Ya es savido ke los djudios ekspulsados de Espanya avian tomando kon si sus kultura i todo un folklor komo kantes, kuentos, refranes, uzos i kustumbres i mas, trayendo a los paizes en los kualos se aresentaron, i prinsipalmente al Imperio Otomano, innovasiones tambien komo la fabrikasion de la polvora, la imprimeria i la industria de tekstil.
Menos konosido es el fakto ke ainda en Espanya avia djudios ke lavoravan komo “juglares”, aktores ke ivan de una sivdad a la otra, baylando, kantando o resitando poezias. Estos juglares djudios kontinuaron en sus aktividad en el Imperio Otomano tambien i segun el viajador turko Evliya Çelebi, los sefaradis djugaron un rolo muy importante en el dezvelopamiento del teatro en la sosiedad otomana. Eyos fueron los inisiadores del teatro ambulante yamado en turko “Orta Oyun” (Djugo de en Medio), prezentasion teatrala de un akto, muy populara en los siglos 16-19 i en la kuala el publiko se asentava al deredor de los aktores i de ayi su nombre.
En Estambol, la kapitala del Imperio Otomano, eyos eran yamados al palasio del sultan, kuando avia evenimientos festivos a los kualos eran envitados reprezentantes de paizes ajenos tambien, ansi ke a konakes, las rezidensias de luso privadas de notables i famiyas rikas de la sivdad. En desparte del “Orta Oyun”, eyos se distingieron en el teatro de marionetas, eran jonglores i a vezes azian riyir a la djente degizandosen en bufones.
Kon la dekadensia del Imperio Otomano, las komunidades djudias de Estambol i de otras sivdades mas en el Imperio entraron en una kriza ekonomika i kulturala komo konsekuensa de la kuala toda la aktividad en el kampo teatral fue interrumpida. De esta manera yego a su fin la kontribusion de estos djudios a la kultura artistika del Imperio Otomano, kontribusion ke se kontinuo mas de 200 anyos i ke su enfluensa fue konsentida en paizes de los Balkanes tambien.
Se kontinuo, de otra parte, la prezentasion de ovras teatrales sovre temas djudios, prinsipalmente en la fiesta de Purim. Desde la fin del siglo 19, se empeso a prezentar tambien ovras teatrales orijinales o trezladadas al ladino del fransez, idish o ebreo – ma eyas eran dirijidas al publiko djudio i no tuvieron ninguna influensa sovre el teatro turko.
Artículos Relacionados: