Kon miradas vazias i su kavesa enklinada,
Mirava a sus entornos sin pensar a nada..
Kaminava en las kayes angusyozo
Sin buto i sin gozo.
memorias_de_un_maestroEra komo un pedrido en sus suenyos,
Akodrandose de la kerensya de sus elevos,
De kuando el era mansevo.
Pensava a la djente ke lo respektavan
A su mujer i su ija ke lo adoravan.
Kon sus flakas piernas i su baston en la mano
Kaminava en las kayes kalmo i en vano.
Se via komo un hombre entre los kastigados
Komo si fuera ke su vida la paso yena de pekados.
Pensava ke este mundo era una sala de teatro
Ken hazino,ken ambierto i ken arto.
Todos los rolos hueron mal destribuidos
Unos kon gozoz otros de ansyas tuyidos.
Kada noche siertos en rolo de trajedias
Biven una vida diferente de sus vidas.
Algunos topan falsas alegrias en sus komedias
Esto es sus vidas ansi pasan los dias.
Se tornava angusyozo siempre kon su kavesa enklinada,
Sin tener ningun buto a su kaza asolada.
La vida es yena kon kavzos ke no esperas
En el korazon se gravan las memorias verdaderas…
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: