Despues de sus konversion forsada al Islam, los djudyos de Mash.had kontinuaron en sekreto a observar todas las tradisiones del Djudaismo, en retornando finalmente a observarlas aviertamente. De esta perspektiva, konstituen un fenomeno probablamente uniko en la istoria djudiya.
Los djudyos de Mash.had kontinuan a prezervar las pekuliaridades de sus identidad en menteniendo firmes atadijos. Diferamente de los otros djudyos de Iran, ke se identifian en primero komo djudyos persanos, i segundamente asigun sus sivdades de nasimiento, los djudyos de Mash.had tienen sus proprias sinagogas, i se identifian en primero komo djudyos de Mash.had, i despues, komo djudyos persanos.
Mashhad se topa a 900 kilometros al Este de Teheran, en la rejion de Horasan. Horasan es un vasto teritoryo en el Norte Este de Iran, ke Inkluye una parte de Iran, de Afganistan i de Turkmenistan. La sivdad de Mashhad, kon su populasion i su pasado, es el sentro de Horasan. De mizmo ke es una sivdad venerada por los shi’ites achakes de la tomba del martirizado Imam Riza, ke se topa ayi.
La Komunidad djudia de Mashhad fue formada en los anyos 1730 i 1740, kuando Nadir Shah de Persia avia – aun la opozision de sirkolos relijiozos – desidido de realokar famiyas djudias de Kavzin i de otras sivdades de la Persia en Mashhad, ke iva nomar entanto ke su kapitala.
Konosidos por sus onestedad i lealitad, los djudios fueron eskojidos para developar el komersio i la artizenia de la sivdad. Sus situasion ekonomika mejoro gradualmente atirando djudios de otras sivdades de la Persia a establisirsen en Mashhad.
La mayoria de estos vinieron de la Provinsia de Gilan, i en konsekuensia el dialekto gilaki es la prinsipala idioma de los djudios de Mashhad. Por la mizma razon,i el dialekto yazd es uzado por por una parte de estos.
Los djudios eran konsiderados komo suzyos por los persanos i eran frekuantamente insultados. Aparte de esto, el fanatismo del puevlo de Mashhad iva deteriorar mas sus aktitud verso los muevos arivados. Los djudios fueron aresentados en un kuartel afuera de la sivdad, ma se transformaron rapidamente en una komunidad prospera, en developando atadijos de komersio prinsipalmente kon Afganistan i Turkmenistan. Los raportos sovre el numero de los djudios biviendo en Mashhad en la primera meatad del siglo XIX no son konsistentes, estimandolo fin’a 2.000 almas.
La konversion
Todo avia empesado, antes de Pesah en 1839, en segito de rumores. Pretendiendo ke los djudyos se avian burlado de los musulmanos durante uno de sus dias santos – o, asigun syertas fuentes, en segito de una kalomnia de sangre – la populasion fanatika de Mashhad se avia solevantado en adresandose a sus dirijentes relijiozos. I, kuando i estos se aboltaron kontra los djudyos en otorizando el puevlo a atakarlos, la djente invaiso el barrio djudyo en devastando las kazas i butikas, sakeando la sinagoga i kemando los livros. Trenta i sesh djudyos fueron asasinados i unas syete ninias djudias fueron sekestradas para konvertirlas en novias musulmanas. En las proksimas venteikuatro oras, basho el amenaso de muerte, unas syenes famiyas djudias asemejaron de konvertirsen al Islam, segiendo el konsejo de sus lideres.
Los konvertidos de Mashhad – ansi ke, en otras sivdades de Iran – fueron yamados Djedidul-Islam, signifikando en arabo ‘muevos musulmanos’. Uzaron klandestinamente las trdadisiones djudias i kedaron djudios ekstremamente ortodoksos, mientras ke adoptaron nombres i kustumbres musulmanos en sus vida publika.
Una partida de estos, no puediendo suportar la fasada del Islam, se refujio prinsipalmente en la sivdad de Herat, en Afganistan. En este payis, la majoritad aparteniendo a la kreyensya musulmana sunita, konsiderando los shiites komo eretikos, los djudyos de Mashhad volvieron aviertamente al Djudaismo, en asimilandosen kon la antigua komunidad djudia de esta sivdad. De este modo, Herat se konvertio, despues de Meshhad en la mas grande aglomerasion de djudyos de Mashhad. Konosidos komo heratis, estos formaron un subgrupo separado de mashhadis.
La doble vida
Los konvertidos prosedaron a yevar en Mashhad una vida doble komo kripto-djudios fin’a la dekada 1920. Eksterioramente asistieron a las orasiones en las meshkitas, kuando egzistieron unas 11 sinagogas sekretas en sus kazas. A los ninios davan un nombre ebreo sekreto. I eran edukados aparte de eskolas regularas, en eskolas djudias sekretas.
Para evitar el matrimonio kon los musulmanes, las kreaturas eran ainda prometidas en edad muy chika. Ansi, si un musulmano keria kazarse kon una de las ninyas de la komunidad, le puedian responder ke eya ya era prometida i de este modo meter fin a la demanda. Kuando las kreaturas arivavan a una edad apropriada, afitavan kavzos ke los kanditatos refuzavan de konformarsen al promeso.
Los kazamientos se azian en el meshkito i en la sinagoga. Reprezantando estas doz tradisiones, las ketubot mashhadis son muy partikulares. De mizmo, i los funerales se azian en doz vezes, i los konvertidos tenian un lugar separado en semeterios musulmanos.
El matrimonio entre mashhadis i djudyos persanos aparteniendo a otras komunidades era un fenomeno raro en el pasado. Solo, devino mas frekuento kon el tyempo i partikularmente en muestros tyempos. De otra parte, la egzistensia de un punyado de famiyas ke sus miembros se kazavan kontinualmente entre eyos durante jenerasiones avia provokado una rezerva jenetika bastante limitada. Aun la aparision de defektos jenetikos, mismo oy en dia, el matrinonio entre la komunidad kontinua a ser preferado. Todo kon esto, se enkontra kazamientos kon jovenos de otras komunidades djudias, inkluido ashkenazis.
De otra parte, grasias a la obsevasion klandestina de la tradision djudia, komo muevos musulmanes, los konvertidos fueron mas kapaches dre integrarsen en la vida sosiala i ekonomika. Se adelantaron en el komersio interno kon Teheran, Isfahan i Shiraz, djunto kon el komersio eksterior kon Afganistan i Turkmenistan, interkambiando efektivamente kon los djudyos de Herat, Samarkand, Merv i Hiva. Algunos yegaron fin’a Moskova ande se establisieron en dirijando sus negosios, mientras ke otros se establisieron en Hamburg, Nueva York, Milano i Londra.
Achakes las duras kondisones del lavoro de los ombres, implikando de estar leshos de sus famiya durante mezes enteros de viajes, las mujeres kontinuaron a mantener la tradision matriarkala de prezervar sus estilo de vida, konsernando la aderensia a sus komunidad i a sus preseptos. Mizmo en muestros dias, ombres mashhadis kontinuan la tradision de sus antepasados de lavorar en viajando komo komersantes para mantener sus famiyas.
El egzodo
Asigun ke fue akodrado maz ariva, los konvertidos de Mashhad emigraron gradualmente a otras sivdades en el deredor para evitar de eskondersen i bushkar mejores oportunidades de negosio. Una partida de estos avian arivado a la Rusia pre-komunista a traverso el Turkmenistan. Portanto, no puedieron gozarsen por muncho tiempo de su entorno sosial aparamente establo i de negosio en este payiz. El desbrocho de la Revolusion en el otonio de 1917 provoko la primera buelta de los konvertidos a Mashhad, prinsipalmente de la sivdad Merv, en Tuekmenistan. Los ke kedaron en la Rusia fueron persegidos por la purga de la petite bourgeoisie de Stalin i syertos de estos fueron inkarserados.
Es solo en 1925, kon el aksedo de Reza Shah al poder, ke un rayo de libertad iva aklareser sovre los djudios de Mashhad en favorizando sus libro retorno al Djudaismo. De mizmo ke, Reza Shah iva firmar un akordo kon Stalin, para kambiar sujetos iranianos kon rusos; i, de este modo, los mashhadis detenidos en la Rusia komunista puedieron aboltar a sus famiyas.
En 1946, en segito a una kalomnia de sangre, la komunidad de los djudios de Mashhad ke avia arivado a unas 3.000 miembros, fue de muevo ebranlada por una mutineria. Ansi, se renovelo el egzodo de los mashhadis, esta vez por Teheran, ande lo maz se establisieron en forma de aglomerasiones izoladas; i en parte, por Yerushalayim, ande se adjuntaron a sus famiyas ke avian emigrado de antes.
Durante la kreasion del Estado de Israel, munchos djudios de Mashhad emigrararon al estado djudio. El proksimo egzodo empeso en 1979 kon la Revolusion Isiamika en Iran.
* * *
Aktualmente egzisten aproksivamente 15.000 djudyos mashhadis en el mundo. La komunidad de maz de 10.000 miembros en Israel, es la mas numeroza komunidad de mashhadis, mientras ke estos se topan i en Nueva York, Hamburg, Londra i Milano.
La Federasion Mundiala de los Djudyos de Mashhad, fue kreada en 2009, en el buto de prezervar la istoria i las tradisiones de esta komunidad.
Artículos Relacionados: