Las yaves

Por:
- - Visto 1219 veces

En mi vida, por pura koensidensia i sin bushkarlos, me enkontro a vezes kon temas ke tienen una grande influensa sovre las fibras emosionales de mi existensia. Uno de eyos es el tema de las yaves en la tradision sefaradi del kual dezeo tratar agora.

Unos dos anyos atras tuvi la oportunidad de meldar la ermoza ovra de Marcos Aguinis titulada “La gesta del Marrano”: una novela bazada sovre la vida del marrano Diego Nunez da Silva i el trajiko destino suyo i de sus desendientes, viktimas de la Inkizision de Lima. Kedi profondamente impresionado por la lektura de esta ovra i entre otras por el tema de las “yaves” i su intenso simbolizmo.

El lisensiado Diego Nuñez da Silva ke avia yegado al Muevo Mundo de Portugal, era desendiente de los djudios ke avian sido ovligados a salir de Sefarad en segito al Edikto de Ekspulsion del 31 de marso 1492.


Marcos Aguinis konta ke Diego Nuñez da Silva guadrava kon grande kudyado una kashika kon “….algunos rekuerdos personales…Entre eyos un estuche rektangular kuvierto de brokato purpura i serrado kon un kordon…Ke era esto? Un rekuerdo de famiya…No tiene valor material ma el espiritual es inestimable…Avrio el estuche i todos pudieron ver: una yave…En la empunyadura tiene una gravasion…Una flama de tres puntas…Me la entrego mi padre en Lisbon…A el se la dio su propio padre. Proviene de Espanya, de una ermoza kaza de Espanya…Kuando muestros antepasados tuvieron ke abandonar sus kaza serraron la puerta i desidieron de guadrar la yave…Mi bisavuelo no se separava nunka de eya…Mi avuelo rekomendo a mi padre ke tenga kudiado de esta piesa komo si era un trezoro. Mi padre a mi, yo a vozotros…Muestros antepasados tenian konfiensa ke tornarian a esta kaza i por esto guadramos la yave”.

Kuando meldi este livro por primera vez lo ize pushado por mi bushkedad personal de una leshana ma sentida erensia sefaradi. Despues meldi el livro una segunda vez i entonses lo konsenti mas, siendo ke ya avia obtenido mas informasion istorika a este sujeto, ma lo ke interesa aki es ke estava bushkando de muevo el tema de las “Yaves”.

La kestion no se kedo ayi sino ke, komo se vera, kontinuo a batir a las puertas de mi vida. Un anyo despues yego a mis manos un chiko livro ke yo no avia bushkado. Esto avlando de “Cuentos Españoles, de Sefarad i los Sefardies” eskrito por la Sra. A. Alicia Requeña. Uno de los kuentos en esta ovra, titulado “Las Llaves” toka aviertamente a este tema: un djudio de muestros dias ke torna a Espanya despues de munchos siglos i munchas jenerasiones, kon las yaves de una kaza en Toledo. Kuando eskapi de meldar este kuento senti ke mas ke un viaje en el espasio, se tratava de un viaje en el tiempo. Ya savia ke esto de guadrar las yaves de sus kazas en Sefarad era una tradision.

A prinsipios de Marso de este anyo (1996) una sinyora grega ke estava enteresada en ke yo le diera informasion sovre los shamanes indijenos de la rejion amazonika, me trusho de regalo un livro sovre los djudios de Saloniko i un disko kon kantes en djudeo-espanyol. A mi gran sorpreza topi en el livriko ke akompanyava al disko este ermozo soneto de Jorge Luis Borges:

UNA LLAVE EN SALONICO

Abravanel, Farias o Pinedo
arrojados de España por impía
persecución, conservaban todavía
la llave de una casa de Toledo.

Libres ahora de esperanza y miedo,
miran la llave al declinar el día;
y en el bronce hay ayeres, lejanía,
cansado brillo y sufrimiento quedo.

Hoy que su puerta es polvo, el instrumento
es cifra de la diaspora y el viento,
afin a esa otra llave del Santuario

que alguien lanzo al azul cuando el romano
acometió con fuego temerario,
y que en el cielo recibió una mano.

I en el livro de istoria sovre la komunidad djudia de Saloniko ay un artikolo de GillesVeinstein titulado “Un paradoxe seculaire” onde dize avlando de los djudios ekspulsados de Espanya: “Los djudios para los kualos la fidelidad a su relijion era mas importante ke kualker otro atadijo, partieron en efekto, ma kon la esperansa de un retorno serkano, Se dize ke tenian kon si las yaves de sus kazas..”

Ultimamente eskrivi al istoriador Mordehay Arbell de Israel para konsultarme kon el sovre este tema i el muy amablamente me respondio lo sigiente: “Ay kavzos raros en los kualos djudios de Toledo guadraron las yaves de sus kazas. Personalmente yo no vidi tales yaves ma konosko djente ke vieron grandes yaves, de kazas en Toledo, no de otros lugares.”

Ya avia serrado estas notas kuando la semana pasada kayo en mis manos otro livro, esta vez una koleksion de artikolos sovre Israel, titulado “Entre el Mar Rojo y el Mar Muerto” del eskritor kolombiano German Arciniegas. Ayi el esksrive: “Esos judíos, como han guadrado desde 1492 las llaves de su casa, han conservado, con la poesía, la musica de la España que fue su hogar.” Mas adelante el konta la ermoza istoria de un profesor kolombiano ke ensenyava en la Universidad de Seattle en Estados Unidos i “Una vez oyó en el campo de la universidad a una de las gringas de su clase cantando en ladino romances viejos. Supo entonses que en ese extremo del mundo americano existía una colonia sefaradí… Fue García Prada (el profesor) a la casa de la gringa. Le enseñaron en un cajita de madera una llave: la de la casa en Sevilla. Me asalta el recuerdo de la gringuita de Seattle cantando en el campus de la universidad sus canciones viejas. Cuando volvía a la casa avría el cofre escondido, miraba la llave y sus ojos de niña se hacían agua de lagrimas de siglos. Ponía el ollido para escuchar las voces mas intimas del silencio y resonavan en ella los cantos de David”.

SORPREZA EN TOLEDO

Joseph Avzaradel, ke nasio en Brasil, estuvo unos kuantos anyos atras, djuntos kon su mujer, en Toledo, onde tuvo una ekstraordinaria eksperiensa, vijitando kon un grupo de turistas en la Sinagoga del Transito.

En lo ke, djuntos kon los otros miembros del grupo, iva detras del gia ke les eksplikava lo ke avia ayi, Joseph Avzaradel sintio a un sierto punto ke una fuersa sovreumana no lo deshava kontinuar i alesharse de una maseva delantre de la kuala se avia parado.

No saviendo meldar en ebreo el demando de su mujer, ke avia estado un anyo komo volontaria en un kibuts en Israel, de bushkar a desifrar lo ke estava eskrito sovre esta maseva. Ke fue sus sorpreza i kuanto grande fue sus emosion kuando al meldar la inskripsion se dieron kuento ke esta era la maseva de uno de sus antepasados, rabi Moshe ijo de Yosef Ben Avzaradel, ke murio en Toledo en 1354.

Uzada komo material de konstruksion, de mizmo ke munchas otras masevot de tombas djudias, despues de la Ekspulsion, esta maseva sirvio de abrevadero durante ken save kuantos anyos, asta ke fue rekonosida su importansia istorika i ke eya fue inkluida en la ekspozision del Muzeo Sefaradi de Toledo. Aki damos la deskripsion de esta maseva, tal ke se topa en el katalogo del Muzeo Sefaradi.

Lápida de piedra granitica…. Tiene un orificio de desague en el ángulo superior derecho… lo que nos confirma que fue utilizada como abrevadero.. Está dedicada a R. Mosé hijo de Yosef ben Abi Zaradel. Grabada en letra cuadrada de caracteres muy irregulares. Fechada en 1354.

1 comentario en «Las yaves»

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: