Los sefaradies de Ardjentina

Por:
- - Visto 562 veces

La historia de las comunidades sefaradíes de Argentina presentada en forma síntetica y en ladino/ judeo-español:

Lugares de procedencia, fechas, actividades comunitarias y breves relatos sobre los inicios de las comunidades de Turquía, Grecia y los Balcanes, Marruecos, Alepo, Damasco y otros, en Argentina.


Los sefaradies de Ardjentina arivaron de distintos paises i se organisaron asigun su orijen en kuatro grupos komunitarios: “los ladino-avlantes de la Turkia”, “Gresia i los Balkanes”, “los marokanos”, “los Alepinos i los de Damasko”, i de mezmo chikos grupos  de otros orijenes.

Los ladino-avlantes de la Turkia, Gresia i los Balkanes

Los djudios del Imperio Otomano salieron a la final del siglo XIX por problemas ekonomikos en primo lugar,  por la ovligasion del servisio militar en sigundo i por la situasion politika en tresero. ¡A la Amerika! se dezia en el Serkano Oriente i en Evropa. Los primos en yegar, eran la mas parte varones, mansevos ke alkilavan una kamareta entre unos kuantos i mas tadre mandavan a venir sus famiyas.

Las kalorosas letras ke los primos  en yegar mandavan a sus famiyas i amigos sovre la prospera Ardjentina,  a mas ke se avlava en kasteyano, enkorajavan a los sefaradies a venir aki.

Munchos djudios ampesaron lavorando komo merkadores ambulantes (en la kaye). Merkavan telas, ropa, medias, djugetes i mas. Otros tenian ofisios komo shastre, kunduradji (chapinero), i otros.

En la Capital, Buenos Aires, moravan serka del puerto, en el “centro” , en las kayes “Reconquista” i “25 de Mayo” entre “Corrientes” i “Paraguay” i tenian magazenes “al por mayor”.

En el interior de Ardjentina moraron  en las grandes sivdades komo Cordoba, Rosario i Tucuman o fueron a las frontera  ke rezien eran tomadas de los indijenas komo Chaco i Formosa i merkavan en la kaye o tenian magazenes de “Ramos Generales”, kere dezir de todo un poko.

Los primos minianim se arrekojian en kazas partikulares i en el anyo 1905 se krea el primer templo sefaradi de avla espanyola “Etz Hajaim” en el primo etaj de una kaza prove en la kaye “25 de Mayo” i “Viamonte”.

Templo Chalom de Buenos AiresMalgrado ke tenian kostrumbres i lingua en komun estas komunidades kerian mantenerse endjuntas por su lugar de orijen, por eksemplo los ke vinieron de Rodas krean serka la organizacion “Bene Sion” i algunos de estos, mas delantre krean el Templo Chalom (ande vamos mi marido i yo).

En 1914 los minianim del kuartier de “Villa Crespo” ke se arekojian en una kamareta chika en un terraso alkilan un salon en una kaza en la kaye “Guruuchaga” numero 421. Es ayi ke meten un Sefer Tora i una Teva i bankos para un chiko Talmud Tora. Ansi es ke se krea el Kahal Kadosh i Talmud Tora “La Hermandad Sefaradi”.

En 1916 se krea la organizacion “Hesed Chel Emet” en el kuartier de “Villa Crespo” kon el buto de merkar tierra para un betahayim propio i poko después se krea un lugar para los djovenes el “Club Social Israelita” en la kaye “Reconquista” al 600.

En 1918 el Kahal Kadosh funsionava en la kaye “Acevedo” al 218 i para poder merkar un lugar proprio deven de  trokar el nombre a “Comunidad Israelita Sefaradi de Buenos Aires (CIS)” en 1919,  se arekojio paras kon muncho esforso i se merko un lugar proprio en la kaye “Camargo” al 870, ande esta asta oy.

Se inauguro el 21 de septiembre de 1919 i entre los hahamim ke aktuaron aki,  rekodramos a Samuel Buchuk, Leon Alaluf, Leon Catan, Jacobo Caballero,  Bension Cohen, Selim Mizrahi i Isaac Mayo. I entre los rabinos a Shabetay Djaen de 1929 a 1931 i desde 1958 al Gran Rabino Aaron Angel ke aresivio el premio Jerusalem por su aktuasion en la edukasion de los djovenos djudios en la Diaspora.

En 1929 se merka una parte del sementerio de “Ciudadela”, de la komunidad alepina (de esto kontare mas adelantre), asta este momento se uzo el sementerio ashkenasi, i en 1951  se merka el sementerio de “Bancalari”.

En 1922 se krea en este kuartier el “Club Social Comision Directiva de la Comunidad Israelita SefaradiIsraelita Sefaradi (CSIS)” en la kaye “Padilla” al 727,  ke troko unas kuantas vezes de adreso i el dalkavo fue “Malabia” al 252.

Se kreo porke era menester un lugar ande se arekojieran los djovenes i las madres pudieran mandar a sus ijas  kon trankilidad.

Los varones tenian mas posibilidades ke las mujeres, asta este momento se reunian en salones de baile i en el Bar Izmir.

En los anyos 1940 CIS se troka a una kehila de las komunidades sefaradies de de lingua espanyola i se yama ACISBA “Asociacion Comunidad Israelita Sefaradi de Buenos Aires”.

En estos anyos yegan a Ardjentina djudios  de Yugoslavia, Bulgaria i Italia eskapando del espanto de la gerra.

El kuartier de “Flores” era ande moravan los inmigrantes de Izmir i de Aydin.

El primo lugar de reunión fue una chapinería (zapatería en espanyol) en la kaye “Rivadavia” 7785, de mezmo aki  a la fin de la semana los ombres se ajuntavan a djugar kartas “a la turka”.

Para las orasiones i las fiestas primero se arrekojian en kazas partikolares asta ke pudieron alkilar una kaza de ocho kamaretas i patio grande en “Rivadavia” 7928 kon el nombre de Ahavat Ajim, este Templo troko de adreso unas kuantas veces asta ke se kedo  en la kaye “Campana” 243.
Djunto kon el Templo aynda avia una parte sosial para las famuyas i los djovenes, primero se yamo “Union Juventud Israelita de Flores” i después “Asociación Israelita Sefaradi Union Hermanos de Flores”.

En 1950 se merko una propiedad en la kaye “Azul” ande se levanta el Templo Bet Israel. Kuando las famiyas tuvieron mejor ekonomia se fueron a morar a otros kuartieres de la sivdad, de mezmo kuando se ivan kazando i se ajuntavan a otras komunidades.

Los ke venían de Estambol tenían un chiko miniam ke, de mezmo ke las otras komunidades ke ya vos dishe, se arrekojian en kazas de famiya  o en kazas de alkilar.

Esta komunidad ke se yama Bene Mizrah  empeza por los anyos de 1930 i kon esforso merkan una propiedad en la kaye “Tucuman” 3173 i mas tadre se trokan a la kaye “Salguero” 758 i krean una sinagoga, una sede sosial i una parte para djovenes, a la fin de los anyos  de 1970 funsionan en este mismo lugar tambien el “Seminario Judaico” i la “Escuela Judia de Psicología Social”.

Oy ay aki una chika komunidad,  el Templo tiene agora una gran kamareta al fondo i se avre solo para las  Altas Fiestas, en la parte de adelantre es ke esta el CIDiCSef i en el etaj  de enriva Kadima, ke es para deporte i sosial, ma kada uno es independiente del otro.

Los primos ke yegaron de las izlas del Egeo, en mas parte de Rodas fue por el empesiyo del siglo XX,  antes de la Prima Gerra Mundiala, eran mansevos en grupo kon famiyas i amigos.

Komo dishe al empesisho,  estavan en el “centro”  (ke no es el centro de la sivdad) en la kaye “Reconquista”, djuntos en Bene Sion, ma despues se espartieron i se asentaron en  la parte norte de la sivdad.

Los “rodeslis” (de Rodas), los “selaniklis” (Salonik) i  “coslis” (Cos), se fuyeron a los kuartires de “Colegiales”, “Belgrano” i  “Coghlan” por kudiar las tradisiones propias.

Otro grupo yego para el empesiyo  de la Sigunda Gerra Mundiala, kuando las izlas eran basho bandiera italiana  i se metio el fasismo.

Komo las otras komunidades, estos de mezmo se arrekojian en kazas de famiya, en Novembre de 1929 se krea el “Centro Cultural y Recreativo Chalom”, ke en 1937 troka su nombre a “Sociedad Israelita Sefaradi Chalom”, su buto es sostener el kulto israelita de akordo  al nusaj sefaradi i por esto se levanta el Templo en la kaye “Olleros” 2876 ke se inaugura  para las Altas Fiestas de 1937.

Aki estuvieron los rekordados rabinos Shabetay Djaen, Michael Molho i Mordejay Edery.

Las aktividades sosiales se azian en una kaza al lado del Templo i en 1953 se krea el “Club y Talmud Tora” muy serka, en la kaye “Cramer” 450.
El “Club y Talmud Tora” ya no funsionan mas, ma el Templo “La Paz” Chalom kon una chika komunidad todavía esta  en este mismo lugar.

La komunidad marrokana

Los marrokanos arrivaron a la Ardjentina  en el anyo 1880, dizen ke el primer sefaradi nasido aki fue un ijo del senyor Isaac Benchetrit el 2 de djunio de 1881.

Ya avia en Ardjentina djudios de Evropa ke tenian kreada la “Congregasion Israelita de la Republica Argentina” i esto marrokanos se unieron a eyos, ma eyos kerian azer sus orasiones al modo marrokano i kuando fueron yegando mas famiyas ampezaron a adjuntarse en kazas partikolares.

Yegavan de Tetuan, Ceuta, Tanger i Arcila en una koriente migratoria no organisada, por bushkar mejores orizontes ekonomikos i de progreso propio.

Los ke yegavan primero se asentaban  i mas tadre traiyan a sus djenitores, ermanos i amigos. Bushkavan a estar enjuntos por kudiar el kulto (la relijion) lo sosyal i el kudiado de los muertos, es dizir el Templo, el klub i el simiterio.

Los primeros ayegados eran espesialisados por teshidos i sinyalaron el kamino ekonomiko ke tomo esta komunidad.

Unos kedaron en la “Capital” (Buenos Aires) i otros marcharon al interior del pais. En sigiendo las rutas de los trenos los djudios del Marroko avrieron sus butikas en Santa Fe, Cordoba, Chaco, Formosa, Entre Rios, i la “Provincia de Buenos Aires” (no la sivdad).

En la sivdad de Buenos Aires se instalaron en el kuartier de “San Telmo”, serka del puerto ande se konsentrava la vida komersial a la fin del siglo XIX i al empesijo del siglo XX.

Los primeros minianim se arrekojeron ayinda en kazas de famiya, ma tenemos haber de un templo de los djudios portugesos i españoles en la kaye Cordoba 1156,   para 1890.

En 1891 se krea la “Congregacion Israelita Latina”, pero resien el 1915 se organiza djuridikamente i troka su adreso a “Venezuela” 594 o 783 ( no esto sigura kual). Savemos tambien ke en 1905 avia otrun templo: “Ets Hayim”.
En el anyo 1917 la “Congregacion Israelita Latina” tiene problem para pagar el alkiler, i se aze una kampanya para kolektar paras.

Se merka entonses el terreno de la kaye Piedras 1164. Para septembre de 1919 se inaugura el “Templo Grande” o la “Tefila Grande” de la komunidad marrokana. Durante Hanuka de 1920 se mete el nombre de “Bet El” al templo.

Tuvo una vida kulturala aktiva, tanto ke en 1925 tuvo la vijita de Albert Einstein.

Vijita de Albert Einstein a la Ardjentina

Ma el templo de “Piedras” no fue el uniko, a partir de los anyos 1920 tenia otras dos sinagogas mas chikas: “Bet Raquel” i Aleluya”.

El Templo Raquel fue derrokado para fraguar la ancha i famoza “Avenida 9 de Julio”. El Templo Aleluya troka su nombre a Javerim, ma serra sus puertas en 1976.  Todos los miembros de los dos templos se unaron al templo de la kaye Piedras. El lugar de reunion de la komunidad marrokana era el “Club Social Alianza” fondado a la fin de 1919.

La Hevra Kadisha de la komunidad marrokana de Buenos Aires se fondo en febrero de 1894, ma por konfliktos internos entre institusiones se separan i se krea en 1897 la “Gemilut Hasadim”, es esta institusion ke merka en el anyo 1900 el primero semeterio djudio de Buenos Aires en la sivdad de “Avellaneda”.

En 1917, la sosiedad kreada para benefisensia en 1905, Hesed Veemet, ke tenia de mezmo era la propietaria  del simiterio, le desha esta parte a la “Guemilut Hasadim, i se troka a “Sociedad Israelita de Socorros Mutuos Merced y Verdad”.

Un dekreto del Ministerio de Djustisia  la ovliga a trokar el nombre de “Sociedad” por “Asociacion”. En 1956 empiesa a ser una sosiedad de “Damas”, asta este punto las komisiones eran de ombres.

Asosiasion de damas de "Cordoba"

Esta institusion ayudava a los inmigrantes i  dava vistimenta, matzot para Pesah  i paras a los menesterosos.

Para 1960 esta komunidad tenia tres sosiedades ke funsionavan de modo independiente: la “Congregacion”, la “Guemilut Hassadim” i el “Club Alianza”, ma se puso en marcha el “Plan Fusion” para unir las tres institusiones.  La “Asociacion Israelita de Socorros Mutuos Merced y Verdad” kedo independiente.

En 1976 se unieron formando una kehila, la “Asociacion Comunidad Israelita Latina de Buenos Aires (ACILBA).

El eksito ekonomiko de algunos membros de la komunidad izo ke se troken a otros kuartieres i los adresos de las institusiones keden leshos de las kazas, por esto munchos se fuyeron a otras komunidades. Malgrado esto sige funsionando.

Las komunidades de orijen Sirio

Los “ashwan” (plural de shami, de Damasco), vienen de la sivdad yamada en arabe Ish-Sham, a este grupo  se adjuntaron algunos djudios de Beirut. i los “halabim” vienen de Alepo (Halab).

Las primeras djentes de esta comunidad yegaron por 1908, los de Damasco entre 1910 i 1925 i los de Alepo  entre 1914 i 1924, algunos por su situasion ekonomika i otros por la politika,  bushkando mejores kondisiones i salvarse del servisio militar (askerlik) ke era ovligado para las minorias en el Imperio Otomano.

De mesmo en Damasco i mas en Alepo se sintio la avyertura del Kanal de Suez ke termino kon las karavanas ke eran importantes para la ekonomia de estas sivdades.

Los mas ke inmigraron a la Amerika Latina fue a la Ardjentina i en manko kantidad a Meksiko i Brasil. Unos yegaron aki porke fueron niegados de entrar a Norte Amerika  por  el konsulado amerikano en Marsella.

Manko los elevos de la  “Alliance Israelite Universelle” ke fueron kontratados komo maestros i administradores  en las kolonias del kampo de la “Jewish Colonization Association” todos los inmigrantes arivavan de mezmo modo, sin organisasion ni apoyo i se ajuntavan en las grandes sivdades, lo mas en la kapitala,”Buenos Aires”.

El grande numero de ombres solos ke venian de Oriente izo ke en algunos kavzos desharon abandonadas a sus mujeres para tomar otras aki. Munchas de eyas era djentiles ke eran konvertidas  al djudaismo, por esto el Rav. Shaul Setton Dabahh dikto su takana para defender ke se izieran konversiones al djudaismo en Ardejntina.

Los “ashuam” moravan en el kuartier famozo yamado “La Boca” i komo todas las otras komunidades bushkaron de alevantar una komunidad kon un templo.

Al empesijo algunos metieron sus botikas  de tejidos en la kaye komersial “Reconquista” del kuartier.

Para 1915-1920 el kuartier de “La Boca” i el kuartier de “Barracas”, ke esta al lado ,se tornaron morada de esta komunidad. Mas en delantre otros lugares tambien fueron morada de los sirianos komo el kuartier de “Flores”, leshos de los otros i “Lanus” afuera de la sivdad de Buenos Aires.

Desde 1925, kon un poko de eksito ekonomiko algunas famiyas se trokan al kuartier de “Flores”.

Algunos alepinos se asentaron en el kuartier de “Once” i lo izieron muy famozo en el mundo komo el centro mas importante de tejidos de Ardjentina.

La mas parte de lo inmigrantes lavorava komo  “hamlero” (hamle se dize en  arabe al paketo de merkansia ke se mete al ombro). Ansi ivan por las Kayes vendiendo telas, sintas i kordones para el pelo, telas, botones, ropa interior, espejos, peines i mas.

Unos ermanos ke vinian de Alepo, Nissim i Ezra Teubal izieron una grande fortuna i se izieron benefaktores de la komunidad djudia. Estos ermanos empezaron kaminando  i merkando en la kaye i krearon una sosietad de merkadores de la kaye para merkar a mejor presio. Formaron la “Compañia Ottomana” i se konvirtieron en mayoristas. Pronto avrieron butikas tambien adentro del país, en Rosario, Cordoba i Tucuman. En 1910 los ermanos trujeron a sus djenitores i ermanos de Alepo.

Del anyo 1935 en delantre los vendedores de la kaye avrieron sus propias botikas. En los anyos 1960 los alepinos levantan la “Cooperativa Mayo” ke mas tadre fue el “Banco Mayo”.

Por los anyos de 1920 estas komunidades se adjuntan por su komunida de orijen: sinagogas, sosiedades de kulto i edukasion. Al demandar porke tenian organizasiones separadas , dijeron ke esto venia de su pais de orijen. Por los anyos 1990 los miembros de kada una se van adjuntando ma kada komunidad keda kon sus institusiones.

La “Asociacion Israelita Sefaradi Bene Emeth” fue levantada por los inmigrantes de Damasco en 1913, oy esta en la kaye “Lavalle” 2559, se okupa de los muertos de akodro kon las kostumbres i leyes mosaikas, i tienen su simiterio en “Lomas de Zamora” afuera de la kapitala, desde 1915; tambien se okupa de dar ayuda a los menesterosos, asilos, ospitales i mas.

En 1939 troko su nombre a “Asociacion Israelita Sefaradi Hijos de la Verdad” por demanda de las otoridades de azer kasteyano su nombre. En este punto su adreso estava en la kaye “Tucuman” 2377.

En 1920 se alevanta la “Asociacion Israelita Sefaradi Luz Eterna” (Or Tora) ke auna las sinagogas de los kuartires de “La Boca i “Barracas”. El Templo, ke oy esta en la kaye “Brandsen” 1444, se inauguro el primer dias de Pesaj de 1930. Su arkitektura es moriska i esto le da una ermozura partikolar ma no es una kopia de ninguna sinagoga espanyola ni de Oriente. Tiene una kupula ke se avre i deja entrar la luz natural. El Templo fue renombrado komo Jesed Le-Avraham i tiene Talmud Tora i una yeshiva.

En 1913 se alevanta la “Asociacion Comunidad Israelita Sefaradi de Flores Agudat Dodim” kreada por inmigrantes de Damasco del kuartir de “Flores”. El primo knis i el Tamlud Tora antes de esto estava en una kaza partikolar en la kaye “Bogota” 3165, ma en 1922 se merko un terreno en la kaye “Avellaneda” 2874 ande kon muncho esforso se inauguro el Templo en 1925.

En las dekadas sigientes la komunidad kresio i aumento sus sosios. En 1955 se izo mas moderna la edukasion i kon el tiempo se alevanto el “Colegio Maimonides”.

Endjunto kon la “Congregacion Yesod Hadath, Agudat Dodim es una de las dos institusiones mas importantes de Ardjentina i de Amerika Latina.
La institusion mas importante de la komunidad de Alepo es la “Asociacion Israelita Sefaradi Argentina” kreada en 1923 kon el nombre “Hesed Shel Emet Sefardit” i ke mas tadre troko su nombre a “Asociacion Israelita Sefaradi Argentina de Beneficencia” (AISA), su buto era el simiterio, la edukasion, la kultura i las aktividades de ayuda. Esta en la kaye Paso 493 i kontrola el simiterio de “Ciudadela” ande tambien se entierravan ashkenasim i sefaradim ladinoavlantes asta ke se avrieron los simiterios “La Tablada” para los ashkenasim i de “Bancalari” para los sefaradim.

La “Congregacion Sefaradi de Enseñanza, Culto y Benficencia Yesod Hadath” tiene su sinagoga en la kaye “Lavalle” 2449. Su Bet Din fue durante muncho tiempo el uniko de toda la komunidad sefaradi de Ardjentina.

En 1922 un grupo de inmigrantes de Alepo del kuartier de “Flores” se adjuntan a resar en adresos partikolares por las kayes “Avellaneda” i “Cuenca”.

En 1925 se krea “Shaarei Sion” komo un grupo para azer el kulto i para partajar la esnenyasa relijiosa.  En primero estuvo en la kaye “Aranguren” 3236 i en 1938 en la kaye “Campana” 447 ande funsionava la sinagoga i el Talmud Tora.

“Sucath David” es una institusion ke se alevanto en 1949, kuando un grupo de djovenos alkilo una kaza en la kaye “Viamonte” para Iamim Noraim. Mas tadre se troko a la kaye “Paso” 724 en el kuartier de “Once”. Aki se azen klazas para espozados,  Tamud Tora, kampamentos de enverano i mas. Tambien tiene un restauran kasher.  Agora la enkontramos en la kaye “Tucuman” 2750.

El Templo “Yeshurum” se enkuentra en el kuartier de “Palermo” en la kaye “Republica de la India” 3035, la alevanto djente de la “Congregacion Sefaradi” ke se troko su morada a este kuartier.

Yerushalmis i otras komunidades

En los primos anyos del siglo XX arivaron a la Ardjentina un chiko grupo de inmigrantes ke venian de Eretz Israel ke estava basho el dominio del Imperio Otomano.

Eran djentes de la komunidad djudia ke morava en Eretz Israel desde antes de las “aliot” de 1880. Estos djudios moravan en las kuatro Sivdades Santas: Yerushalayim, Safed, Tiberiades i Hevron, unos kuantos aynda en el porto de Yafo.

Entre eyos ay “mustaarabim”, djudios arabizados. En su mas parte son sefaradis “tehorim”, desendentes de los ekspulsados de Espanya. Ay tambien marrokanos, sirianos, persianos, kurdos, “gurdjis” o gerogianos, buharalies i ashkenasis, de todas las partes del mundo enkontrados en la Tiera de Israel i vinidos a la Amerika.

Al emigrar en tiempos kontemporaneos se los konose komo “Yerushalmis”. Estos Yerushalmis tenian una organizasion propia,  para los enterramientos se adjuntaron a Hesed shle Emet Sefardit, agora AISA, la institusion de los djudios de Alepo.

Los Yerushalmis se sintian serka de la komunidad “Halabi” i esto se vio de mezmo en la vida sosiala i en los esposorios,  ma tenia la lingua djudeo-espanyola.

La Kehila Yerushalmit se kreo en el empesijo de los anyos 1920 en una botika de la kaye “Larrea”, luego se troko a la kaye Pasteur 463 ande también funsionava el “Colegio Hatikva” asta ke serro sus puertas en 1931.
De mezmo tienen la “Asociacion Israelita Sefaradi Templo Jerusalem” ke desde 1955 esta en la kaye”Tucuman” 2153.

Endjunto kon las grandes korrientes de inmigrasion sefaradi arrivaron a la Ardjentina otros chikos grupos, sefaradien en el senso mas amplio.

Ademas de los ya nombrados Yerushalmis yegaron por eksemplo djudios italianos, ladino-avlantes yugoslavos, rumanos i bulgaros, de Afrika vinieron egipsianos i de Asia, kurdos, “gurdjis o georgianos, persianos i bujaralies.

Los djudios italianos no tuvieron organizasion formala ma se adjuntavan en una kaza para aktividades sosialas i arekojer paras para ayudar a Israel, los ke keren ir a la sinagoga van al Templo de la kaye “Camargo” o a “Chalom” i entierran a sus muertos en el simiterio de “Bancalari”.

Los sefaradis de lo ke fue Yugoeslavia moravan en Saray, Travnik i Derbenka (Bosnia), Monastir (Makedonia), Belgrado (Serbia) i otros; i avlaban el djudeo-espanyol.

Aki se organizaron en la “Asociacion de Israelitas Oriundos de Yugoslavia en la Argentina” asentandose en la kaye “Las Heras” 1646, se arrekojian ahi sefaradim i ashkenasim. Azian reuniones sosialas i davan ayuda a sus menesterosos. De mezmo ke los italianos van al Templo de la kaye “Camargo” i al simiterio de “Bancalari”.

Los “bujaralies” son los djudios de Asia Sentrala, oy Uzbekistan. Moraban en la sivdad de Bujara, en Samarkanda i en Tashkent. Los djudios persianos se adjuntaron a los djudios yerushalmis i alepinos.

Las komunidades sefaradies de adientro de Ardjentina

Almasen de ramos djenerales en "Quindilipi, Chaco" - 1926

Adientro de Ardjentina en las “provincias” eksisten komunidades sefaradies en:

  • Mendoza: “Sociedad Israelita de Beneficencia
  • Salta: “Sociedad Israelita Salteña ‘La Union’ “
  • Corrientes: “Asociacion Isrealita de Corrientes”
  • San Juan: “Sociedad Israelita de Beneficencia de San Juan”
  • Misiones: “Asociacion Israelita de Socorros Mutuos ‘Hijos de Sion’ “
  • Cordoba: “Union Israelita Sefaradi”
  • Santa Fe: “Asociacion Hebrea Sefaradi de Socorros Mutuos” en la sivdad de Santa Fe i la “Asociacion Israelita Sefaradi Schebet Ahim” i la “Asociacion Israelita Sefaradi Etz Ajaim en la civdad de Rosario.
  • Entre Rios: “Asociacion Argentina Sefaradi”
  • Tucuman: “Asociacion Israelita Sefaradi de Beneficencia, sede Social y Templo Ierushalaim”
  • Chaco: “Asociacion Israelita Latina ‘Merced y Verdad’ “

Esta nota fue realizada a partir de un mensaje del foro LadinoKomunita alentando a sus miembros a escribir sobre las comunidades sefaradíes del país de procedencia.

La mayor parte de los datos fue extraída del libro “Presencia Sefaradí en Argentina” editado por el CES (Centro de Estudios Sefaradíes).

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: