Los sefaradis i la chokolata

por Moshe Shaul -
Comentarios | Comentar Visto Veces



Moshe Shaul / Diario Judío México – Entre los djudios ekspulsados de Espanya en 1492 avia un numero konsiderable de eruditas i ekspertos en kaje todos los kampos de la vida; komersio i finansas, sensia i teknolojia, medesina, diplomasia i mas i mas…

Aun ke no todos pudieron kontinuar en sus lavoros i profesiones en los paizes a los kualos yegaron, uvo munchos ke reusheron a adelantar i mizmo a kontribuir de manera muy apresiable a la kultura i ekonomia de los paizes ke los avian resividos.

Podemos mensionar, komo exemplos bien konosidos, a los sentros de industria de tekstil en Saloniko i en Safed; la edision de livros en las imprimerias ke krearon en Venezia, Livorno i Ferrara ansi ke en Estambol, Saloniko i otros lugares mas; la fundision de kanones ke ayudaron a las fuersas del Imperio Otomano a konkistar gran parte de la Evropa sentrala, i mas.

Un alkanse asta ultimamente poko konosido, en este kampo, es el rolo de los sefaradis en el dezvelopamiento de teknolojias para la produksion no solo de asukar i vanilya sino ke de la chokolata tambien. En el artikolo de Mordehay Arbell sovre la asukar, publikado en el No.66 de Aki Yerushalayim, el ya toko al importante rolo djugado por los konversos de Espanya i Portugal ke emigraron al kontinente amerikano, onde tornaron a ser djudios, en la produksion de asukar i su eksportasion a Evropa. Ma no solo esto. En algunos artikolos publikados ultimamente, en segito a las investigasiones ke fueron echas en este kampo, es apuntado ke los sefaradis fueron un faktor sentral, tambien en el dezvelopamiento de prosesos para la produksion de la chokolata.

Es verdad ke los granos de kakao, la materia prima de la chokolata, fueron traidos por Colon, del kontinente amerikano ke venia de deskuvrir. Los Aztekes uzavan el kakao para azer un beveraje amargo ke yamavan “shokolatl” (agua amarga) i ke konsomavan komo afrodiziako; ma al prinsipio ninguno en Espanya no savia kualo azer de estos granos. Es solo en 1528, kuando Hernando Cortes trusho un metodo para la preparasion de chokolata, ke la popularidad de este beveraje se espandio no solo en Espanya sino ke en otros paizes tambien de Evropa.

Djuntos kon esto los espanyoles no revelaron este metodo ke kedo sekreto asta ke en 1606 un viajador italiano reusho a deskuvrirlo i lo trusho a Italia.

Poko despues de esto, los sefaradis ke se avian aresentado en la parte de Brasil konkistada por los olandezes, embezaron el sekreto de la preparasion de la chokolata de los trivos indijenes kon los kualos tenian buenas relasiones.

El ke se distingio mas en el kultivo de kakao i la produksion de chokolata fue Benjamin d’Acosta de Andrades, ke avia yegado a Brasil komo konverso i avia tornado ayi a la relijion djudia. Kuando el Brasil Olandezo fue konkistado por los portugezes, en el anyo 1654, i ke los djudios de ayi duvieron bushkarsen muevos lugares onde bivir, de Andrades se aresento en la kolonia franseza Martinique, en los Caribes. El kreo ayi dos plantasiones de asukar i una empreza moderna para la produksion del kakao i de la chokolata ke el eksportava a Evropa, aprovechandose de los kontaktos ke tenia kon sus parientes, amigos i konosidos djudios ke bivian ayi.

En kurto tiempo i visto la grande popularidad de la chokolata, otros djudios de La Martinique se djuntaron eyos tambien al kultivo del kakao i a la produksion de chokolata ke yegaron a ser de los prinsipales produktos de eksportasion de esta izla.

Esta prosperidad no turo muncho tiempo. En 1685 los djudios fueron ekspulsados de Martinique tambien i aun ke eyos trezladaron sus aktividad a Curacao i a Jamaica, en el siglo 18 pujo muncho la produksion de kakao en Afrika, kon presios muncho mas baratos, i las komunidades djudias de los Caribes pedrieron el lugar sentral ke tenian en este ramo.

Ma aun kon esto, se puede afirmar, en baza de las investigasiones istorikas, ke desendientes de los djudios ekspulsados de Espanya fueron un faktor desizivo en el dezvelopamiento de la industria de chokolata, ayudando tambien a la kreasion de otros produktos en el kampo de la gastronomia.
En la sivdad de Bayonne, por exemplo, en el sud de Fransia, avia una importante komunidad de konversos ke avian tornado a ser djudios. Esta komunidad fue la ke mas aprovecho la asukar, el kakao i la vanilya ke venian de la rejion del Caribe para la produksion de toda una seria de produktos, yegando a ser konsiderada komo la kuna onde nasio la patiseria de Fransia.

Fuente: AKI YERUSHALAYIM #93

La Dirección y Consejo Editorial de "Diario Judío México", no se hacen responsables de los contenidos de artículos firmados por autores, periodistas o sus seudónimos, a la vez que el autor de este artículo no se responsabiliza de los contenidos de las diferentes secciones de este sitio, ni de los criterios establecidos por su Dirección o Consejo Editorial.

1 COMENTARIO

  1. Los sefaradis i la chokolata

    Entre los djudios ekspulsados de Espanya en 1492 avia un numero konsiderable de eruditas i ekspertos en kaje todos los kampos de la vida; komersio i finansas, sensia i teknolojia, medesina, diplomasia i mas i mas…

    Aun ke no todos pudieron kontinuar en sus lavoros i profesiones en los paizes a los kualos yegaron, uvo munchos ke reusheron a adelantar i mizmo a kontribuir de manera muy apresiable a la kultura i ekonomia de los paizes ke los avian resividos.

    Podemos mensionar, komo exemplos bien konosidos, a los sentros de industria de tekstil en Saloniko i en Safed; la edision de livros en las imprimerias ke krearon en Venezia, Livorno i Ferrara ansi ke en Estambol, Saloniko i otros lugares mas; la fundision de kanones ke ayudaron a las fuersas del Imperio Otomano a konkistar gran parte de la Evropa sentrala, i mas.

    Un alkanse asta ultimamente poko konosido, en este kampo, es el rolo de los sefaradis en el dezvelopamiento de teknolojias para la produksion no solo de asukar i vanilya sino ke de la chokolata tambien. En el artikolo de Mordehay Arbell sovre la asukar, publikado en el No.66 de Aki Yerushalayim, el ya toko al importante rolo djugado por los konversos de Espanya i Portugal ke emigraron al kontinente amerikano, onde tornaron a ser djudios, en la produksion de asukar i su eksportasion a Evropa. Ma no solo esto. En algunos artikolos publikados ultimamente, en segito a las investigasiones ke fueron echas en este kampo, es apuntado ke los sefaradis fueron un faktor sentral, tambien en el dezvelopamiento de prosesos para la produksion de la chokolata.

    Es verdad ke los granos de kakao, la materia prima de la chokolata, fueron traidos por Colon, del kontinente amerikano ke venia de deskuvrir. Los Aztekes uzavan el kakao para azer un beveraje amargo ke yamavan “shokolatl” (agua amarga) i ke konsomavan komo afrodiziako; ma al prinsipio ninguno en Espanya no savia kualo azer de estos granos. Es solo en 1528, kuando Hernando Cortes trusho un metodo para la preparasion de chokolata, ke la popularidad de este beveraje se espandio no solo en Espanya sino ke en otros paizes tambien de Evropa.

    Djuntos kon esto los espanyoles no revelaron este metodo ke kedo sekreto asta ke en 1606 un viajador italiano reusho a deskuvrirlo i lo trusho a Italia.

    Poko despues de esto, los sefaradis ke se avian aresentado en la parte de Brasil konkistada por los olandezes, embezaron el sekreto de la preparasion de la chokolata de los trivos indijenes kon los kualos tenian buenas relasiones.

    El ke se distingio mas en el kultivo de kakao i la produksion de chokolata fue Benjamin d’Acosta de Andrades, ke avia yegado a Brasil komo konverso i avia tornado ayi a la relijion djudia. Kuando el Brasil Olandezo fue konkistado por los portugezes, en el anyo 1654, i ke los djudios de ayi duvieron bushkarsen muevos lugares onde bivir, de Andrades se aresento en la kolonia franseza Martinique, en los Caribes. El kreo ayi dos plantasiones de asukar i una empreza moderna para la produksion del kakao i de la chokolata ke el eksportava a Evropa, aprovechandose de los kontaktos ke tenia kon sus parientes, amigos i konosidos djudios ke bivian ayi.

    En kurto tiempo i visto la grande popularidad de la chokolata, otros djudios de La Martinique se djuntaron eyos tambien al kultivo del kakao i a la produksion de chokolata ke yegaron a ser de los prinsipales produktos de eksportasion de esta izla.

    Esta prosperidad no turo muncho tiempo. En 1685 los djudios fueron ekspulsados de Martinique tambien i aun ke eyos trezladaron sus aktividad a Curacao i a Jamaica, en el siglo 18 pujo muncho la produksion de kakao en Afrika, kon presios muncho mas baratos, i las komunidades djudias de los Caribes pedrieron el lugar sentral ke tenian en este ramo.

    Ma aun kon esto, se puede afirmar, en baza de las investigasiones istorikas, ke desendientes de los djudios ekspulsados de Espanya fueron un faktor desizivo en el dezvelopamiento de la industria de chokolata, ayudando tambien a la kreasion de otros produktos en el kampo de la gastronomia.
    En la sivdad de Bayonne, por exemplo, en el sud de Fransia, avia una importante komunidad de konversos ke avian tornado a ser djudios. Esta komunidad fue la ke mas aprovecho la asukar, el kakao i la vanilya ke venian de la rejion del Caribe para la produksion de toda una seria de produktos, yegando a ser konsiderada komo la kuna onde nasio la patiseria de Fransia.

    Fuente: AKI YERUSHALAYIM #93

Deja un comentario

Artículos Relacionados




También podría interesarte

por Luis Madrigal Tascón -

por Michael Krutikov -