Los Misteryos del Rio Sambatyon

Por:
- - Visto 456 veces

Kon la invasion por los Asirianos de Israel – el Estado ebreo del Norte – los diez Trivos ke formavan su populasion, fueron deportados a Halah i Habor, al deredor del Rio Gozan i a las sivdades de Medes, i verso la Afrika, lo ke koresponde a los teritorios de muestros diyas, de la Siria, de Irak i de la Etyopia.

Los Trivos fueron egzilados en tres etapas. Serka del anyo 600 AE, Pekah ke reynava en el Estado del Norte, avia invitado a Rezin, Rey de Aram en la Siria, a gerreyar kon el kontra Ahaz, Rey de Yuda – el Estado ebreo del Sude. En esto, Ahaz se alio kon Tiglat Pileser, el Rey de la Asiria. Tiglat Pileser defeto a Rezin i invadio una grande partida del Norte de Israel, en deportando a los trivos de Dan, Naftali, Asher i Zebulun. En este etapo, Oshea mato a Pekah, i empeso a reynar sovre Israel. Shalmaneser, el muevo Rey de la Asiria invadio los trivos del Este del Rio Yarden, en deportando la meatad del Trivo Menashe, ansi ke los Trivos Gad i Reuben. Despues de diez anyos, Oshea se revolto kontra la Asiria, i Shalmaneser invadio de muevo a Israel, en konkestando a Samaria, la kapitala de Israel i en deportando la segunda meatad de Menashe, ansi ke Isahar i Efraim. De este modo, el Estado de Israel desparesio de la shena politika. La deportasion final por los Asirianos avia afitado antes mas de 2700 anyos.  La istoria de los Trivos de Israel empesa kon Yakov, ke fue bendizido por el Dio i fue yamado Israel. A Yakov, le nasieron 12 ijos, ke kada uno de estos fue el padre de un trivo: Reuben, Shimon, Levi, Yehuda, Isahar, Zevulun, Dan, Naftali, Gad, Asher, Yosef i Binyamin. Kada uno de estos trivos se aresento en teritorios diferentes en los dos rios del Rio Yarden.

Kon la muerte del Rey Shelomo, el Estado Ebreo se despartio en dos reynados. Los Trivos Yuda i Binyamin, puevlando el Reynado de Yuda, en el Sude; i los otros diez Trivos puevlando el Reynado de Israel, en el Norte.


El misterio de lo ke afito a los trivos del Norte, despues ke fueron deportados por los Asirianos, kontinuo a preokupar la pensada i la imajinasion del mundo djudio. Los profetos no eran prontos a akseptar ke sus egzilo puedia ser definitivo i en konsekuensa, sus disparision. Por esto, la esperansa ke un diya ivan retornar a la Tierra de Israel, no se amato.

Asigun la leyenda, estos trivos bivian en un teritorio, entornado por el Rio Sambatyon, ke los empidia de aboltar a la Tierra Santa. Durante todos los sesh diyas de la semana este Rio enorme i terrible, korre de una manera salvaje en arastando i alevantando a los sielos pinyaskos grandes kon sus ondas. Solo, el diya de Shabat se apeza de su furya.  Ma, achakes de sus devosion relijiosa, estos trivos respektan el dover de repozo en este diya, i no traversan el Rio. Esta kreyensa fue la razon, ke el nombre Sambatyon, derivando de Shabat, fue admetido.

El nombre Sambatyon parese por la primera vez en el Talmud ke eskrive ke “Israel fue egzilado detras del Rio Sambatyon.” De otra parte, Jozefus Flavius deskrive un rio ke lo yama el Rio Sabatiko.

El Midrash i otras fuentes eskriven ke estos trivos seran liberados kon la Redampsion de Israel. Este konsepto i la profesia del retorno a la Tierra Santa, fueron atados a la esperansa de la salvasion Mesianika, en  provokando el menester de deskuvrir el lugar de este rio, i de este modo de topar a los Trivos Pedridos de Israel.

Durante la istoria, munchos investigadores aprovaron de determinar la lokalizasion del Rio Sambatyon, portanto, sin ke sus esforfos yegan a un rezultado konkreto.

Asigun Eldad haDani, un viajador djudio del siglo IX, ke avia reklamado ser un desendiente del trivo Dan, los Diez Trivos Pedridos se topavan detras de los rios de la Abisinia, en el rivo del Rio Sambatyon. Binyamin de Tudela, el viajador djudio del siglo XII, reporto ke los Djudios de la Persia se kreen ke kuatro trivos de Israel – Asher, Dan, Naftali i Zebulun – biven de la otra parte del Rio Gozan, en las sivdades aleshadas i montaniozas de Nishabur. De mizmo, la kreyensia de los Kristianos sovre la leyenda de Prester John, un monarko kristiano poderozo del Leshano Oriente o de la Afrika, intensifio ainda mas en la Edad Media, las spekulasiones sovre la egzistensia de los Trivos Pedridos. La majoritad de los komentatores sovre Prester John en esta perioda, se referaron a estos trivos en tanto ke vizinos del teritorio de Prester John. El Rabino Ovadia de Bertinero, un peregrino de la Italia en Yerushalayim, de la fin del siglo XV, en la informasion ke avia rekojido sovre estos trivos i espesialmente sovre el trivo de Dan, nota ke estos trivos estavan en gerra permanante kon Prester John. De mizmo adjusta ke asigun lo ke supo de los Djudios de Aden, en Teyman, ansi ke de los komersantes muslumanos, estos trivos moran en la otra parte del rio Sambatyon, ande se puede arivar despues de sinko dias de viaje en el dezierto de Aden.

Asigun Nahmanides, el Rio Sambatyon es idantiko kon el Rio Gozan, akodrado en la Biblia. El Rio Sambatyon parese i en las ovras kabalistikas. En 1260, el kabalisto Avram Abulafia viajo a la Tierra de Israel para topar al Rio Sambatyon i para kontaktar los Trivos pedridos. El kabalisto yerushalmi Avraham haLevi, en una letra en 1528, apunta ke los Djudios de Etyopia son los desendientes de los trivos Dan i Gad. El avanturisto del siglo XVI, David Reubeni, ke fue resivido por el papa i el Imperor KarlosV, avia pretendido ser el ermano de un sierto Rey Yosef, ke reyna sovre los trivos Reuben, Gad i una parte del trivo Menashe.

En el siglo XVII, i partikularmente kon el Mesianismo de Sabetay Sevi, el intereso sovre los Trivos Pedridos fue de muevo arebivido. Asigun Natan de Gaza, ke fue el profeto de este movemiento, la armada de estos trivos se avia arekojido i se estava preparando a konkestar a Yerushalayim. Despues de la muerte de Sabetay Sevi, Natan pretendio ke Sevi se avia adjuntado a los Trivos Pedridos, biviendo detras del Rio Sambatyon. I ke ayi se avia kazado kon la ija de Moshe. Natan avia deklarado en una letra ke, despues de los syete diyas de la selebrasion de su kazamiento, Sevi iva aboltar i trayer la Redampsion, en kavzo ke sus adeptos lo mereserian. I ke en kavzo ke no lo mereserian, Sevi se kedara detras del Rio Sambatyon, i ke grandes dezastros akonteseran a Israel.

Durante el siglo XIX, el intereso sovre los Trivos Pedridos fue de muevo renovelado. Komunidades djudias mandaron emisarios para bushkarlos, de mizmo ke viajadores privados se metieron en kamino para deskuvrirlos. Entre estos, Yosef Israel, un Djudio nasido en la Rumania i ke bivio entre los anyos 1818 i 1864. Yosef fue un  admirador de Binyamin de Tudela fin’a ke troko su nombre en Binyamin el Segundo. Viajo entre los anyos 1845 i 1859, de Estambol a Ayifto, Siria, la Tierra Santa, Kurdistan, Mezopotamia, Persia, Afganistan i India. I despues a la Amerika del Norte, investigando en kada uno de estos lugares i arekojondo informasiones. Entre las komunidadesde la Asia, renkontro en la India, a la Komunidad de Bene Israel, i fue konvinsido ke esta komunidad era formado de los desendientes de estos Trivos. Entre los viajadores de la Tierra de Israel, el Rabino Baruh Pinsk, viajo en 1830, de Safed a Teyman i fue matado ayi; el Rabino Yithak benBaruh, ke muryo en el anyo 1886, viajo de Tiverya a la India, para topar el Rio Sambatyon; Ezekiel Asche, un mediko nasido en la Alamania, salio en 1848 de Yerushalayim, viajo de Ayifto verso Teyman, i disparesio ayi; el Rabino Moshe Yaffe de Hebron, desparesio i el, en su segundo viajo a la India, en el mizmo anyo de 1848.

Nasido en Maroko, Moshe ben Yitzhak Edrehi, c.1744 i 1842, fue un rabino i un kabalisto ke bivio en Amsterdam i Londra i ke emigro a la Tierra de Israel. Es el otor de dos ovras ke tratan de los Trivos Pedridos. Ma’ase Nisim, publikado en Ebreo i en Alemano, en Amsterdam en 1809, es una deskripsion mistika del Rio Sambatyon. Su segunda publikasion en Londra en 1834, kontiene i la estoria de los trivos deportados, aresentados detras del Rio Smbatyon en el Este kon sus partikularidades kuriozos i relatos sovre los Djudios dispersados en diferentes partes del mundo.

La bushkidad sovre los Trivos Pedridos, fue, aparte de los Djudios, un sujeto de intereso por los Kristianos i los Musulmanos. En diferentes periodos, puevlos indijenos en variados kantones del mundo fueron identifiados kon estos trivos. Entre estos, puedemos notar grupos etnikos biviendo en la Asia komo Afganistan, Azerbaydjian, Kurdistan, Buhara, Kashmir, Burma, China, Japon; en la Afrika Oksidentala komo Mali, Gana, Nijerya; en la Afrika del Sude komo Zimbabwe, Lesoto, Pretoria, Mozambik; en la afrika del Este komo Uganda, Etyopia, Eritrea; en la Evropa komo los Seltes, las Islas Britanikas; en la Oseania komo la Mueva Zelanda; en la Amerika del Sude komo Ekuador, Kolombia, Venezueala; i en la Amerika del Norte komo los grupos indijenos, de mizmo ke los Mormones.

En la literatura islamika el Rio Wadi al-Raml, formado de safra i de piedras fue konektado kon el Rio Sambatyon i los Trivos Pedridos. El Koran akodra el Puevlo de Moshe, i el komentator Mukatil bin Suleyman (767 CE) lo asosia a los Trivos Pedridos. De mizmo, nota ke este puevlo de 70.000 almas, bive detras de un rio de safra en China. Mukatil los yama Ardaf, lo ke asemeja a Arzaf, sitado por Ezra en tanto ke el lugar ande los Trivos se avian refujiado.

En otros hadites es notado ke este puevlo kavako un tunel del Monte del Templo fina la otra parte de la China, i ke yeva ayi una vida de devosion relijiosa, i ke Mohamed lo konvertio al Islam, durante su viaje de noche.

Tekstos djudios komo Pesikta Rabbati i Kreasion Rabba, mensionan ke fue el Dio ke kavako a este tunel del payis de Sambatyon, para ke estos Trivos pueden aboltar al Monte de las Olivas.

Kuanto al Profeto Ezekiel, el se eksprime ansi de la boka del Dio:

Eskuche, va tomar a los Ijos de Israel, los va arekojar de todos los kantones, i los va trayer a sus tierra. I, no seran mas despartidos en dos reynados.”

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: