El 1 de Fevrero, por la ochena vez, mos enkontrimos todos para pasar kuatro días de “leche i miel” en un otel de lukso, esta vez, komo las últimas sesh vezes, en la Mar Muerta. I kuando digo todos, entiendo 750 personas, ande no ay sólo ladino-avlantes, ke vienen a sintir i a avlar la lingua, a kantar i kontar, a estar endjuntos.
I komo famiyas enteras se enskriviron al programa, fue avierta otra enskripsión para el periodo del 1 al 4 de Marso para otras 750 personas, ke gozarán del mizmo programa, ke vendrá repetado. I ay ken kedó afuera por mankura de lugar.
Es enteresante de saver kualo ay de tanto ermozo en estos días.
Maridos i mujeres, famiyas de todo Israel parten en la mizma ora de sus lugar en 13 otobuzes diferentes, i arivan a medio día al otel, ande todo ya está planeado, de la kumida muy savroza a los programas artístikos, de las konferensias a las nochadas de kuentos i de kantes, de la sauna a los banyos de lodo.
Kada uno durante el día puede segir su preferensia, ansí ke una parte de los partisipantes se gozan del Spa, otros van a la mar i otros van a las konferensias, ke vienen dadas en ladino i en ebreo.
Komo kada anyo avrió el Enkontro Batia Kendell, shefe del “hug” de Haifa i organizadora del evenimiento, ke saludó el grande públiko, ekspresó su profonda satisfaksión por su reushita i su adelantamiento de kada anyo, i rengrasió a todos los ke kontribuyeron a su sukseso.
Yitzhak Navón, Sinkén Prezidente del Estado de Israel i Prezidente de la Autoridad Nasionala del Ladino i su Kultura, debasho del patrosinio del kual tienen lugar kada anyo “Los Días de Leche i Miel”, este anyo también pasó todos los kuatro dias kon mozotros, kon su mujer Miri.
El rengrasió a Batia Kendell i a Anat Ben-Kiki ke organizan estos días kada anyo, i al konsejo ke ayuda en su organizasión: Ora i Avraham Monson, Jenny i Aharon Pésah i Nava Springer.
Este anyo también las konferensias fueron muy enteresantes. Antes de todos Yitzhak Navón avló de “La chikez en un kartié sefaradí”. Moshé Shaúl avló de “Los pirates sefaradís – leyenda o verdad istórika”. Fina Aharonovitz avló de “Mas kere bivir la vieja, para mas ver i oyir”. Moshé Bahar avló del Djudaízmo Yugoslavo. El Dr. Avraham Haim avló de la etnía de los Sefaradís en Yerushaláyim, i Nisim Dayán avló de “El Ladino en los filmos israelís”. Yo avlí de “El kuento popular djudeo-espanyol i su atadijo kon el Meam Loez”.
En la tadrada del primer día la kantante Adela Nir prezentó su programa “Amor Sefaradí” de kantes en ladino i bayles de flamenko. Kada noche el programa artístiko fue diferente. La primera noche tuvo lugar el programa de kantes i kuentos “Bezo Espanyol” kon Margalit Tovi, Gila Hasid, Elazar Bueno i Uzi Rosenblatt. La sigunda noche oyimos “Los bezos de la Noche”, programa de romansas i kantigas konosidas i no , prezentado por Kobi Zarko kon Moty Adanalí, ke desperta siempre el entuziazmo del públiko, ke no kere deshar la sala. La tresera noche la Shlishiat Adler kon sus armónikas a boka i Shaúl i Julia, violinistas virtuozos, ensedió el “Fuego sovre la Shena”. I después ke la djente ya kantó asta pedrer el reflo kon los artistas, una parte se kedó a baylar, otra parte se asentó a kantar en manera spontánea, i otra parte vino a oyir i a kontar kuentos en ladino kon mí, asta las oras chikas de la noche.
Komo kada anyo Kobi Zarko dirijó estos kuatro días kon su ermozo ladino i su buena umor. Kon él kantimos todos sovre la múzika de “Adío kerida”:
“Ladino/|Lingua de la alma/No mos despartimos/Nunka nunka mas”.
Artículos Relacionados: