Massada

Por:
- - Visto 974 veces

Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

En pokos diyas, kijo dizir alhad a la tadre, vamos a entrar en Rosh Ashana, i a esta okazyon tengo el grande plazer de dezearvos a todos, keridos oyentes, una anyada buena i dulse, kon vuestros keridos al lado de vozotros.

Esto dicho, es yene de koza triste ke vos kyero avlar oy, la istorya de la kalé de Massada i de sus 960 moradores, ke kayeron en el anyo 73, tres anyos despues de la kaida i estruisyon de Yerushalayim, al kavo de la primera rebuelta de los Djudyos kontra los Romanos.


Es vedra ke, kuando vos ize el 3 de avril 2008 una emisyon sovre la primera rebuelta de los djudyos, ya vos avli de Massada, ama esta vez lo kyero azer kon mas detalyes, fundandome sovre dos livros essensyales: en primero el livro intitolado La gerra de los Djudyos, livro eskrito entre 75 i 79 por el istoryano djudyo Flavius Josephe en arameo, ama solo konosido en su traduksyon grega, i tradusido del grego en franses en 1668 por Robert Arnauld d’Andilly (ermano de Antoine, el famozo jansenisto yamado El Grande Arnauld).

I de otra parte lavori sovre el livro Masada, eskrito en 1966 en ingles por el profesor Ygael Yadin i tradusido en 1973 en franses por Paul Delavigne.

Komo ya lo savesh, el reyno de Judea, dirijido en primero por los reyes Hashmonaïm i despues por los reyes Herodyanos, fue konkistado en 63 antes del Kristo por los Romanos, ke desharon los reyes djudyos porke eran amigos de los Romanos. Ama el puevlo djudyo no soportava el poder romano, i uvo munchas rebueltas del puevlo asta la grande rebuelta de 66 despues del Kristo, del tyempo del emperador Neron. En primero los djudyos arrepusheron los Romanos, fundaron una forma de republika djudiya kon moneda djudiya, ama a poko a poko los Romanos tomaron atras las sivdades ke aviyan pedrido (entre las kualas la ke era defendida por Flavius Josephe) i enserraron Yerushalayim ke kayo en 70, i kon eya kayo el Templo, el Bet Amikdash, ke fue entero kemado i derrokado por los Romanos.

Asigun Flavius Josephe, ke fue el mismo testigo, i no solo testigo, tambyen aktor de toda esta gerra, uvo mas de un milyon de djudyos ke muryeron en esta gerra, el tyerso del puevlo. Afillu si se pensa ke este shifro es egzajerado, es yene siguro ke uvo matansinas terrivles ke muncho aflakaron el puevlo djudyo.

En 70 la gerra se kedo, salvo en una kalé yamada Massada, en el dezyerto de Djudea, serka de la mar Muerta, arriva de una montanya empepinada.

Kyen fraguo esta kalé? Asigun Flavius Josephe, seriya “Yonatan el Cohen Gadol” ke fue el primero ke eskojo este lugar para fraguar un kastiyo ke yamo Metsada (byervo ebreo ke kyere dizir kalé). Kyen era este Yonatan? Muncho no se save. Afillu si no so istoryano, yene tengo una idea: si Flavius Josephe mos avla de Yonathan el Cohen gadol sin otra presizyon, asigun mi no puede ser otro ke Yonathan, ermano de Yeuda Makabi, ke fue a la vez Cohen gadol i ombre de gerra. Lo veo byen, komo ombre de gerra, eskojer este lugar de Djudea para fraguar una kalé kontra los Gregos.

De toda manera, lo ke es siguro, es ke un siglo mas despues es el rey Herodes el Grande, el mizmo ke izo los fraguamentos del Templo de Yerushalayim, ke izo fraguar todas las paredes i torres de defensa de este lugar de Massada para ke sea una kalé muy fuerte i protejada. Asigun Flavius Josephe, “Herodes enserro la kalé por una pared fraguada kon pyedras blankas, de dodje kovdos de altura i ocho de anchura. El torno de esta pared era de syete stadyones”. (Aki avro una paranteza para akodrarvos ke el stadyon era una mezura grega ke reprezentava alderredor de 180 metros. 7 stadyones mos aze una largura de 1.260 metros. Fin de la paranteza). “I Herodes enfortesyo la kalé, mos dize Flavius Josephe, kon 37 torres altas de sinkuenta kovdos kada una.” I Josephe adjusta ke, komo la tyerra de este chiko yano era muy fekonda, izo lavorar esta tyerra para ke pueda dar de komer a los moradores de la kalé. Parese ke, 1.900 anyos atras, el dezyerto de Judea era muncho mas fekondo ke lo ke vemos oy.

massadaEsto todo es lo ke mos konta Flavius Josephe. Por su parte, el profesor Ygael Yadin eskrivyo el livro Masada porke, a parte de ser el ijo del profesor Sukenik, (el ke merko unos de los primeros manuskritos topados en la mar Muerta), a parte de ser el mismo profesor de arkeolojiya en la Universita ebraika de Yerushalayim, a parte de tener sido el primer kapo de armada de Tsahal en la gerra de independensa, fue el direktor de la ekspedisyon arkeolojika de Massada.

I ke mos konta Yadin? Yadin i su ekipo deskuvrieron a la punta norte de la kalé un palasyo del rey Herodes, fraguado a la romana sovre tres tabakas, la primera sostenida por una pared de pyedra arriva del presipisyo. Dishe un palasyo i no el palasyo porke se izo fraguar un otro palasyo tambyen ama al oeste, un palasyo para la politika i el governo. A la rovez, el palasyo ke Herodes se izo fraguar a la punta norte fue solo un palasyo para gozar el plazer i el repozo, kon banyos a la romana – uno yelado (frigidarium), uno tivyo (tepidarium), uno kayente (caldarium). Las paredes fueron topadas pintadas para dar a pensar ke eran de marmol, lo ke no eran en vedra. Los suelos eran de mozaika.

Ama la arkeolojiya, son tambyen epokas diversas ke se topan en djuntos en el mismo lugar: en medyo de este palasyo herodyano, los bushkadores de oy van a topar restos de la okupasyon de la kalé por los zelotes de 73: kozas de komer, muezes, granos, ke se konservaron asta oy, i varyas kozas ke amostran komo proves i umildes eran los zelotes bivyendo en los restos del palasyo. I tres puerpos kon las armas (filechas). Uno de los puerpos es el de una mansevika. Al ueso de la kavesa kedaron apegados sus kaveos peynados kon ermozas kokas: se ven en el livro de Yadin las fotos de estos kaveos vyejos de serka de 2.000 anyos.

Los bushkadores de Yadin van tambyen a topar las sisternas del palasyo. Massada se topa en medyo de un dezyerto sin agua. Ama en otonyo, en supito, puede aver unos dos diyas ande la luvya kaye kon una fuersa i abondansya ikreivles: Yadin i su ekipo ke kedaron anyo entero en Massada konosyeron la fuersa de las aguas del dezyerto. Son estas aguas de dos diyas de luvya ke eran arrekojidas por las sisternas del rey Herodes.

Agora desharemos por un tyempo Yadin i sus bushkadores para aboltar a Flavius Josephe, i meldar ko ke konto sovre esta trajediya de 73:

Del empesijo Josephe mos da los nombres de los dos kapos de gerra enemigos. Las armadas romanas son dirijidas por un jeneral yamado Flavius Silva, i los zelotes – ke Josephe, komo los Romanos, yama sikaryos, kuchiyadores, savyendo ke la sika es un kuchiyo de matar – estos son dirijidos por un syerto Eleazar ben Yair.

En mi emisyon de 2008 konsagrada a la primera rebuelta, yo me demandi deke este inat de los Romanos kontra unos kuantos djudyos enserrados en el dizyerto. I respondi lo ke sige:

“Ansina eran los Romanos : kuando empesaron una koza, kale eskaparla entera.

Por egzemplo, a kada vez ke los romanos tomaron una sivdad defendida por rebeldos, no solo mataron a todos, ma ensima la kemaron entera, i echaron sal sovre la tyerra al derredor. Kale saver tambyen ke los Romanos no puediyan permetirse de deshar una rebuelta. Unos kuantos anyos antes de la rebuelta de los Djudyos, en 60,61, uvo rebuelta de los Inglezes basho la reyna Budicca, ke tuvo de entosigarse despues de una gerra terrivle. I en el mismo tyempo de la rebuelta djudya, en 67, uvo una rebuelta de un Romano de Galya, Vindex, matado en 68, i de otro Romano , Macer, en Numidia, matado en 69.”

Esto dicho, Flavius Josephe empesa de kontarmos lo ke izo Silva, ke se asemeja muncho a lo ke izo Cesar frente a los Gayos de Vincegetorix enserrados en Alesia: empeso por meter kampos de askeres en kada lugar de menester alderredor de la kalé, despues fraguo una pared para impedir ke kualkyer pueda fuir. La fuersa de las armadas romanas fue syempre esta kapachedad de tomar el tyempo de fraguar paredes, torres, makinas de gerra. Los Romanos eran organizados i saviyan lo ke es preparar las kondisyones de la viktorya. Lo van a amostrar en Massada.

Flavius Josephe empesa por amostrarmos kuanto yuch era para los Romanos de atakarse a esta kalé: organizar la yegada de agua i de komer de muy leshos, syendo ke aya no ay. Aprovar de suvir a la kalé, grasyas a dos kaminos ke son los solos ke ay para pueder suvir asta arriva, ya es yuch sin tener de pelear kon enemigos. Kaer i aresvalarse es la muerte por siguro. Indimas es yuch de suvir si los enemigos de arriva embiyan filechas. La kalé teniya de komer grasyas a los kampos i de bever grasyas a las sisternas, de tal manera ke no serviya de nada de asperar ke los zelotes se mueran de ser i de ambre.

Vyendo esto, i esto es la fuersa de los Romanos, Silva se izo injenyero de gerra i izo fraguar por prizoneros djudyos la famoza “suvida de Silva”, una suvida artifisyala echa de tyerra i de pyedras, kon una torre ensima kuvyerta de fyerro, de la kuala los Romanos echavan filechas i pyedras grasyas a makinas, i Josephe mos dize ke “en mas de las makinas ordinaryas aviya otras ke Vespasiano i Titus teniyan inventado”. Silva da golpes sovre las paredes djudiyas para derrokarlas, ama los djudyos fraguan una sigunda pared detras de la primera, kon madera i tyerra ke akoje los golpes sin derrokarse.A la kontra, kada golpe la aze mas fuerte.

Vyendo esto, Silva echa fuego para kemar la parte de la pared en madera. La madera se mete a kemar, ama el vyento torna i las yamas vyenen kemar las makinas de los Romanos, asta ke de muevo ej vyento se abolte i keme la pared djudiya.

Vyendo esto, Eleazar ben Yair avla a sus ombres i les dize ke mas vale morir ke kaer esklavos de los Romanos. En primero, ay unos ke son shupelis, ama Eleazar les avla de la vida de la alma despues de la muerte, i al kavo todos son de akodro para morir. Salvo ke la ley djudiya no permite de matarse a si mismo. Estonses los djudyos empesaron kada uno a matar a su famiya, mujer i kriaturas, i despues eskojeron a la suerte diez ombres kargados de matar a los otros. I despues los diez eskojeron el ultimo ke mato a los mueve, i se mato el mismo.

Komo se save esto todo? Porke dos mujeres (una vyeja mujer i una prima de Eleazar) reusheron a eskonderse, i son eyas ke kontaron lo todo mas despues.

A la demanyana del diya de despues, los Romanos atakan, enkantados de no topar rezistansya. Vyenen las dos mujeres ke les kontan lo ke afito. Los Romanos no las kyeren kreer, ama, mos dize Flavius Josephe, “vyendo esta grande kantidad de muertos, en vez de tresalirse konsiderandolos komo enemigos, no puediyan kedarse de admirar ke por un tal despresyo de la muerte tanta djente tengan tomado i egzekutado tala kuryoza rezolusyon.”

Esto es la istorya kontada por Flavius Josephe. Todo parese ser vedra, porke a kada vez ke la arkeolojiya topo una koza, esta koza vino en konfirmasyon de lo ke aviya kontado Flavius Josephe.

Los arkeologos del ekipo de Yadin izyeron munchas deskuvyertas muy esmovyentes, komo por egzemplo onze pedasos de tyerra kocha sovre los kuales eran eskritos onze nombres diferentes, entre los kuales “Ben Yair”. Seriyan los nombres de los ultimos diez, para eskojer el ke matara a los otros? Nunka seremos siguros, eskrive Yadin, ama seriya posivle…

En mas de estas deskuvyertas, los arkeologos toparon un mikve, un kal, i tambyen una iglesya bizantina, fraguada unos kuantos siglos mas despues.

Ama sovre todo, toparon un alay de manuskritos, no solo de la misma epoka ke los de la Mar Muerta serka de Kumran, ama mijor de esto: son manuskritos “kumranikos”, komo lo rekonose Yadin el mismo. Komo se save esto? Porke el kalendaryo utilizado en los manuskritos topados en Massada no es el kalendaryo klasiko; es el kalendaryo de la sekta dicha de Kumran.

I esto es muy muy interesante: la grande mayoriya de los arkeologos i istoryanos pensan ke la sekta dicha de Kumran son los Essenyanos de los kuales avla Flavius Josephe.

Ama ay aki i aya unos ke no son tan siguros de la koza. I uno de los mas famozos istoryanos ke no eran de akodro kon esta teoriya de los Essenyanos fue el grande istoryano djudyo ingles Cecil Roth, ke se muryo en 1970. El syempre penso i eskrivyo ke asigun el los manuskritos de la mar muerta fueron eskritos, no por essenyanos, ama por zelotes.

Kuando Cecil Roth se ambezo ke Yadin aviya topado manuskritos “kumranikos” en Massada, pishin disho ke esto era la preva ke el teniya razon: los de Massada eran zelotes.

Ama Yadin responde a esto ke ya se save ke aviya essenyanos kombatyendo al lado de los zelotes, por egzemplo el kapo de gerra konosido komo Yohanan el Essenyano. Asigun Yadin, aviya, al lado de los zelotes, essenyanos en Massada ke aviyan traido kon eyos sus manuskritos…

Malorozamente, yo no tengo la kapachedad de dizirvos kyen tyene razon entre los dos!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: