Los djudios sefaradis de Chile

Chile, ke esta  situado a lo largo de la kosta Sud-Oeste de Amerika del Sud, i ke su nombre, en  peruviano, sinyifika “Tierra de inieve”, kon sus 4300 kms. de largura i 420  kms. de anchura, es el mas largo i estrecho paiz del mundo.

A los prinsipios  del siglo 16 munchos de los eksploradores ke yegaron a Chile fueron  akompanyados por konversos, o kripto-djudios ke observavan sekretamente el  djudaizmo. Entre los eksploradores espanyoles ke vinieron a Chile puedemos  mensionar  a Diego de Almagro,  konsiderado komo el primer eksplorador evropeo ke yego a las kostas de este  paiz, en 1535 traendo  kon si a un  konverso yamado Rodrigo de Orgonos. Sinko anyos mas tadre, el konkistador Pedro  de Valdivia, yego a este paiz kon Diego Garcia de Caceres, de la sivdad de  Plasencia en Espanya, ke a la vista el tambien era konverso. Segun rumores ke  se  espandieron en 1621, la jenealojia de  Caceres kontiene famiyas de las mas eminentes de Santiago, inkluzo el fondador  del movimiento independiente chileno, el jeneral Jose Miguel Carrera.

Los konversos de  Chile fueron persigidos durante la Inkizison.i, en 1627, Fancisco Maldonado de  Silva, el direktor del muy renomado ospital de Santiago, San Juan de Dios, fue  arestado i embiado a Lima. El fue exekutido en 1639. Ma malgrado las  persekusiones munchos konversos kontinuaron a bivir en Chile. Estas  persekusiones se terminaron, en 1818, kuando Chile resivio de manera formala su  independensia de Espanya.

Munchos djudios i  desendientes de famiyas de konversos lucharon para la independensia de este  paiz, inkluzo el jeneral Jose Miguel Carrera, ke fue nominado komo primer prezidente  de Chile.

De  investigasiones echas por istoriadores sovresale ke la imigrasion sefaradi a  Chile empeso en los prinsipios del siglo 20 o sea en el anyo 1900. De toda  manera no fue topada dinguna inskripsion o dokumento ke indikan la prezensia de  sefaradis en Chile, antes de esta data. Ma sea komo sea, los sefaradis fueron  los primeros djudios a yegar a este paiz.

Entre los anyos 1907-1911 yegaron a Chile unas 15 famiyas sefaradis,  todas de Monastir (en la   ex Yugoslavia) i se aresntaron en la sivdad de Temuco. Es en  esta sivdad ke fue  fondada tambien, en  1916, la primera komundiad sefaradi  de  Chile kon el nombre de Sentro Makedonyano Djudio. El buto de esta  komunidad era de reunir debasho de un mizmo techo a los sefaradis orijinarios  de los paizes en los Balkanes. Al prinsipio, los sefaradis ke yegaron de  Monastir, Izmir, Estambol, Saloniko i otras  sivdades se aresentaron en todas las partes del paiz, ma prinsipalmente en  Temuco, La Serena,  Valparaiso, Valdivia i mas. En los anyos 30 empesa una migrasion interna i  munchas famiyas tresladaron sus kazas de Temuco i otras sivdades mas a la kapitala Santiago,  onde se topa asta oy la mas grande komunidad sefaradi de Chile. Esto es devido  prinsipalmente al dezeo de las famiyas a ke sus ijos estudien en las  universidades, lo ke yevo a la formasion de   profesionales en la komunidad sefaradi al seno de la segunda i de manera  mas masiva, en la tresera jenerasion.

Una otra sivdad  de grande importansia ke se distingie por su komunidad sefaradi es la de Valparaiso.

“La Sosiedad Israelita  de Instruksion i Bienfezensia Max Nordau – Komunidad  Sefaradi de Valparaiso” (1), se topa en el sentro de la sivdad.  Los fondadores de esta  sosiedad eran sefaradis de Turkia i durante largos anyos la komunidad reunio  debasho de un mizmo techo a djudios de Rusia i de Almanya ke tenian minyanim  separados. Finalmente los eshkenazim   fondaron sus komunidad i pasaron a la sivdad vizina Vinya del Mar.

Valparaiso, ke en  el pasado era i oy tambien lo es, una sivdad porto de grande importansia fue  deklarada ofisialmente sivdad ermana de Bat Yam, en Israel. Esta sivdad tiene  una rika istoria kripto djudia.

Despues del  transfero del Parlamento de la kapitala chilena Santiago, a Valparaiso, en  1987, fue desidido tambien de transferar todas las aktividades al muevo  edifisio del Kongreso en el kuartier Almendral.

En Chile ay dos eskolas djudias. La mas grande de eyas “Instituto Ebreo”  (yamado tambien Haim Weizman  ORT) en Santiago tiene 1700 elevos. Una eskola mas chika, avierta ultimamnete,  kon el nombre de Kolejio Maimonides, tiene 150 elevos solamente.

En desparte de  las sinagogas ortodoksas de los sefaradis i eshkenazis , “El Estadio Israeli”  es una sinagoga reformista yamada “Or Shalom”. Unas 200 famiyas son miembras de  esta komunidad.

Aktualmente biven  en Chile entre 10.000 a  15.000 djudios, en sus mayoria en la kapitala Santiago.