Situada entre Sicilia, en Evropa, i los paizes en el Norte de Afrika, Malta es una de las mas chikas izlas del Mediterraneo.
Djudios eran trayidos a esta izla de vez en kuando, komo kaptivos del Orden de los Kavalieros de St. John, ke atakavan naves del Imperio Otomano, i las yevavan a portos de la izla onde vendian sus botin: oro, plata i merkansias de valor,. Los djudios ke viajavan a bordo de estas naves eran tomados komo kaptivos i liberados solo despues ke los Kavalieros de St. John resivian para sus arezgatamiento una suma komo Pidyon Shevuyim, pagada frekuentamente por los Deputados (Konsejo de la komunidad djudia) de Livorno o korelijionarios en Italia i otras partes del mundo.
Los ke no eran arezgatados kedavan en la izla, aun ke no siempre aprezados. De toda manera no avia ande ir asta ke pudieran salir de ayi, de manera legala, a bordo de una nave i alkansar sus libertad. Los ke se murian antes de ser arezgatados eran enterrados en un simeterio espesial.
Un otro grupo de djudios ke yego a la izla fueron konversos ke reusheron a fuyir de la Inkizision espanyola ke era aktiva en Sicilia tambien. Algunos de los mas sovresalientes de entre eyos eran anusim, ma inevitablamente i siendo ke no tenian el apoyo de una komunidad observante, eyos kedaron de kumplir los mandamientos de la relijion djudia i mas tadre pedrieron sus identidad djudia tambien.
En 1555 el Papa Paul IV avia exilado a Malta 60 anusim ke avian sido djuzgados komo “judaisantes” i avian sido kondanados a penas diversas. Otros djudios, mas espesialmente de entre los ke avian sido kaptivados, mantuvieron sus identidad al tanto ke lo pudieron. Uno de eyos fue Giuseppe Cohen, ke en 1749 avrio una “kafeteria”, en la epoka ke el kafe era konsiderado komo un beveraje de luso.
En 1798 la izla fue okupada por Napoleon i kedo basho el dominio fransez asta 1800. Finalmente la fuersa de los Kavalieros-pirates avia sido anulada por siempre. La oportunidad para los djudios de vinir a la izla no komo kativos sino ke de sus propio grado, estuvo indo i pujando. El oro i la plata arovados de las naves atakadas fueron dirritidos i uzados para azer objetos de valor. Los fransezes nominaron a un Maestro ke su mision era de kontrolar i asegurar ke la sinyalasion de la plata i del oro era djusta.
Despues ke la izla fue okupada por los inglezes, se kontinuo en el esforso de asegurar la kalidad i de kontrolar la kantidad exakta de oro i plata de kada objeto echo kon estos metales presiozos.
Entre los plateros se topava la famiya Attard, desendiente de anusim. En los rejistros del anyo 1800, aparese el nombre de Giuseppe Attard ke en 1820 fue nominado al posto de kontrolador de kalidad de los objetos de oro i plata.. Los desendientes de esta famiya kontinuaron en el lavoro de plateros asta 1943.
Antonio Attard inkluyo komo marka en sus lavoros de plata, entre las inisiales de su nombre, una estreya de sesh puntas o sea un Magen David. Otros plateros avian uzado en sus lavoros estreyas de diversos modeles i formas, ma pokos fueron los ke uzaron la estreya de sesh puntas, i kada uno de eyos tenia atadijo kon el puevlo djudio.
Algunos pensan ke los Azzopardi, una de las mas antiguas famiyas de plateros, tenian las mizmas rayizes ke Attard i ke sus alkunya era una deformasion del nombre Hasefardi. En 1918, Giuseppe Azzopardi tambien avia inkluido un Magen David en la marka ke uzava para los objetos de oro i plata ke azia.
El governo inglez trusho kon si la prosperidad a Malta i los objetos de plata de esta izla, prinsipalmente las kucharas i los kuchiyos, eran alavados por todos. En los lavoros de filigrana se puedia notar la enfluensa espanyola i sisilyana.
Entre los otros plateros, ke sin duda eran sefaradis, puedemos mensionar a Samuele Hakoun, nombre konosido al seno de las komundiades de Afrika del Norte. En 1862, ya estava enrejistrado kon su marka. A vezes el italianizava su alkunya a la de Hakouno, i la uzava komo marka. En otros kavzos el uzava simplemente sus inisiales, segun lo azian otros plateros.
Un otro platero sefaradi fue Abramino Toledano, desendiente de una famiya de ekspulsados ke se avia aresentado en Maroko. Ay muy poka informasion sovre el i su logo tiene solamente las inisiales de su nombre.
Sir Moshe Montefiori ke vijito en Malta, 1838, avia topado ayi 6 famiyas djudias solamente, aun ke avia tambien munchos djudios ke estavan de vijita en la izla.
La komunidad djudia de Malta fue siempre chika, ma aun kon esto, durante la II Gerra Mundiala eya reusho a azer de la izla un lugar onde pudieron topar refujio i abrigo un sierto numero de djudios de otras partes de Evropa.
Artículos Relacionados: