En repuesta a una demanda ke ize al grpuo de ladinokomunita, una de las miembras del grupo ke bive en Israel mos eksrivio ke en Izmir se uzava azer una seremonia, yamada ayi “siete kandelas”, para meter nombre a una ijika rezin nasida. En esta seremonia, ke era echa en kaza, las personas importantes de la famiya ensendian una kandela kada una, asta siete kandelas. El haham dizia unas kuantas bendisiones i despues anunsiava el nombre de la kriatura.
La informante adjusto ke se uzava tambien meter djuntos a la kriatura djoyas i oro de los parientes i amigos.
Yo avia echo esta demanda despues de aver meldado ke esta seremonia era mensionada en los “Ediktos de la Fe” ke la Inkizision azia meldar en las iglezias de Evropa i de Amerika tambien, en los kuarenta dias ke presedavan la Semana Santa de los katolikos. En estos ediktos ke todos eran ovligados de oyir basho la pena de ekskomunikasion i de una multa de 20 pezos de oro, topamos entre los sinyos ke eran dados para deskuvrir a los “djudaizantes”, la sigiente remarka: “….a la septima noche del nacimiento de la creatura, poniendolo en un bacin con agua, echando en él oro, plata y alfojar, trigo, cebada y otras cosas, labando la dicha creatura en la dicha agua, diciendo ciertas palabras, hubiecen echo hadas a sus ijos…”
La palavra “hada”, segun los diksionarios del ladino es sinonima de “fada” ke kere dizir tambien suerte, ma onde los sefaradis fadar es tambien dar nombre a una ijika rezin nasida i el fadamiento es la seremonia ke se aze para esto. Segun el livro “Sidur ‘Hamerkaz” de Rabi Meir Matsliah Melamed, en ebreo esta seremonia es yamada “zeved ‘ha-bat”; en ladino es “fadar la ija” i en Izmir es yamada “las siete kandelas”. Es adjustado en este livro ke la seremonia se aze en la kaza de los djenitores, unos kuantos dias despues del nasimiento: se mete en una tavlá monedas de oro, plata, djoyas, konfites i siete kandelas. Kada uno de los ke ensienden una kandela mete paras en la tavlá i en tomando de los konfites aze bindisones i le dezea a la ijika ke tenga mazal bueno. A la fin de todo esto el haham mete su mano sovre la kavesa de la kreatura, en los brasos del sandak i la sandaka, i le da el nombre segun el uzo.
Aki devemos demandar si es ke los djudios kreian en las “fadas” al tiempo de Sefarad? De ande vino este uzo ke meresio ser inkluido en los ediktos de la Inkizision? Topi una repuesta a esta demanda en el livro “Secrecy and Deceit.
The religion of the Cripto-Jews” (Sekreto i Enganyo. La relijion de los Kripto- djudios), del Dr. David M. Gitlitz.
Segun este investigador las “hadas” era una seremonia ke se azia antes del Brit Mila (sirkunsizion), para protejar a la kriatura de Lilit i de los otros malos espiritos. La orijin de esta seremonia, ke los djudios del Imperio Otomano yaman “viola” o “noche de shemira”, es eskura, ma lo mas probable es ke viene del biervo latino “factum” ke sinyifika destino o kurso de la vida.
Ay algunas referensias ke pueden darmos una sierta idea de lo ke eran las”hadas/fadas” en Sefarad, kuando bivian ayi los djudios. Esta selebrasion era para ijos i ijas i era bazada en la kreensia ke avia seres sovrenaturales ke podian danyar a las kriaturas i para los kualos kalia meter miel i dulseria ensima de una meza para ke esten kontentes i no kavzen ningun danyo.
Las “fadas” se azian a los siete dias del rezin nasido (o rezin nasida), ke era vistido de blanko i banyado por primera vez en un basin onde se metian elementos konsiderados komo sinyales de un futuro yeno de rikeza, artura i mazal bueno. En Castilla, en los anyos 1480 los djudios tenian uzo de banyar a la kreatura en diziendo siertas palavras de bindision, yamando a las “buenas hadas” (entre otras se dizia “buenas fadas ke te faden”). Despues del banyo se meldavan orasiones tradisionales* i se kantavan kantes yamando a los “malahines guadradores” o a las “fadas/hadas”, despues se servian dulses i beverajes i se baylava i se estava toda la noche.
Gitlitz eskrive en su livro ke fadas eran komunes en Espanya en la epoka de la ekspulsion de los djudios, ma poko a poko fueron desparesiendo de los uzos pratikados en sekreto por los kripto-djudios, i despues del anyo 1537 ya no se topan mas referensias a esta kostumbre.
Sin duda la Inkizision konosia a la perfeksion los uzos djudios; ayudaron a esto munchos malsines i rabinos konvertidos ke le dieron toda la informasion de la relijion djudia.
En mis lekturas sovre los konversos en la Peninsula Iberika i en Amerika topi solo algunas referensias a las “fadas”, entre otras un kavzo ke akontesio en 1528 en la Mueva Espanya (Mexico) i ke fue investigado por la istoriadora Eva A. Uchman i otros istoriadores meksikanos i amerikanos. Se trata de Hernando Alonso, un konverso orijinario de Palos (Espanya), ke avia emigrado a la izla de Cuba i ke en 1519 se adjunto a Hernan Cortez en la konkista de Mexico, en la ekspedision de Panfilo de Narvaez. El djugo un rolo muy importante en la konkista de Tenotchitlan, la kapitala del imperio Azteka.
Hernando Alonso se gano una grande nombradia en la Mueva Espanya. Le dieron grandes terrenos i era miembro del governo de la sivdad; ma en 1528 el fue arestado por el inkizidor Vincente de Santa Maria, siendo ke avia defendido a su mujer de ir a la iglezia despues de aver parido una kreatura, a kavza de la “nida” (enkonamiento).
En el djuzgo ke le fue echo por la Inkizision salio ke Alonso tuvo un ijiko kon una mujer indiana i un dia, al pareser selebrando la fiesta de Pesah entre 1517-1518, un grupo de konversos kantaron el salmo “Betset Israel mi Mitsrayim” i tomando la kriatura la embanyaron i bevieron la agua ke eskurria del rezin nasido. Segun la investigadora Eva Uchman este kavzo fue investigado por varios rabinos ke no vieron en esto algo atado a la relijion djudia; ma sigun eya, esta era una seremonia en lugar de la sirkunsizion ke no podia ser echa por espanto de ser deskuviertos por la Inkizision. Eya adjusto ke en su interrogatorio por el inkizidor Santa Maria, Alonso aksepto ke esta era una “seremonia djudia”, ke su buto era a la vista “fadar” a la kreatura ke era metad djudia i metad indiana.
Malorozamente este “fadamiento” fue la kavza ke Hernando Alonso fue kondanado i kemado en el auto-da-fe del 17 Oktobre 1528, en la sivdad de Mexico, djuntos kon otro konverso yamado Gonzalo de Morales. Eyos fueron los primeros martires djudios en el kontinente amerikano.
Rengrasio a los izmirlis por aver guadrado tantos siglos despues de la ekspulsion, la seremonia de las siete kandelas ke, aun ke se troko un poko, asemeja a las “fadas” ke se azian en Sefarad, en la epoka ke los djudios ainda bushkavan la proteksion de las “fadas”. Rengrasio tambien a todos los amigos/as de LadinoKomunita ke viene de selebrar el diezen aniversario de su kreasion, por ser un manadero de edukasion i dezvelopamiento de estudios sefaradis, ansi komo a Rachel Bortnick i sus kolaboradores. Pujados ke seash.
* * * * *
*Traemos aki, a titolo de ilustrasion, el teksto de la orasion para fadar a la ija, tal ke era echa en la komunidad sefaradi-portugeza de Amsterdam.
- Ken bendisho a muestras madres
Sara, Rivka, Rahel i Lea
I Miriam la profeta i Avigayil
I Esther la reina ija de Avihayil
El bendiga a la ninya la ermoza la esta
I sea yamado su nombre (…….)
Kon buena planeta en ora de bendision
I engrandeskala en salud, paz i olgansa
I aga mereser a su padre i a su madre
Por ver a su alegria i en su talamo
Kon ijos machos, rikeza i onra
Visiozos i reverdidos renoven kon kaneza
I ansi sea veluntad
Amen
Artículos Relacionados: