muzulmanos votron kontra, salvo la Turkiya ke se abstuvo.
Ama no kale pensar ke desde 1991, las relasyones entre la ONU i Israel son buenas. Todos ya savesh ke la mayoriya del tyempo de la ONU es konsagrado a kondenar Israel, el pais el mas kondenado de todos…i kale ver por kyen! Solo vos akodro ke es la Libiya de Khadafi ke fue elijida en 2003 prezidente de la Comisyon de la ONU por los derechos humanos, por 33 votos sovre 53, 17 abstensyones, i solo 3 votos kontra!
En kuanto a la Unesco, kale akodrar komo, al kavo de 1974, sin votar de manera ofisyala la ekskluzyon de Israel, fue yene votado kaji la misma koza: En la organizasyon de las rejyones ande puediya lavorar kada pais, Israel se topo en dinguna rejyon! Israel keriya toparse en la rejyon Evropa, le fue refuzado sin ke sea resivido en otra rejyon en lugar de esta.
Esto dyo nasimyento a un grande eskandalo, i los Estados Unidos kedaron de dar paras a la organizasyon de la Unesco.
Las kozas se apasiguaron mas despues, ama kuando la Unesco izo entrar la Palestina en sus myembros, Israel i los Estados Unidos se kedaron de muevo de pagar, i por esto no tyenen mas derecho de votar desde 2011.
El 21 de oktovre 2015, la Unesco voto una rezolusyon dizyendo, asigun lo ke meldi, ke la tumba de Rachel i la grota de Hebron “azen parte integrante de la Palestina”. Los djudyos se kesharon ke la Unesco voto ke estos lugares sagrados para los djudyos eran pretendidos “muzulmanes” i mismo, solo muzulmanes. Me parese ke es una negra meldadura. La rezolusyon dize mas una koza jeografika i politika ke relijyoza, asigun mi.
Para esta misma rezolusyon, los arabos aviyan demandado de votar tambyen ke la plasa “Al Buraq”, kijo dizir la Plasa del Kotel, aziya parte del Haram al Sharif (el Noble sanktuaryo, lo ke los oksidentales yaman la Esplnada de las Meshkitas i los djudyos el Monte del Templo). Si la plasa aziya parte del Haram al Sharif, esto keriya dizir ke la Pared tambyen, i ke dunke era un lugar muzulmano i no djudyo. Tanto gritaron los israelyanos ke, al kavo, los arabos travaron esta demanda.
Penso ke, mismo si me tomo bastante tyempo, era bueno de akodrar un poko esta istorya de las relasyones entre la ONU, la Unesco i Israel antes de alkansar a la rezolusyon de la kuala todos avlan, la rezolusyon del 16 avril pasado tomada por el Consejo egzekutivo de la UNESCO, intitolada “Palestina okupada”.
(A propozito de Palestina okupada, kale syempre akodrar ke estos mismos territoryos fueron okupados, i mismo aneksados, por la Jordaniya entre 1948 i 1967, kijo dizir durante 19 anyos, sin ke la ONU se preokupe de esto ni una sola vez)
Munchos avlaron de esta rezolusyon, ama no so siguro ke todos la meldaron.
Vos akonsejo, keridos oyentes, para azervos vuestra propya opinyon, de ir a meldarla sovre internet. Kale ir sovre el sityo de la Unesco yamado unesdoc, i aya bushkar la session 199 del Consejo executivo: aya toparash la rezolusyon sea en franses sea en ingles:
http://unesdoc.unesco.org/images/0024/002443/244378f.pdf
http://unesdoc.unesco.org/images/0024/002443/244378e.pdf
En un paragrafo 5, la Unesco “déplore vivement” (se kesha kon fuersa) ‘”ke Israel, el poder okupante, no a kedado las eskarvaduras (fouilles, excavations) i lavoros echos syempre en Yerushalayim-este, en partikolar adyentro i a los alrededores de la Vieja sivdad, i demanda de muevo a Israel, el poder okupante, de proibir todos estos lavoros”.
Oitesh byen, keridos oyentes: la Unesco, ke pretende lavorar para syensya, edukasyon i kultura, proibe de azer eskarvaduras arkeolojikas, porke esto no plaze a los arabos. Sin komentaryo…
Despues la Unesco se kesha de varyas kozas, i en partikolar, lo ke inyervo muncho a los israelyanos, de “instalar falsas tombas djudiyas en lugares de simetaryos muzulmanes”. Se kesha tambyen de varyas fraguas por Israel, inkluyendo un projekto de asensor “plasa Al Buraq, yamada tambyen, entre parantezas i komiyas (guillemets, inverted commas): (“Plasa de la Pared Oksidentala”).
Se kesha tambyen de Israel a propozito de lo ke se yama la Suvida de los Mograbis, se kesha del blocus de Gaza
I despues, mantyene ke la Tumba de Rachel i la Grota de Hebron azen parte de la Palestina, esto ya fue votado en 2015, komo ya vos dishe, ama adjusta ke Israel es rogado de travar “los dos sitos palestinyanos de la lista del patrimonyo nasyonal israelyano”.
Vos di en muy kurto el prinsipal de esta rezolusyon ke aze sinko pajinas.
Komo ya lo savesh, desde ke salyo, pishin Netanyahu konsidero ke “esto es una mueva desizyon absurda de la ONU” ke “deskonese el atadijo uniko entre el djudaismo i el Monte del Templo…La ONU esta reeskrivyendo la istorya umana i amostra de muevo ke es kapache de una basheza sin kavo”.
Despues de Netanyahu, protestaron kontra esta rezolusyon kaji todos los djudyos, sovre todo los fransezes arravyados ke la Fransya aya votado la rezolusyon, a la kontra de los inglezes o de los almanes ke votaron kontra.
Las protestasyones vinyeron de todas partes, ke sea el hahambashi de Fransya, los prezidentes de asosyasyones djudiyas, el deputado Meyer Habib, i munchos otros.
Roger Cukierman, prezidente del CRIF, Consejo reprezentativo de las institusyones djudiyas de Fransya, eskrivyo una letra al Prezidente de la Republika, ke aspero 20 diyas para dar una repuesta ke no agrado a Cukierman.
http://www.actuj.com/2016-05/france/3512-exclusif-ce-que-francois-hollande-a-ecrit-au-crif-a-propos-du-vote-a-l-unesco
El deputado Meyer Habib a eskrito tambyen al Prezidente de la Republika una letra muy fuerte ande dize ke la Fransya “se a dezonorado el 16 de avril 2016”. “Es basho la administrasyon israelyana, ke por la primera vez desde munchos anyos, personas de todas las relijyones pueden aprovechar un akseso a sus lugares santos en Yerushalayim. Los mismos estados ke propozaron esta rezolusyon negasyonista (Aljeriya, Ayifton, Levanon, Maroko, Oman, Qatar i Sudan) trespajan avyertamente la libertad de relijyon, proiben el ateismo, kondenan a muerte los ke deshan las fey islamika, i tantas vezes persigen a sus minoridades kristyanas…”
Esto dicho, yo no ago la misma meldadura ke la mayoriya de los djudyos. Para mi esta rezolusyon, por siguro, es muy negra, ama no pretende, komo lo meldi a kada vez, ke esta rezolusyon aze de la Pared un lugar santo de los solos muzulmanos, ni pretende ke el templo de Yerushalayim nunka egzistyo, ke dunke el kristo no egzistyo tampoko, i otras kozas ke no son en la rezolusyon, bastante negra tala ke es.
Agora el primo ministro Manuel Valls rekonosyo publikamente ke esta rezolusyon votada por la Fransya kontyene “des formulations malheureuses et maladroites” (palavras malvenidas i torpes) ke “tuvyeran mijor de ser evitadas”.
Una koza me parese sigura: Netanyahu se espanta de la konferensya internasyonala ke kyere organizar la Fransya, indimas ke Laurent Fabius, kuando dainda era ministro de los echos ajenos de Fransya, disho ke si no reushe la konferensya, la Fransya de si para si va rekonoser el Estado Palestinyano. Netanyahu kyere negosyasyones bilateralas, i agora, despues del voto por la Fransya de esta negra rezolusyon, le vyene mas kolay de dizir ke no tyene konfyansa en la neutralidad de la Fransya en esta konferensya.
Al djueves ke vyene, si kyere el Dyo!
Artículos Relacionados: