Las dolores del parto

Las mujeres ya no estavan podiendo mas. Disheron:

-Addio! Todo vamos azer mozotros?. Lavar, espondjar, gizar, fregar…. Parir, yevar a la kriatura  en la tripa mueve mezes!…. I a parte d’esto kale ke suportemos i las dolores del parto?? No, esto no! Ya vino la ora ke sean los maridos a travar las dolores!

Izieron un kongreso, avlaron todas i dechizaron ke van a azer una delegasion i la van a mandar al Dio, ke les aregle la kestion de las dolores del parto.

I ansina fue: la delegasion se prezento al Dio. Avlaron i avlaron … i a la fin disheron:

-A lo manko las dolores del parto ke sufran los maridos!

-Bueno! Disho el Dio, no ay nada! Ke sea!

El dia de despues vino la ora del primer parto.

Ya vino la komadre, ya la echo a la kama a la mujer ke esta para parir, i ya lo echo i al marido en una kama enfrente d’eya, para ke trave las dolores al lado d’eya.

Ya empeso el parto. Le demanda la komadre al marido:

-Di, kualo te stas konsintiendo? Tienes dolores?

-No! -dize el – no me esto konsintiendo  nada!

Ensupito se sienten unos gritos demudados, viniendo del apartamento de ariva. Kualo es? Kualo no es? Es el vizino de ariva ke tiene dolores de parido!

Al otro dia suvio la delegasion de las mujeres al Dio i le disho:

-Pardon, mos aripintimos! Keremos tornar a la situasion de antes! Ya stamos prontas a sufrir i las dolores mozotras!

Kontado por MATILDA KOEN-SARANO