Lo ke mos desharon este enverano

Por:
- - Visto 333 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

Kon la emisyon de oy, esto empesando una anyada mueva de emisyones, mi onzena anyada syendo ke las empesi en septyembre 2005. Kuanto tyempo vo ser kapache de kontinuar estas emisyones, no se. Seriya muy byen si alguno mas mansevo de mi veniya ayudarme para remplasarme un diya, ama komo ya lo savesh no es koza kolay agora de topar un mansevo ke sepa avlar muestra lingua. La djente se va, i no vyenen otros detras de eyos.


I djustamente, a propozito de la djente ke se va, en este enverano se fueron munchos ombres de grande valor; no se paso una semana sin ke mos ambezemos la pedrita de ombres de alto nivel, i por empesar mos ambezimos kon muncha pena ke Jacques Aelion, el prezidente de onor de muestra asosyasyon Vidas largas, mos desho la buena vida.

Sir Nicholas Winton

Dainda no vos vo avlar de el, porke tenemos la entisyon de azerle un omenaje partikolar un poko mas tadre, kuando tendremos informasyones mas kompletas ke estamos asperando sovre su vida, sus orijenes, su manseves, i su atadijo verso muestra lingua.

Para oy, vos kyero avlar de kuatro ombres ke mos desharon este enverano: Sir Nicholas Winton, Raphaël Draï, Samuel Pisar, Benno Gross.

El primero por desharmos fue, el primo de djulyo, Sir Nicholas Winton, a la edad de 106 anyos, mashalla mashalla, syendo ke nasyo en 1909 en Ingletyerra, en una famiya de djudyos almanes ke no se yamavan Winton, ama Wertheim. Trokaron de nombre i de relijyon, azyendosen kristyanos, i el chiko Nicholas fue bavtizado a su nasimyento. (Esto va ser la razon por la kuala, afillu si era kristyano desde su nasimyento, no va ser admetido komo Djusto por Yad Vashem syendo su asendensya djudiya. A lo manko esto es lo ke meldi).

Raphaël Draï

En 1938, a la edad de 29 anyos, dainda bekyar, se topava ser empyegado en la Bolsa de Londres, i serka de Noel teniya de irse en vakansas de ski, kuando un amigo le telefonea de Praga, kapitala de la Tchekoslovakia, demandandole de venir pishin para ayudarlo a salvar los 250.000 djudyos i antinazis topandosen en kampos de refujyados en este pais ke era la ultima demokrasiya en la Evropa sentrala.

Winton desha todo i se va en Praga en vez de irse al ski. Kale akodrarse ke el anyo 1938 aviya sido terrivle para los Tchekos, vyendo los paizes oksidentales (Fransya i Ingletyerra) olvidandosen los tratados firmados i abandonando kaji el pais a los nazis , kon los akodros de Munich del 30 de septyembre de este mismo anyo. Churchill, ke no era dainda al poder en Ingletyerra i ke aviya pishin entendido el yerro kometido, disho de manera publika al governo ingles:”para no tener la gerra eskojitesh la verguensa, vash a tener i la verguensa i la gerra”.

Samuel Pisar

Los desmazalados de djudyos i antinazis ke teniyan pensado topar la salvasyon en Tchekoslovakiya entendyeron  pishin la sekana de ver vinir los nazis;  kaliya fuir muy presto, antes ke vengan, ama ande i komo? Todos los paizes aviyan serrado sus fronteras, i Winton ya entendyo ke malorozamente no le era posivle de salvar a los 250.000 refujyados. Ama a lo manko las kriaturas? El governo ingles achetava las kriaturas kon la kondisyon ke ayga una famiya para resivirlas i ke pagen kada una 50 livras sterling. Winton toma un avyon para Londres i yeva kon el 20 kriaturas. La organizasyon ke lo ayuda por las paras es kristyana i kyzre konvertir a las kriaturas. Por siguro los hahamim se amostran shupelis, ama Winton les responde ke es kuestyon de vida o de muerte, lo ke amostra ke, antes mismo del empesijo de la gerra – estamos en marso 1939, la gerra va empesar solo en septyembre –  ya se puediya endevinar lo ke iva afitar a los djudyos.

Benno Gross

Winton apareja una lista de 6.000 kriaturas ke kale salvar. Se pelea kon la administrasyon ingleza, ama tambyen kon la administrasyon olandeza – los trenos tyenen de pasar por la Olanda para ayegar al vapor verso la Ingletyerra – para obtener las otorizasyones de embiyar estos chikos en famiyas inglezas. Kale tambyen topar estas famiyas, i toparlas presto. Mete fotos de kriaturas en las gazetas para topar estas famiyas. I las topa.

Entre marso i agosto 1939, 8 trenos van a embiyar 669 kriaturas a Ingletyerra. Malorozamente, el noven treno, de 250 kriaturas, se topa blokado por la deklarasyon de gerra el 3 de septyembre 1939, i las kriaturas no van a pueder fuirse. Seran todas matadas durante la gerra, komo sus desmazalados paryentes, tan estos komo los paryentes de las kriaturas salvadas.

Winton va kombatir en la avyasyon durante la gerra, i despues nunka avlo de lo ke aviya echo. Es su mujer ke, 50 anyos mas dospues, va topar un tefter kon los nombres de las kriaturas salvadas. I Winton va toparse onrado sin tenerlo bushkado. Fue echo Sir por la reyna de Ingletyerra, afillu si el pensava ke no era un gibor porke no tomo rizikos para el mismo.

Komo lo dishe, se muryo el primo de este mes de djulyo, a la edad de 106 anyos.

Despues de este Winton, mos ambezimos de la muerte, el 17 de djulyo, de Raphaël Draï, uno de los mas grandes intelektuales djudyos de Fransya. Su muerte es una grande pedrita para el djudaismo en jeneral, i el djudaismo franses en partikolar.

Nasido en Aljeriya en 1942, tuvo de desharla en 1961, a la edad de 19, por modo de la gerra, afillu si “un pais ke vos deshad, el no vos desha”, komo diziya, i afillu si el mismo se keriya, i se kedo vida entera, amigo de todos, no solo de los djudyos ama tambyen de los kristyanos i muzulmanes, sin nada abandonar de sus konviksyones.  Kale meldar, en la gazeta Actualité Juive, komo lo yora un muzulmano komo Morad El Hattab (su nombre entero es Morad Al Hatab Al Ibrahimi Al Sherifi Al Idrissi, prinsipe desendyente del Imam Abu Al Hasan Ali ibn Abi Talib, kuatren Kalif del islam, i si vos vash sovre Google, lo podresh oir en franses azyendo una konferensya en Israel sovre el antisemitismo yevando la vestimyenta del antisyonismo; kale dizir ke si todos los Muzulmanes eran komo Morad El Hattab, la vida seriya mas kolay para los djudyos!)

Una vez en Fransya, Draï empesa estudyos de derecho i de siensyas politikas, materya en la kuala obtyene su agregasyon. En 1977, a la edad de 35 anyos, es profesor de syensyas politikas en la Universidad de Nancy, despues va ser el doyen (mayor) de la fakultad de derecho i syensyas sosyales de Amiens, despues profesor en Marseille i Aix en Provence.

Ama, al lado de esto, se ve yamado komo direktor en la Eskola de psykanalizis de la Universidad de Paris VII.

Al lado de esto, eskrive unos trenta livros, lo mas sovre el djudaismo, i es a poko a poko konsiderado komo uno de los mas grandes pensadores del Djudaismo franses. Pasa munchas vezes en la televizyon, en las emisyones relijyozas de alhad, i regularmente a Radyo J, la radyo ande me estash oyendo, i eskrive en las gazetas djudiyas komo Actualité Juive.

I al lado de esto, le agrada azer futbol i alterofiliya…ama tambyen desinar, lo ke aze de el un ombre ke Morad El Hatab yama – en yidisch…- a mensch, un benadam.

Raphaêl Draï se muryo el 17 de Djulyo de “una larga hazinura”, komo se dize en las gazetas.

Diez diyas mas despues, el 27 de djulyo, mos ambezimos la muerte de Samuel Pisar, ke fue deportado kuando teniya solo 13 anyos, i ke va ser despues doktor en derecho, ombre politiko, avokato internasyonal i eskrivano.

Nasyo en 1929 en Bialysttok en Polonya, en una famiya kon bastante paras; su padre era patron de un echo. Los rusos vyenen en 1939, i despues los Almanes en 1941. Una semana solo despues, ve de su ventana kemar el kal sentral kon syenes de djudyos arientro, enserrados aya por los almanes i kemados bivos. Su padre es aferrado, torturado i matado.  Poko despues, en 1942, el mismo es aferrado kon su madre i su ermana, i pishin separado de eyas, eyas embiyadas a Treblinka, el embiyado en el kampo de Maidanek. Su madre le aviya dicho de meter pantalon largo para pareser un ombre bastante aedado para no ser pishin embiyado a la kamareta de gaz. Esto lo salva una primera vez. Se mete aya a lavorar komo shastre, afillu ke por siguro en vedra no save nada de este lavoro. Al empesijo de 1944, es embiyado a Auschwitz. De aya es embiyado en Dachau, ama reushe de fuir i de topar a un asker amerikano: ansina se salvo.

Su tiya bivyendo en Paris reushe de toparlo, i lo yeva en Paris, i de aya se va ande tiyos de Australia.

Malgrado todo lo ke le afito, malgrado la hazinura (tuberkulozis) ke le keda de los kampos, empesa estudyos  asta la Universita de derecho de Melbourne, i despues de Harvard. Vyene a ser doktor en derecho i su tezis es sovre la koegzistensya entre Este i Oeste. John Fitzgerald Kennedy, ke dainda no es prezidente de los Estados Unidos, lo va tomar komo konsejero, i ansina se va kedar al lado de Kennedy asta ke se aga prezidente i despues tambyen.

Despues va ser avokato internasyonal, i en el mismo tyempo eskrivano. Eskrive a la vez sovre la Shoa i su istorya personala, i a la vez sovre su espesyalidad, la koegzistensya pasifika.

Komo eskrivano, mos desha su istorya kon el titolo La sangre de la esperansa, i tambyen, en 2008, Samuel Pisar eskrive un teksto para la sinfonia n° 3 Kaddish, de Leonard Bernstein, i le da tambyen su boz misma.

Komo ombre politiko, va ser echo sivdadano amerikano en 1961 por un voto del Kongreso de los Estados Unidos. En 1970 eskrive su livro Las armas de la paz, ande sostyene la idea ke las relasyones ekonomikas entre la Unyon Sovyetika i el Oksidente aleshan el riziko de gerra.

Samuel Pisar mos desho el 27 de djulyo en New-York.

I agora mos keda de avlar de Benno Gross, ke el mos desho el 3 de agosto.

Benjamin Gross, ke syempre fue yamado Benno Gross, nasyo en Strasbourg en septyembre 1925, en una famiya de orijen almana i polaka, naturalizada franseza. Kuando vyene la gerra, el padre es echo prezonero de los Almanes, i el kusur de la famiya se va eskonder en el Limousin (en medyo de la Fransya, en zona non okupada por los Almanes asta novyembre 1942).

Malgrado los Almanes, Benno se va estudyar en eskolas djudiyas (ORT, despues el chiko seminaryo dirijido por el haham Deutsch.

Benno Gross eskapa de la gerra, i se va en la sivdad de Lyon para ambezarse la filozofiya. I aya, en 1945, Benno Gross, ke tyene djusto 20 anyos, oye una konferensya de André Neher, grande pensador djudyo. De este diya, syempre Gross va aprovar de meter armoniya entre filozofiya jenerala i filozofiya djudiya.

En 1946, eskapa sus estudyos en Strasbourg, su sivdad de nasimyento, i aya, en 1948, a la edad de solo 23 anyos, funda la famoza Eskola Akiba, ke va dirijir asta 1969, dunke mas de 20 anyos.

En 1950 se kaza kon una ija del avokato Mathieu Muller (i de su mujer ija del haham Jules Bauer). Aki avro una paranteza personala, para kontar dos byervos de este avokato Mathieu Muller, ke yo no konosi, ama ke mi padre konosyo komo estudyante en derecho, i ke syempre fue muy sufu. Un avokato katoliko me konto ke kuando teniya Muller komo adversaryo, aprovava de azer venir el pleto diya de Shabath, porke saviya ke en diya de Shabath Muller no lavorava! Mathieu Muller el mismo era kazado kon una ija del haham Jules Bauer, el kual, en mas de la mujer de Mathieu Muller tuvo un ijo ke tambyen fue haham, Paul Bauer. Yo konosi a Paul Bauer porke era el haham del kal Buffault ande me vo. I agora es tyempo de serrar esta larga paranteza sovre Mathieu Muller para  aboltar a su yerno  Benno Gross.

En 1967, es doktor en filozofiya kon una tezis sovre el penseryo del Maharal de Praga. Yo ya ize el 17 de oktovre 2013 una emisyon sovre el Maharal de Praga, kuando vos avli de los djudyos de Praga, los dos mas famozos syendo djustamente el Maharal, i tambyen Franz Kafka.

En agosto 1969 Benno Gross, kon su mujer i sus sinko kriaturas, se va bivir en Israël, ande va ser profesor de filozofiya djudiya.

Ama por lo tanto, no desha sus atadijos kon la Fransya, ande vyene para dar korsos i konferensyas, para venir avlar en las emisyones de radyo i de televizyon djudiyas (yo, por egzemplo, lo konosi por la televizyon).

En una de sus ultimas intervensyones, amostro su kudyado por lo ke asigun el se esta agora pasando ande los djudyos fransezes: sea la asimilasyon, sea djente relijyoza mas i mas ekstremista. El, por siguro, dezeava ke las kozas se topen entre los dos. Benno Gross era un ombre relijiozo, ama de una relijyon avyerta sovre los otros.

Se muryo el 3 de agosto, a la edad de 90, despues de 65 anyos de kazamyento.

Ansina s’eskapa mi emisyon de oy, emisyon de nekrolojiya; komo se dize ande mozotros: mas por dinguno no!

I para trokar de estos tristes haberes, vos kyero dizir ke ayer tadre a la noche tuve el grande plazer de ambezarme ke me nasyo una inyetizika ija de mi ijo bohor. Djente se va, djente ayega. Ansina es.

Al djueves ke vyene, si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: